វិមាននៃយុគ្គសម័យថ្មរំលីង Stonehenge មានអាយុកាលប្រហែល ៥,០០០ ឆ្នាំ!

មានមនុស្សជាច្រើន ធ្លាប់បានឃើញរូបភាពមួយនេះ ដោយកត់សម្គាល់ឃើញថាមានដុំថ្មបញ្ឈរ និងដុំថ្មត្រួតពីលើគ្នា ប៉ុន្តែភាគច្រើនគេពុំបានស្គាល់ច្បាស់ថាវាជាអ្វីឡើយ មានអាយុកាលប៉ុន្មានឆ្នាំមកហើយនោះ ហើយកសាងឡើងដើម្បីអ្វី? អញ្ចឹងថ្ងៃនេះដែរ គេហទំព័រ Cambodia Property Report សូមពាំនាំយកនូវប្រធានអំពីវិមាននៃយុគ្គសម័យថ្មរំលីង Stonehenge ដើម្បីបង្ហាញអំពីព័ត៌មានសំខាន់ៗរបស់វាមួយចំនួន ជូនដល់មិត្តអ្នកអានទាំងអស់គ្នា។ 

នៅក្នុងស្ថាននីយបុរេប្រវត្តិនៃភាពវិវត្តការរស់នៅរបស់មនុស្សលោក ក្នុងសម័យយុគ្គថ្ម (Stone Age) ដែលមនុស្សចាប់ផ្ដើមចេះប្រើប្រាស់ថ្មធ្វើជាឧបករណ៍ផ្សេងៗ បានចាប់ផ្ដើមតាំងពីខ្ទង់ ១ លានទៅ ២ លានឆ្នាំមុន រហូតមកដល់ ២០០០ ឆ្នាំមុនគ្រឹស្តសករាជ ត្រូវបានបែងចែកចេញជា ៣ ធំៗគឺ៖

• យុគ្គថ្មបំបែក (Paleolithic) ដែលមនុស្សលោកចាប់ផ្ដើមចេះប្រើប្រាស់ថ្ម ដើម្បីធ្វើជាអាវុធសម្រាប់ប្រមាញ់សត្វធ្វើជាអាហា និងការយករូងភ្នំគឺជាកន្លែងស្នាក់នៅ។ សម័យកាលនេះចាប់ផ្ដើមប្រហែល ១ លានទៅ ២ លានឆ្នាំមុន រហូតមកដល់ ១០,០០០ ឆ្នាំមុនគ្រឹស្ដសករាជ ហើយកំណត់ត្រាគេអាចរកឃើញនៅតាមតំបន់មួយចំនួនដូចជាទ្វីបអាហ្វ្រិចអំពីការសិក្សារទៅលើថ្ម និងឧបករណ៍ប្រើប្រាស់នៅក្នុងរូងភ្នំ បង្ហាញថាទ្វីបនេះមានមនុស្សរស់នៅចាប់តាំងពីពេលនោះមក។ 

• យុគ្គថ្មសម័យកណ្ដាល (Mesolithic) ចាប់ផ្ដើមពីឆ្នាំ ១០,០០០ ដល់ឆ្នាំ ៦,០០០ មុនគ្រឹស្ដសករាជ ដែលមនុស្សចេះប្រើប្រាស់ថ្មក្នុងការស្វែងយកចំណីអាហារដដែល ប៉ុន្តែមានបន្ថែមក្នុងការចេះរកត្រី មានការប្រើប្រាស់ព្រួញដើម្បីបរបាញ់សត្វ និងមានសិល្បៈគំនូរនៅលើជញ្ជាំងក្នុងរូងភ្នំ ជាពិសេសគឺចេះចិញ្ចឹមសត្វដើម្បីការពារខ្លួននៅពេលធ្វើដំណើរ ហើយគេអាចរកឃើញភ័ស្ដតាងទាំងនោះ នៅទ្វីបអឺរ៉ុបផងដែរ បង្ហាញថាមនុស្សរស់នៅទីនោះចាប់ពីពេលនោះមក។

• យុគ្គសម័យថ្មរំលីង/សំលៀង (Neolithic) ជាយុគ្គសម័យថ្មចុងក្រោយគេបង្អស់ និងត្រៀមចូលដល់យុគ្គលោហៈផងដែរ។ កាលពីពេលនោះ មនុស្សចាប់ផ្ដើមចេះរស់នៅជាក្រុមតាមតំបន់មាត់ទឹក (ទន្លេ, ស្ទឹង...) ហើយជាពិសេសគឺបដិវត្តកសិកម្មក៏បានកកើតឡើងដំបូងក្នុងយុគសម័យនោះផងដែរ។ វាត្រូវបានចាប់ផ្ដើមពីឆ្នាំ ៦,០០០ មុនគ្រឹស្ដសករាជរហូតមកដល់ឆ្នាំ ២,០០០ មុនគ្រឹស្តរាជ ដែលប្រវត្តិសាស្ត្ររបស់មនុស្សជាតិចាប់ផ្ដើមកត់ត្រាឡើងកាន់តែច្បាស់ និងឈានចូលដល់ (Prehistory) ផងដែរ។

