ការធ្វើបរិវត្តកម្មឌីជីថល គឺជាការចាប់យក និងទាញយកផលប្រយោជន៍ជាអតិបរមា ជំរុញកំណើនសេដ្ឋកិច្ចជាតិ

តាមការថ្លែងរបស់ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក្នុងពិធីបើក វេទិកាសេដ្ឋកិច្ច និងធុរកិច្ច អាស៊ី អឺរ៉ុប លើកទី១ ក្រោមមូលបទ ការផ្លាស់ប្ដូរទៅរកគន្លងប្រក្រតីភាពថ្មី ការធ្វើអានុ ភាវូបនីយកម្មខ្សែច្រវាក់តម្លៃសកល ពហុភាគីនិយម និងបដិវត្តន៍ឧស្សាហកម្មទី៤ នៅក្រសួង ពាណិជ្ជកម្ម។ ការធ្វើបរិវត្តកម្មឌីជីថល គឺជាការចាប់យក និងទាញយកផលប្រយោជន៍ជា អតិបរមាពី ការរីកចម្រើន នៃបច្ចេកវិទ្យាគមនាគមន៍ និងព័ត៌មាន និងបច្ចេកវិទ្យាឌីជីថល ដើម្បីគាំទ្របដិវត្តន៍ឧស្សាហ កម្មទី៤ ដែលបង្កើនផលិតភាព ជំរុញកំណើនសេដ្ឋកិច្ចជាតិ និងកសាងសង្គម និងសេដ្ឋកិច្ចឌីជីថល ដែលផ្តល់ ផលប្រយោជន៍ដល់ពលរដ្ឋឌីជីថល និងសម្រេចបាននូវការអភិវឌ្ឍសេដ្ឋកិច្ចមួយខ្ពស់ឡើងជា លំដាប់។ 

ឯកឧត្តម រដ្ឋមន្ត្រីក្រសួងពាណិជ្ជកម្ម បានថ្លែងបន្តថា វេទិកាថ្ងៃនេះត្រូវបានរៀបចំឡើងស្របពេលដែល ប្រទេសនានាត្រូវការជាចំបាច់ ដែលមិនធ្លាប់មានពីមុននូវពាណិជ្ជកម្ម និងការអភិវឌ្ឍ ខណៈពេលដែល ពិភពលោកទាំងមូលកំពុងប្រឈមមុខនឹងជំងឺរាតត្បាតដែលបានជះឥទ្ធិពលដល់អាយុជីវិត និងជីវភាព រស់នៅរបស់មនុស្សរាប់លាននាក់នៅទូទាំងពិភពលោក។ ទោះជាយ៉ាងនេះក្តី ក្រោមការដឹកនាំប្រកប ដោយគតិបណ្ឌិត និងរឹងមាំ របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កម្ពុជាអាចរក្សាបាននូវសុខសន្តិភាព និងស្ថិរភាពនយោបាយ ដែលជាកត្តាសំខាន់បំផុត ដែលសម្រេច បាននូវកំណើនសេដ្ឋកិច្ចជាមធ្យម៧.៧% ក្នុងមួយឆ្នាំ ក្នុងអំឡុងពេលពីរទសវត្សរ៍មុនការរាតត្បាតនៃ ជម្ងឺកូវីដ-១៩។

