កាលពីព្រឹកថ្ងៃទី០៨ ខែកញ្ញា ឆ្នាំ២០១៩ កន្លងទៅថ្មីៗនេះ ស្ថិតក្នុងទីតាំងសួនបណ្តុះកូនឈើប្រាសាទតាកែវ បានប្រារព្ធពិធីប្រុងពលី ដើម្បីរុះរើនិងសាងសង់ឡើងវិញនូវរហាត់ទឹកចំណាស់ ដែលជាអត្តសញ្ញាណមួយនៅ ក្នុងខេត្តសៀមរាប និងជាសម្បត្តិដូនតា ដែលបានបន្សល់មកជាច្រើនឆ្នាំកន្លងមក ឱ្យមាំទាំឡើងវិញ ព្រមទាំងរៀបចំសួនច្បារលម្អបន្ថែម ដើម្បីបង្កើននូវភាពទាក់ទាញ ក្រោមជំនួយសប្បុរសធម៌របស់លោកស្រីឧកញ៉ាបណ្ឌិត សៀង ចាន់ហេង អគ្គនាយិកាក្រុមហ៊ុន ហេង អភិវឌ្ឍន៍។

ក្នុងថ្ងៃប្រារព្ធពិធីដ៏នក្ខត្តឫក្ស ដែលមានការអញ្ជើញចូលរួមរបស់លោកស្រីឧកញ៉ាបណ្ឌិត សៀង ចាន់ហេង និង លោក ហង់ ពៅ អគ្គនាយកអាជ្ញាធរជាតិអប្សរា ព្រះតេជគណព្រះសទ្ធម្មប្បកាសនីបណ្ឌិត តាត មហាទី ព្រះចៅអធិកាវត្តព្រះឥន្ទកោសា និងភ្ញៀវកិត្តិយសជាច្រើនផ្សេងទៀត។ ស្ថិតក្នុងឱកាសនោះ លោក ហង់ ពៅ បានកោតសរសើរចំពោះទឹកចិត្តសប្បុរសធម៌ និងការរួមចំណែករបស់លោកស្រីឧកញ៉ាបណ្ឌិត សៀង ចាន់ហេង អគ្គនាយិកាក្រុមហ៊ុន ហេង អភិវឌ្ឍន៍ ដែលបានលះបង់ធនធានផ្ទាល់ខ្លួនមករួមចំណែក ក្នុងកិច្ចការអភិរក្សបេតិកភណ្ឌជាតិ ជាមួយអាជ្ញាធរជាតិអប្សរា ដើម្បីលើកមុខមាត់ ខេត្តសៀមរាប។ សកម្មភាពនេះបានបង្ហាញឱ្យឃើញពីវប្បធម៌នៃសាមគ្គីភាព ការស្រឡាញ់ និងការយល់ដឹងពីសារសំខាន់នៃការថែរក្សាមរតកវប្បធម៌ជាតិ ព្រោះការងារអភិរក្សមិនមែនជាការងារស្នូលរបស់រាជរដ្ឋាភិបាល និងអាជ្ញាធរជាតិអប្សរាទេ តែជាការរួមចំណែកពីកូនខ្មែរគ្រប់រូប គ្រប់មជ្ឈដ្ឋាន គ្រប់វិស័យ ដើម្បីថែរក្សាសម្បត្តិបេតិកភណ្ឌជាតិ និងអន្តរជាតិឱ្យបានគង់វង្សល្អ សម្រាប់កូនចៅជំនាន់ក្រោយ។

ក្នុងឱកាសនោះ លោកអគ្គនាយកបានបញ្ជាក់បន្ថែមដូច្នេះថា “រហាត់ទឹកនេះ គឺជាផ្នែកមួយដ៏សំខាន់ក្នុងការទាញយកទឹកមកស្រោចស្រពកូនឈើក្នុងសួនបណ្តុះកូនឈើប្រាសាទតាកែវ ដើម្បីដាំក្នុងតំបន់អង្គរផង និងចែកជូនដល់អ្នកត្រូវការទូទាំងប្រទេសផង។ ពិសេសរហាត់ទឹក គឺជាផ្នែកមួយដ៏សំខាន់ដែលកាត់បន្ថយផ្សែងពុល ពីក្នុងបរិស្ថានដោយការមិនប្រើម៉ាស៊ីនបូមទឹក មិនបង្កសំឡេងរំខាន និងមិនប៉ះពាល់ដល់សុខភាពមនុស្ស រួមទាំងប្រាសាទនៅក្នុងតំបន់អង្គរតាមរយៈចំហេះឥន្ធនៈ”។ ចំពោះដំណើរការនៃការជួសជុលរហាត់ទឹកនេះវិញ នឹងធ្វើរួចរាល់ត្រឹមរយៈពេល ០៣ខែ ប៉ុណ្ណោះ ដោយប្រើឈើប្រណីត ធានាគុណភាពជាប់មាំបានយូរឆ្នាំ ដោយការជួសជុលទៅតាមបច្ចេកទេសដើម មានកម្រិតស្ដង់ដាត្រឹមត្រូវ ដែលរក្សាបាននូវតម្លៃសិល្បៈពីបុរាណ។ ម្យ៉ាងការសាងសង់ថ្មីឡើងវិញ នេះក៏ដើម្បីបន្សល់ទុកនូវស្នាដៃដល់កូនចៅខ្មែរជំនាន់ក្រោយ និងទេសចរអន្តរជាតិបានឃើញ បានស្គាល់ពីឧបករណ៍ទាញទឹកដែលជាមរតកដូនតាខ្មែរ និងជាអត្តសញ្ញាណមួយរបស់ខេត្តសៀមរាប។ លើសពីនេះ រហាត់ទឹកនេះក៏បានផ្តល់ជាប្រយោជន៍ ក្នុងការទាញយកទឹកពីស្ទឹងទៅស្រោចកូនឈើ ហើយកាត់បន្ថយផលប៉ះពាល់ដល់បរិស្ថានទៀតផង។

រហាត់ទឹកនេះ ត្រូវបានរំពឹងទុកថា ក្រោយពេលបញ្ចប់ការសាងសង់រួចរាល់ជាស្ថាពរ អមដោយសួនច្បារលម្អផងនោះ នឹងអាចទាក់ទាញភ្ញៀវទេសចរជាតិ-អន្តរជាតិឱ្យមកកាន់ទីនេះ និងស្គាល់ទីនេះកាន់តែច្រើនជាងមុនថែមមួយកម្រិតទៀត។ 

ប្រភព៖ អាជ្ញាធរអប្សរា