ស្វែងយល់បន្ថែមពីបេតិកភណ្ឌមជ្ឈឹមបូព៌ា របស់ប្រទេសបារាំងនៅក្នុងទីក្រុង Provins!

យើងគ្រប់គ្នាសុទ្ធតែបានដឹងហើយថា ប្រទេសបារាំងគឺជាប្រទេសដែលមានអត្រាភ្ញៀវទេសចរកើនឡើង ខ្ពស់បំផុតនៅក្នុងពិភពលោក ដែលក្នុងនោះទីក្រុងប៉ារីសគឺជាចំណែកដ៏ធំមួយ ក្នុងការទាក់ទាញភ្ញៀវទេសចររាប់លាននាក់ មកពីបណ្តាប្រទេសនានានៅជុំវិញពិភពលោក ឲ្យធ្វើដំណើរមកកម្សាន្តនៅបារាំង។ ប៉ុន្តែតើអ្នកមានដែលដឹងអត់ថា បើសិនជាអ្នកធ្វើដំណើរចេញពីក្រុងប៉ារីសចំណាយពេលប្រមាណ 2 ម៉ោងទៀត អ្នកនឹងបានឃើញទីក្រុងមួយផ្សេងទៀតដែលមានរចនាបថខុសគ្នាទាំងស្រុង ជាមួយនឹងប៉ារីសតែម្តង។ 

 

ទីក្រុងដែលយើងនឹងលើកមកនិយាយនោះ គឺជាទីក្រុង Provins របស់បារាំង ដែលវាក៏ជាទីក្រុងដែលមានសម្បត្តិបេតិកភណ្ឌបែបមជ្ឈឹមបូព៌ារបស់ពិភពលោក មួយចំនួនលាក់ខ្លួននៅក្នុងទីក្រុងនេះផងដែរ។ Provins ត្រូវបានប្រជាជនបារាំង និងរដ្ឋាភិបាលថែរក្សាបានយ៉ាងស្អាត ដែលវាផ្តល់នូវទេសភាព នៃប្រាសាទបុរាណបែបប្រវតិ្តសាស្ត្រជាច្រើនទៀតផង។ 

 

សម្រាប់អត្ថបទនេះ យើងនឹងនាំប្រិយមិត្តអ្នកអានទាំងអស់គ្នា មកធ្វើការស្វែងយល់បន្ថែម ពីបេតិកភណ្ឌមជ្ឈឹមបូព៌ាមួយចំនួន របស់ប្រទេសបារាំង ដែលមាននៅក្នុងទីក្រុង Provins មួយនេះ។

 

1. Eglise Catholique Collégiale St Quiriace

 

នេះគឺជាព្រះវិហារបុរាណបែបសាសនា ហើយក៏ជាផ្នែកមួយរបស់បេតិកភណ្ឌរបស់បារាំងផងដែរ។ វាត្រូវបានសាងសង់នៅក្នុងសតវត្សទី 12 និងជាអាគារតំណាងឲ្យឧទាហរណ៍ដ៏ឥតខ្ចោះនៃវិហារ Authentic French Gothic។ ព្រះវិហារនេះក៏បានទទួលរងការខូចខាតយ៉ាងច្រើន ក្នុងកំឡុងសង្គ្រាមលោកលើកទីពីរ និងត្រូវបានជួសជុលទៅតាមផ្នែកម្តងម្កាលដែរ។ នៅពេលដែលអ្នកចូលទៅក្នុងវិហារនេះ អ្នកនឹងបានឃើញទីធ្លានៃបរិវេណដ៏ធំល្វឹងល្វើយ និងមានលាយឡំបរិយាកាសបរិសុទ្ធចេញពីក្នុងជញ្ជាំងព្រះវិហារផងដែរ។ អ្នកនឹងបានទទួលអារម្មណ៍ថាត្រជាក់ណាស់ ពេលដែលអ្នកស្ថិតនៅក្នុងវិហារនេះ។ នៅជុំវិញបរិវេណវិហារបុរាណបែប Authentic French Gothic នេះ អ្នកអាចដើរសិក្សាស្វែងយល់ពីផ្នែកមួយចំនួន ប្រវត្តិនៃរឿងរ៉ាវនៃព្រះវិហារ ដែលមានបង្ហាញនៅគ្រប់កន្លែងក្នុងព្រះវិហារ។ 

 

2. César Tower

 

ដើរចេញពីព្រះវិហារខាងលើ ប្រមាណពីរឬបីនាទី អ្នកនឹងបានមកដល់ប៉មដ៏អស្ចារ្យមួយនេះ។ វាត្រូវបានសាងសង់ខ្ពស់នៅជាប់នឹងដងផ្លូវធ្វើដំណើរ ដែលជនជាតិបារាំងមានជំនឿថា វាតំណាងឲ្យភាពរុងរឿងនៃប្រជាជាតិរបស់ខ្លួន។

 

ភ្ញៀវទេសចរ អាចមានជម្រើសក្នុងការឡើងទៅក្នុងប៉ម ដោយការបង់ថ្លៃសេវាកម្មបន្តិចបន្តួច។ ចូលមកក្នុងនេះ អ្នកនឹងបានឃើញពីជញ្ជាំងប៉មដ៏ក្រាស់ ដែលត្រូវបានគេស្គាល់ថា “Pâté aux Anglais” ក្រៅពីនេះក៏មានបន្ទប់យាម និងបន្ទប់អភិបាលផងដែរ។ ប៉ុន្តែចំណុចពិសេសនៅពេលដែល អ្នកនៅលើប៉មនេះ គឺអ្នកនឹងរីករាយជាមួយនឹងទេសភាពដ៏ស្រស់ស្អាតនៃទីក្រុង Provins បង្ហាញពីបុគ្គលិកលក្ខណៈនៃប្រវត្តិសាស្ត្រ និងរចនាបថនៃប៉មវ័យកណ្តាលមួយនេះ (Middle Age Tower)។