ឯកឧត្តម ប៉ាន សូរស័ក្តិ បានឱ្យដឹងថា ថ្វីត្បិតតែចាប់ពីដើមឆ្នាំ២០២០ ព្រះរាជាណាចក្រកម្ពុជាទទួលរង ផលប៉ះពាល់យ៉ាងខ្លាំងពីជំងឺកូវីដ ១៩ ក៏ដោយ ក៏សេដ្ឋកិច្ចរបស់កម្ពុជា នៅតែបន្តកើនឡើង ២.៤% នៅក្នុងឆ្នាំ២០២១ និង ៤.៨% នៅ ក្នុងឆ្នាំ២០២២ យោងតាមរបាយការណ៍ការព្យាករណ៍របស់ រាជរដ្ឋា ភិបាល ក្នុងអំឡុងពេលនៃការធ្លាក់ចុះសេដ្ឋកិច្ចបណ្តាលមកពីជំងឺរាតត្បាត រដ្ឋាភិបាលបាន វិនិយោគច្រើន ជាងមួយពាន់លានដុល្លារសហរដ្ឋអាមេរិក ដើម្បីគាំទ្រដល់ធុរកិច្ចដែលរងផលប៉ះពាល់ និងបានចាត់វិធាន ការពិសេសក្នុងការ ពង្រឹងសំណាញ់សុវត្ថិភាពសង្គម ដើម្បីទប់ស្កាត់មិនឱ្យប្រជាពលរដ្ឋ សាមញ្ញធ្លាក់ចូល ទៅក្នុងភាពក្រីក្រ ហើយបានចាត់វិធានការយ៉ាងម៉ឺងម៉ាត់ និងទាន់ពេលវេលាក្នុងការទប់ស្កាត់ការរីករាល ដាលនៃជំងឺកូវីដ ដោយធានាឱ្យបាននូវសុខុមាលភាពប្រជាជន សន្តិសុខស្បៀង និងបន្តលើកកម្ពស់ ពាណិជ្ជកម្ម និង ការវិនិយោគ បង្កើតការងារ រក្សាកម្រិតអប្បបរមានៃអតិផរណា និងរក្សានូវស្ថិរភាពម៉ាក្រូ សេដ្ឋកិច្ច។ 

នៅក្នុងផែនការស្ដារសេដ្ឋកិច្ចក្រោយ កូវីដ-១៩ ឆ្នាំ២០២១ ដល់ ២០២៣ ដែលរៀបចំបានយ៉ាងល្អ រាជរដ្ឋាភិបាលបានដាក់ចេញនូវវិធីសាស្ត្រកំណត់ទិសដៅ ៣ (3Rs) ការស្ថារឡើងវិញ តាមរយៈ ការធ្វើឱ្យមានស្ថេរភាព និងការស្ដារ 'កំណែទម្រង់' តាមរយៈការធ្វើពិពិធកម្ម ការប្រកួតប្រជែង និង 'ការកសាងភាពធន់' ប្រកបដោយបរិយាប័ន្ន និងមាននិរន្តរភាព។ កម្ពុជាក៏បានធ្វើយុទ្ធនាការចាក់វ៉ាក់ សាំងយ៉ាងខ្លាំងក្លា ដោយគ្រប់គ្រងវ៉ាក់សាំងចំនួនជាង ៣០លានដូស និងបានចាក់វ៉ាក់សាំងបាន ប្រមាណជាង ៨៧.៧% នៃចំនួនប្រជាជនរបស់កម្ពុជា។យុទ្ធនាការចាក់វ៉ាក់សាំងនេះ ជាកត្ដាដែលធ្វើ ឱ្យរាជរដ្ឋាបាលកម្ពុជាសម្រេចចិត្តបើកដំណើរការប្រទេសលើគ្រប់វិស័យឡើងវិញ នៅថ្ងៃទី១ ខែវិច្ឆិកា ឆ្នាំ២០២១ កន្លងទៅនេះ។

