ភ្នំពេញ៖ ការនាំចេញដំណាំស្រូវអង្កររបស់កម្ពុជា បានកំពុងទទួលបានលទ្ធផលវិជ្ជមាន បើទោះបីជាសកលោកបច្ចុប្បន្ន បានកំពុងទទួលរងការគំរាមកំហែងពីវិរុសកូវិដ ១៩ ក៏ដោយ។ យោងតាមរបាយការណ៍ ចេញផ្សាយរបស់ក្រសួងរុក្ខាប្រមាញ់ និងនេសាទ បានបង្ហាញឱ្យឃើញនូវលទ្ធផលវិជ្ជមាន នៃការនាំចេញដំណាំស្រូវអង្ករ ដែលកើនឡើងខ្ពស់ជាងឆ្នាំ ២០១៩ កន្លងទៅ។

ប្រភពព័ត៌មានរបស់ក្រសួងបានបញ្ជាក់ឱ្យដឹងថា លទ្ធផលនៃការនាំចេញស្រូវអង្ករ ដែលបានឆ្លងកាត់ការត្រួតពិនិត្យភូតគាមអនាម័យ ក្នុងរយៈពេល ៦ខែ នៃឆ្នាំ២០២០ កន្លងទៅនេះសម្រេចបាន ៣៩៧,៦៦០ តោន ជាអត្រាកើនឡើងប្រមាណជា ១១៦,១២២ តោន ស្មើនឹង ៤១,២៥% បើប្រៀបធៀបទៅនឹងរយៈ ៦ខែដើមឆ្នាំ ២០១៩ ដែលមានចំនួន ២៨១,៥៣៨ តោន ។ ប្រភពដដែលបន្តទៀតថា សម្រាប់ខែមិថុនា ឆ្នាំ ២០២០ កន្លងទៅថ្មីៗនេះ ការនាំចេញអង្ករបានកើនឡើង ៤១,៥៦៣ តោន ដែលចំនួននោះស្មើនឹង ៣២,៥១% ដែលកើនឡើងប្រមាណជា ១០,១៩៧ តោន ធៀបទៅនឹងឆ្នាំ ២០១៩ កន្លងទៅ។

ការនាំចេញដំណាំស្រូវអង្កររបស់កម្ពុជា ទៅកាន់ទីផ្សារអន្តរជាតិរួមមាន៖

1. អង្ករក្រអូបគ្រប់ប្រភេទមានចំនួន ៤១,៨៦៤ តោន

2. អង្ករចម្រុះគ្រប់ប្រភេទមានចំនួន ៨,៧៥២ តោន

3. អង្ករចំហ៊ុយមានចំនួន ៩២៤ តោន 

4. និងអង្ករក្រហមមានចំនួន ២៣ តោន 

តាមរយៈការនាំចេញអង្ករទៅបរទេសនេះ ក្រសួងបានបញ្ជាក់ថា ប្រទេសដែលបានបញ្ជាទិញពីកម្ពុជា ក្នុងរយៈពេល ៦ ខែដំបូងកន្លងទៅមានចំនួនសរុប ៥៦ ប្រទេសដូចជា សហរដ្ឋអាមេរិក ប្រទេសនៅទ្វីបអឺរ៉ុបសរុប ២៤ ប្រទេស, ប្រទេសចិន, ប្រទេសជាសមាជិកអាស៊ានចំនួន ៦ និងទ្វីបផ្សេងៗទៀតចំនួន ២៥ ប្រទេស ដោយការនាំចេញនោះ មានក្រុមហ៊ុនចំនួន ៥ ក្នុងចំណោម ៦៦ ក្រុមហ៊ុន បាននាំចេញអង្ករទៅក្រៅប្រទេសច្រើនជាងគេ។

ក្រសួងបានបញ្ជាក់ថា ការនាំចេញអង្កររបស់កម្ពុជាក្នុងរយៈពេល ៦ខែ នៃឆ្នាំ២០២០ គឺមានកំណើននៅគ្រប់គោលដៅនាំចេញទាំងអស់សម្រាប់ទីផ្សាររបស់ សហភាពអ៊ឺរ៉ុបកើនឡើងចំនួន ៤៥,១៩%, ប្រទេសចិនកើនចំនួន ២៥,២០%, បណ្តាប្រទេសសមាជិកអាស៊ានកើនចំនួន ៤៧,៦៩%, និងគោលដៅដ៏ទៃទៀតបានកើនឡើងចំនួន ៧៩,២៦%៕

ប្រភព៖ ក្រសួងរុក្ខាប្រមាញ់ និងនេសាទ