ទិវាសុខភាពផ្លូវចិត្តពិភពលោក ត្រូវបានប្រារព្ធឡើងជារៀងរាល់ឆ្នាំនៅថ្ងៃទី 10 តុលា ក្នុងគោលបំណងដើម្បីជួយលើកកម្ពស់ការយល់ដឹង និងគាំទ្របញ្ហាសុខភាពផ្លូវចិត្តនៅជុំវិញពិភពលោក។

ដើម្បីជួយថែរក្សាសុខភាពផ្លូវចិត្តរបស់មនុស្សទូទៅ ក្រុមអ្នកសិក្សាផ្នែកចិត្តវិទ្យា ក៏ដូចជាក្រុមគ្រូពេទ្យចិត្តសាស្ត្រ មកពីសាកលវិទ្យាល័យល្បីៗនៅក្នុងសហរដ្ឋអាមេរិក និងចក្រភពអង់គ្លេស បានលើកឡើង ពីការផ្លាស់ប្តូរទម្លាប់នៃការរស់នៅប្រចាំថ្ងៃបួនយ៉ាង ដែលអាចធ្វើបានយ៉ាងងាយស្រួល ក្នុងការជួយលើកកម្ពស់សុខុមាលភាពផ្លូវចិត្តបានយ៉ាងមានប្រសិទ្ធភាព។ 

1. ឈប់ផឹកស្រា ឬគ្រឿងស្រវឹងផ្សេងៗ

ការសិក្សាថ្មីមួយដែលត្រូវបានចេញផ្សាយនៅដើមឆ្នាំនេះ បានសង្កេតទៅលើមនុស្សពេញវ័យចំនួន 10,386 នាក់ ជាលទ្ធផលនៃការស្រាវជ្រាវ បានរកឃើញថាទាំងបុរសនិងស្ត្រីដែលមិនផឹកស្រាពេញមួយជីវិតរបស់ពួកគេ មានសុខុមាលភាពផ្លូវចិត្តខ្ពស់បំផុត។

លើសពីនេះទៀត ស្ត្រីដែលជាអ្នកផឹកស្រាក្នុងកម្រិតមធ្យមដែលត្រូវបានគេកំណត់ថាត្រឹម 7 កែវឬតិចជាងនេះ ក្នុងមួយសប្តាហ៍ ជាមួយនឹងអ្នកដែលឈប់ផឹកក្នុងអំឡុងពេលសិក្សានោះ ទទួលបានអត្ថប្រយោជន៍ពីការជម្រុញដល់សុខភាពផ្លូវចិត្តរបស់ពួកគេ ជាមួយនឹងកម្រិតនៃសុខុមាលភាពផ្លូវចិត្តបានល្អម្តងបន្តិចៗ ដែលអាចសន្មតថានឹងមានសុខភាពផ្លូវចិត្តល្អបំផុត ក្នុងរយៈពេលបួនឆ្នាំ។

2. កាត់បន្ថយការលេងបណ្តាញសង្គម (FB, IG, Twitter ….)

ដោយមានការកើនឡើងនៃប្រព័ន្ធផ្សព្វផ្សាយសង្គម (Social Networks) ការសិក្សាជាច្រើន បានមើលទៅលើឥទ្ធិពលរបស់វា ប៉ះពាល់ទៅលើសុខភាពផ្លូវចិត្តរបស់យើង។

ការសិក្សានៅចក្រភពអង់គ្លេសដែលបានស្ទង់លើក្មេងជំទង់ចំនួន 12,886 នាក់ដែលមានអាយុពី 13 ទៅ 16 ឆ្នាំបានរកឃើញថា ការឆែកទូរស័ព្ទច្រើនដងក្នុងមួយថ្ងៃ ត្រូវបានផ្សារភ្ជាប់ជាមួយនឹងសុខុមាលភាពផ្លូវចិត្តចុះទាប ជាពិសេសទៅលើក្មេងស្រីជំទង់ អាចបណ្តាលឲ្យប៉ះពាល់ដល់ការគេងនិងសកម្មភាពរាងកាយ ដែលវានឹងធ្វើឲ្យប្រព័ន្ធខួរក្បាល និងផ្លូវចិត្តចុះខ្សោយ ។

ការសិក្សារបស់សហរដ្ឋអាមេរិក បានសង្កេតទៅលើមនុស្សពេញវ័យ ដែលចំណាយពេលត្រឹមមួយម៉ោងក្នុងមួយថ្ងៃ នៅលើបណ្តាញសង្គមហ្វេសប៊ុក ឬ អ្នកដែលឈប់ពីបណ្តាញទំនាក់ទំនងសង្គមតែម្តង មិនត្រឹមតែមាន អារម្មណ៍រីករាយប៉ុណ្ណោះទេ ប៉ុន្តែថែមទាំងបង្កើនពេលវេលារបស់ពួកគេ ចំណាយលើសកម្មភាពក្រៅប្រព័ន្ធ ដូចជាទំនាក់ទំនងសង្គម ជាមួយគ្រួសារនិងមិត្តភក្តិ ដែលទាំងអស់នេះសុទ្ធផ្តល់ផលវិជ្ជមានដល់សុខភាពផ្លូវចិត្ត។