បន្ទាប់ពីបានស្វែងយល់ត្រួសៗអំពីយុគ្គសម័យថ្មទាំង ៣ ខាងលើនេះហើយ យើងចូលមកប្រធានបទនៃវិមាន Stonehenge យើងវិញម្ដង ដោយវាគឺជាកំណត់ត្រាច្បាស់ជាងគេបំផុត បង្ហាញអំពីអរិយធម៌របស់មនុស្សនៅក្នុងសម័យយុគ្គថ្មរំលីង ជាសម័យចុងក្រោយដែលមានវត្ថុតាងតិចតួចបំផុត។ វិមាននេះមានឈ្មោះថា Stonehenge ស្ថិតនៅក្នុងប្រទេស Wiltshire ចក្រភពអង់គ្លេស ជាកន្លែងសម្រាប់កប់សាកសពរូបរាងកាយដែលបានស្លាប់ទៅរបស់មនុស្សជំនាន់នោះ ហើយតាមការស្រាវជ្រាវរបស់លោក John Aubrey កាលពីឆ្នាំ ១៦៦៦ រកឃើញរណ្ដៅសាកសពចំនួន ៥៦ កន្លែង និងមានការដាក់ថ្មនៅជំវិញតំបន់នោះ ដែលជាជំនឿតាំងពីបុរាណ ប្រហាក់ប្រហែលនឹងជំនឿនៃការកប់សាកសពរបស់ជនជាតិចិនដែរ។ លើសពីនេះទៀត គេក៏បានរកឃើញនូវគ្រឿងអលង្ការនៅលើសាកសពផងដែរ ដូចនេះវាបង្ហាញថា វិមាននេះគឺជិតចូលដល់យុគ្គសម័យលោហៈយ៉ាងច្បាស់តែម្ដង ហើយសាកសពដែលកប់នៅទីនោះ មិនមែនជាមនុស្សសាមញ្ញឡើយ ដូចនេះវាក៏បង្ហាញអំពីការចេះបែងចែកថ្នាក់ដឹកនាំ និងឋានៈផ្សេងៗដែរ។ 

វិមាន Stonehenge ត្រូវបានគេសិក្សាឃើញថា វាមានអាយុកាលចន្លោះពី ៤,៤០០-៥,០០០ ឆ្នាំមកហើយ ដោយការសាងសង់នោះអាចចាប់ផ្ដើមពីចន្លោះ ៣,០០០ ទៅ ២,៥០០ ឆ្នាំមុនគ្រឹស្ដសករាជ ដែលថ្មនោះមានសាងសង់រូបរាងជាងរង្វង់ និងប្រើប្រាស់ថ្មចំនួន ២ ប្រភេទគឺ Sarsens និង Bluestones ដែលសំណង់នេះត្រូវបានគេរកឃើញថា មនុស្សមានចំណេះដឹងខាងតារាសាស្ត្រដែលបានស្វែងយល់អំពីព្រះអាទិត្យ ព្រះច័ន្ទ និងតារា ដែលផ្សារភ្ជាប់ជាមួយផែនដីនិងមេឃ ថែមទាំងបានស្គាល់នូវ ឬធ្លាប់ឃើញនូវបាតុភូតសូរគ្រាស និងច័ន្ទគ្រាសទៀតផង។ ជាក់ស្ដែង គេរកឃើញថាថ្ម Sarsen Stone មានចំនួន ៣០ ដុំដែលគុណនឹង ១២ ស្មើរនឹង ៣៦០ ថ្ងៃហាក់ដូចជាកាលបរិច្ឆេទប្រតិទិនដែលមិនទាន់ត្រឹមត្រូវមួយអញ្ចឹង ដែលមនុស្សបុរាណកត់សម្គាល់សិក្សាមើលអំពីរង្វិលជុំរបស់ផែនដី នៅក្នុងប្រព័ន្ធព្រះអាទិត្យ។ 

វិមាន Stonehenge ត្រូវបានគេអភិរក្សទុកជាបេតិកភ័ណ្ឌពិភពលោកតាំងពីសតវត្សទី ២០ មក ដែលជាកន្លែងភស្តុតាងនៃអរិយធម៌មនុស្ស នៅក្នុងយុគ្គសម័យយុគ្គថ្មរំលីង ដែលជាសម័យមនុស្សមិនទាន់ចេះកត់ត្រាប្រវត្តិសាស្ត្រទុកនៅឡើយ ប៉ុន្តែមនុស្សចេះចាប់ផ្ដើមធ្វើកសិកម្មដំបូងបង្អស់។