ការប្រែក្លាយប្រទេសកម្ពុជាទៅជាសេដ្ឋកិច្ចទីផ្សារត្រូវបានរាជរដ្ឋាភិបាលគិតគូរយ៉ាងល្អិតល្អន់ ដើម្បីបង្កើត ឱ្យមានទីផ្សារសេរីដែលមានលក្ខណៈរៀបរយ ដែលមានការប្រកួតប្រជែងដោយសមភាពជាជាងការប្រកួត ប្រជែងក្នុងទីផ្សារសេរីបែបអនាធិបតេយ្យ។ ការប្រែក្លាយជាសេដ្ឋកិច្ចទីផ្សារ អភិបាលកិច្ចល្អ កិច្ចសម្រួល ពាណិជ្ជកម្ម សមាហរណកម្មសេដ្ឋកិច្ច និងសេរីភាវូបនីយកម្ម ត្រូវបានលើកកម្ពស់ ដើម្បីទាក់ទាញ វិនិយោគិន និងជំរុញឱ្យមានកំណើនបន្ថែម។ ការទាក់ទាញវិនិយោគនេះ រួមទាំងការ លើកទឹកចិត្ត ផ្នែកពន្ធដារ ការធ្វើវិសោធនកម្មច្បាប់វិនិយោគ និងការធ្វើឱ្យប្រសើរឡើងនូវភស្តុភារ ពាណិជ្ជកម្ម ហើយ នឹងការអនុម័តច្បាប់ និងបទប្បញ្ញត្តិនានាដើម្បីលើកកម្ពស់ពាណិជ្ជកម្មដោយស្មើភាពដែលកត្តា ទាំងអស់ នេះផ្តល់ភាពងាយស្រួលដល់វិនិយោគិន ហើយផ្តល់ភាពទាក់ទាញដល់ធុរកិច្ច ដែលមានបំណងឈាន ទៅកាន់ទីផ្សារធំ និងមានសក្តានុពល ដូចជាទីផ្សារអាស៊ាន អាស៊ានដៃគូសហភាពអឺរ៉ុប និងដៃគូពាណិជ្ជកម្មផ្សេងទៀត ដែលកម្ពុជាទទួលបានការអនុគ្រោះពាណិជ្ជកម្ម។

ក្នុងអំឡុងពេលនៃការកើតជំងឺរាតត្បាតនេះ បើតាម ឯកឧត្តម រដ្ឋមន្ត្រីក្រសួងពាណិជ្ជកម្ម ការកើនឡើង កាន់តែច្រើននៃសកម្មភាពពាណិជ្ជកម្មតាមប្រព័ន្ធអេឡិចត្រូនិក (e-commerce) នៅប្រទេសទាំងអស់ នៃពិភពលោក។ជំងឺកូវីដ-១៩ បានផ្លាស់ប្ដូររបៀបដែលយើងធ្វើធុរកិច្ច ហើយបច្ចុប្បន្ននេះ ប្រជាជនមាន ឆន្ទៈក្នុងការផ្សារភ្ជាប់ជាមួយប្រតិបត្តិការឌីជីថលច្រើនជាងពេលណាទាំងអស់។ ការអភិវឌ្ឍយ៉ាងឆាប់ រហ័សនៃពាណិជ្ជ កម្មតាមប្រព័ន្ធអេឡិចត្រូនិក និងការធ្វើពាណិជ្ជកម្មឌីជីថលបានពង្រីកគម្លាតនៃ ឧបករណ៍ឌីជីថល រវាងប្រទេសអភិវឌ្ឍន៍ និងកំពុងអភិវឌ្ឍន៍។ កម្ពុជាបានដាក់ចេញនូវគោល នយោបាយសេដ្ឋកិច្ច និង សង្គមឌីជីថល ហើយកំពុងរៀបចំគោលនយោបាយជាតិកម្មសិទ្ធិបញ្ញា ដែលមានគោលបំណងមួយក្នុងចំណោមគោលបំណងនានាផ្តោតទៅលើការស្រាវជ្រាវ និងអភិវឌ្ឍន៍សម្រាប់បច្ចេកវិទ្យា និងនវានុវត្តន៍។ 

កាលានុវត្តភាពនេះ វាជាការចំបាច់ណាស់សម្រាប់កម្ពុជាក្នុងការច្បាមយកនូវនិន្នាការបដិវត្តន៍ ឧស្សាហកម្មទី៤ (4IR) ជាពិសេសទាក់ទងនឹងបច្ចេកវិទ្យាគមនាគមន៍ និងព័ត៌មាន (ICT) ដើម្បី បង្រួមគម្លាតនៃឧបករណ៍ឌីជីថល រវាងកម្ពុជាជាមួយប្រទេសអភិវឌ្ឍន៍ និងបង្កើនប្រសិទ្ធភាពសេដ្ឋកិច្ច និងផ្ដល់លទ្ធភាពឱ្យពលរដ្ឋកម្ពុជាអាចទទួលបានផលប្រយោជន៍ពីការធ្វើបរិវត្តកម្មឌីជីថល។