ក្រុមហ៊ុន Thai Airways International Pcl នឹងទទួលបានការគាំទ្រ ផ្នែកហិរញ្ញវត្ថុសំខាន់ៗពីរដ្ឋាភិបាល សម្រាប់ការបង្កើនដើមទុន 80 ពាន់លានបាត ស្មើនឹង 2.2 ពាន់លានដុល្លារអាមេរិក និងផែនការផ្លាស់ប្តូរបំណុល ទៅជាភាគហ៊ុន ដែលមានគោលបំណង ជួយក្រុមហ៊ុនអាកាសចរណ៍ ឱ្យរួចផុតពីការក្ស័យធន នេះបើយោងតាម សារព័ត៌មាន Bloomberg។

រដ្ឋមន្ត្រីក្រសួងហិរញ្ញវត្ថុ លោក Arkhom Termpittayapaisith បាននិយាយនៅក្នុង បទសម្ភាសន៍ជាមួយ Bloomberg ថា ធនាគារគ្រប់គ្រងដោយរដ្ឋ នឹងដឹកនាំក្នុងការផ្តល់មូលនិធិ ដល់ប្រាក់កម្ចីថ្មី បំប្លែងបំណុល និងបញ្ចូលមូលធនភាគហ៊ុន ទៅក្នុងក្រុមហ៊ុន Thai Airways ដែលជាផ្នែកមួយ នៃផែនការកែលម្អ ដែលក្រុមហ៊ុនអាកាសចរណ៍ បានផ្តល់ឱ្យតុលាការ សម្រាប់ការអនុម័ត កាលពីខែមុន។ លោកបានកត់សម្គាល់ថា ក្រសួងនិងស្ថាប័នផ្សេងទៀត នឹងបន្តរក្សាភាគហ៊ុនរួមគ្នា យ៉ាងហោចណាស់ 40 ភាគរយ ប៉ុន្តែសមាមាត្រ នឹងមិនលើសពី 50 ភាគរយ ដើម្បីជំរុញក្រុមហ៊ុនអាកាសចរណ៍ ឱ្យបន្តការប្រកួតប្រជែង។

ផែនការរៀបចំរចនាសម្ព័ន្ធបំណុល របស់ក្រុមហ៊ុនដឹកជញ្ជូន ដែលស្ថិតក្រោម ការត្រួតពិនិត្យរបស់តុលាការ ត្រូវបានគេរំពឹងថា នឹងបញ្ចប់នៅឆ្នាំ 2024។ ពីមុនក្រុមហ៊ុនអាកាសចរណ៍នេះ បានដាក់ពាក្យ សុំការការពារក្ស័យធន នៅឆ្នាំ 2020 ដោយសារការខាតបង់ ជាបន្តបន្ទាប់ពីឆ្នាំ 2013។ ទោះជាយ៉ាងណាក៏ដោយ ការស្ទុះងើបឡើងវិញ នៃការធ្វើដំណើរ តាមផ្លូវអាកាសពិភពលោក នាពេលថ្មីៗនេះបានជួយ Thai Airways ជំរុញលំហូរសាច់ប្រាក់របស់ខ្លួន និងកាត់បន្ថយប្រាក់កម្ចី។

មន្ត្រីរូបនេះបាននិយាយថា ការកែលម្អហិរញ្ញវត្ថុ និងផែនការបង្កើនដើមទុន នឹងពន្លឿនការបន្តការជួញដូរភាគហ៊ុន របស់ក្រុមហ៊ុនអាកាសចរណ៍ ដែលត្រូវបានផ្អាក នៅក្នុងខែឧសភា ដោយបន្ថែមថា ពេលវេលាមុន សម្រាប់ការជួញដូរ ចាប់ផ្តើមម្តងទៀត គឺនៅឆ្នាំ 2025។