 

3. Remparts De Provins

 

ប្រសិនជាអ្នកធ្វើដំណើរមកកាន់ទីក្រុង Provins ដោយរថភ្លើង អាចនិយាយបានថា Rempart De Provins គឺជាគោលដៅដ៏ទាក់ទាញចុងក្រោយរបស់អ្នក ព្រោះវាមានទីតាំងរាងឆ្ងាយបន្តិចពីស្ថានីយរថភ្លើង។ ប្រាសាទមួយនេះត្រូវបានកសាងនៅសតវត្សទី 13 និង 14 ដែលជញ្ជាំងរបស់វា មានប៉មព័ទ្ធជុំវិញច្រើនជាង 20 ប៉ម និងលាតសន្ធឹងប្រមាណ 1,200 ម៉ែត្រឯណោះ។ បើយោងតាមភ្ញៀវទេសចរដែលមកដល់ទីនេះ ពួកគាត់បានបញ្ចេញចំណាប់អារម្មណ៍ថា វាហាក់បីដូចជាពួកគាត់កំពុងស្ថិតនៅ ផ្នែកកណ្តាលនៃ ខ្សែភាពយន្តប្រវត្តិសាស្ត្រណាមួយអញ្ចឹង ហើយនឹងកាន់តែទទួលអារម្មណ៍ថាពិតៗបន្ថែមទៀត បើសិនជាសំណាងមកដល់ចំពេលដែលមានហ្វូងបក្សីជាច្រើន កំពុងតែហើរនៅលើមេឃទៀតនោះ។ ចំណុចពិសេសបន្ថែមនៃបរិវេណនេះ គឺជាវាលស្មៅដ៏ធំទូលាយ នៅផ្នែកខាងក្រៅប៉ម និងមានអន្តរកម្មបានយ៉ាងទាក់ទាញជាមួយនឹងពន្លឺព្រះអាទិត្យចាំងប្រដេញពណ៌ដូចមាស ជាមួយនឹងជញ្ជាំងប៉មទាំងនេះ។

 

4. ហាងកាហ្វេ នៅក្នុងបរិវេណ Place du Châtel

 

វាពុំមែនជាកន្លែងប្រវត្តិសាស្ត្រ ឬជាបេតិកភណ្ឌអ្វីនោះឡើយ គ្រាន់តែជាកន្លែង ដែលអាចឲ្យភ្ញៀវទេសចរ បានអង្គុយសម្រាក ហើយអាចមើលទេសភាពដ៏អស្ចារ្យនៅជុំវិញនេះ ជាមួយនឹងកាហ្វេមួយកែវបាន។ នៅតាមដងផ្លូវតូចៗនៃទីក្រុង Provins មានហាងកាហ្វេជាច្រើន សម្រាប់សម្រាក លំហែអារម្មណ៍បាន។ 

 

លើសពីនេះ ភ្ញៀវទេសចរក៏អាចចូលទៅទិញរបស់របរប្រើប្រាស់ និងវត្ថុអនុស្សាវរីយជាច្រើនធ្វើឡើងពីដៃ និងក្នុងរសជាតិវប្បធម៌ប្រចាំតំបន់ ត្រឡប់ទៅវិញផងដែរ នៅក្នុងបរិវេណ Le Glacier Des Remparts។

 

ទៅកាន់ទីក្រុង Provins នេះបានដោយរបៀបណា?

 

មធ្យោបាយងាយស្រួលបំផុត ក្នុងការទៅដល់ទីក្រុង Provins ពីប៉ារីសគឺតាមរយៈរថភ្លើង។ សូមរង់ចាំនៅឯ Gare de l'Est (ស្ថានីយ៍ខាងកើត) ដែលធ្វើដំណើរទៅកាន់ Gare de Provins ។ អ្នកនឹងទៅដល់ Provins ក្នុងរយៈពេលតិចជាងពីរម៉ោង។ ត្រូវប្រាកដថាអ្នកត្រូវ ពិនិត្យមើលកាលវិភាគជាមុន ហើយរៀបចំផែនការធ្វើដំណើរទៅមក ប្រកបដោយភាពវាងវៃ ដើម្បីផ្តល់ពេលវេលាគ្រប់គ្រាន់សម្រាប់ខ្លួនអ្នក ក្នុងការរុករកទីក្រុង និងត្រឡប់មកប៉ារីសវិញបានទាន់ពេល។

 

ទីក្រុង Provins អាចនិយាយបានថាជាតំបន់ទេសចរណ៍ដ៏ល្អបំផុត ក្នុងការទៅកម្សាន្ត ធ្វើការស្វែងយល់ពីប្រវត្តិសាស្ត្រ និងវប្បធម៌របស់បារាំងនៅពេលថ្ងៃ ហើយវាក៏ជាទីក្រុង ដែលមានបេតិកភណ្ឌជាច្រើនផងដែរ។ ថ្វីត្បិតតែវា មិនត្រូវបានពេញនិយមខ្លាំងដូចប៉ារីស ប៉ុន្តែវាពិតជាទីកន្លែងដ៏សាកសម សម្រាប់អ្នកដែលចូលចិត្តធម្មជាតិ វប្បធម៌ និងរឿងរ៉ាវប្រវត្តិសាស្ត្រ។

 

ប្រភពមកពីhttps://www.thejakartapost.com/travel/2019/08/28/discover-the-medieval-heritage-of-france-in-the-town-of-provins.html