3. កាត់បន្ថយអាហារបម្រុងទុក (Junk foods) និងងាកមកញ៉ាំបន្លែ និងផ្លែឈើឲ្យបានច្រើន

ការបង្កើនបរិមាណផ្លែឈើនិងបន្លែ នៅក្នុងរបបអាហាររបស់អ្នក ក៏អាចផ្តល់នូវសុខភាពផ្លូវចិត្តរបស់អ្នកកាន់តែប្រសើរផងដែរ។

នៅក្នុងការសិក្សាមួយដែលត្រូវបានចេញផ្សាយ កាលពីដើមឆ្នាំនេះ អ្នកស្រាវជ្រាវអាមេរិកបានពិនិត្យមើលទិន្នន័យ ដែលបានមកពីការស្ទង់មតិតាមទូរស័ព្ទចំនួន 245,891 នាក់ ហើយបានរកឃើញថា មនុស្សពេញវ័យដែលញ៉ាំអាហារមិនសូវល្អ ឬអាហារបម្រុង ដូចជាអាហារបំពង ដំឡូងបារាំងច្រើន Fast-Food, Coke មានកម្រិតប្រូតេអ៊ីន និងវីតាមីនជំនួយសុខភាពទាប ងាយនឹងរាយការណ៍ពីរោគសញ្ញាផ្លូវចិត្ត ក្នុងកម្រិតមធ្យមឬធ្ងន់ធ្ងរ ជាងអ្នកដែលបរិភោគរបបអាហារដែលមានសុខភាពល្អ (បន្លែ និងផ្លែឈើ)។

ក្រុមអ្នកស្រាវជ្រាវបានបន្ថែមទៀតថា ការរកឃើញនេះ គឺស្របគ្នានឹងការស្រាវជ្រាវពីប្រទេសដទៃទៀត ដែលបានរកឃើញទំនាក់ទំនងរវាង របបអាហារមិនល្អនិងជំងឺផ្លូវចិត្ត។

4. ព្យាយាមប្រើប្រាស់ថ្នាំបំប៉នក្នុងពេលចាំបាច់ និងធ្វើលំហាត់ប្រាណឲ្យបានច្រើន

បន្ថែមពីលើការញ៉ាំផ្លែឈើនិងបន្លែកាន់តែច្រើននោះ យើងក៏ទទួលបានលទ្ធផលដែល ចេញផ្សាយកាលពីខែមុន ពីការពិនិត្យឡើងវិញដ៏ធំបំផុតមិនធ្លាប់មានរបស់ពិភពលោក លើអាហារបំប៉ននិងរោគសញ្ញាសុខភាពផ្លូវចិត្ត។ វាបានបង្ហាញថាការប្រើថ្នាំគ្រាប់មួយចំនួន អាចជួយដល់ស្ថានភាពសុខភាពផ្លូវចិត្តបានល្អ នៅពេលត្រូវបានផ្សាភ្ជាប់ជាមួយនឹង ការព្យាបាលធម្មតា។

ការស្រាវជ្រាវដែលបានពិនិត្យលើការវិភាគទម្រង់ធំចំនួន 33 ជាមួយនឹងមនុស្សសរុប 10,951 នាក់ បានរកឃើញភស្តុតាងរឹងមាំ ដែលថា omega-3 អាចជួយកាត់បន្ថយរោគសញ្ញាបាក់ទឹកចិត្ត បានច្រើនជាង ការប្រើថ្នាំប្រឆាំងនឹងជំងឺនេះតែមួយមុខ និងភស្តុតាងមួយចំនួនទៀតក៏បាន បញ្ជាក់ថា amino acid N-acetyl cysteine អាចមានអត្ថប្រយោជន៍ចំពោះបញ្ហាអារម្មណ៍ច្របូកច្របល់ និងជំងឺវិកលចរិក។

ថ្នាំគ្រាប់ folate មួយចំនួនក៏អាចមានប្រសិទ្ធភាព ចំពោះជំងឺធ្លាក់ទឹកចិត្តនិងជំងឺវិកលចរិកផងដែរ។

ជារួមមក ដើម្បីទទួលបានសុខភាពផ្លូវចិត្តល្អ អ្នកអាចអនុវត្តត្រឹមចំណុចទាំងបីខាងលើនេះបាន ដែលមានដូចជា កាត់បន្ថយឬឈប់ផឹកស្រានិងគ្រឿងស្រវឹងផ្សេងៗ កាត់បន្ថយពេលវេលាក្នុងការប្រើប្រាស់បណ្តាញសង្គម និងញ៉ាំបន្លែផ្លែឈើឲ្យបានច្រើន ប៉ុន្តែបើសិនជាអ្នកគិតថា អ្នកកំពុងតែមានបញ្ហាផ្លូវចិត្ត ឬតែងតែមានអារម្មណ៍តានតឹងច្រើននោះ អ្នកក៏បានបន្ថែមយកចំណុចទីបួន មកអនុវត្តទៀតក៏បាន។