ទីស្នាក់ការកណ្តាលរបស់ក្រុមហ៊ុន Apple ដែលជាទីចាប់អារម្មណ៍បំផុតនៅក្នុងពិភពលោកនោះ ត្រូវបានគេចាត់ទុកជាអាគារដែលមានតម្លៃថ្លៃបំផុតមួយ នៅក្នុងផែនដីនេះ។ វាមានទីតាំងនៅក្នុងរដ្ឋកាលីហ្វរញ៉ា សហរដ្ឋអាមេរិច។
បើតាមការវាយតម្លៃថ្មី ដោយក្រុមហ៊ុនអចលនទ្រព្យ Santa Clara បានឲ្យដឹងថាទីស្នាក់ការកណ្តាលមានរាងជារង្វង់នេះ មានតម្លៃដល់ទៅ 3.6 ពាន់លានដុល្លារឯណោះ ដោយផ្អែកតាមការវាយតម្លៃលម្អិតនៃអាគារ។ ប៉ុន្តែបើសរុបទាំងគ្រឿងបរិក្ខារនៅក្នុងនោះទៀត វាអាចនឹងមានតម្លៃសរុបដល់ទៅ 4.17 ពាន់លានដុល្លារ។
គ្រឿងបរិក្ខារចាំបាច់នៅផ្នែកជាន់ផ្ទាល់ដី នៃអាគារនោះគឺជា បណ្តុំនៃកុំព្យូទ័រ និងគ្រឿងសង្ហារឹម ដែលមានដូចជាតុកុំព្យូទ័រ កៅអីប្រណិតៗជាច្រើន ដែលបានជ្រើសរើសដោយលោក Jony Ive។ ពន្ធអចលនទ្រព្យគិតត្រឹមតែ 1% ទេក្នុងមួយឆ្នាំ ដែល Apple ត្រូវចំណាយប្រមាណ 40 លានដុល្លារឯណោះ សម្រាប់ពន្ធនេះ។ ទោះបីជាយ៉ាងណាក៏ដោយ បើតាមរបាយការណ៍ពីក្រុមហ៊ុននេះ បានឲ្យដឹងថា Apple បានកំពុងតែរៀបចំការតវ៉ា ជាមួយនឹងរាជរដ្ឋាភិបាលក្នុងការសម្រាលពន្ធ ឲ្យបានធូរស្រាលនិងចំណាយតិចជាងមុន។
អាគារទីស្នាក់ការកណ្តាលរបស់ Apple នេះត្រូវបានគេចាត់ទុកថា ជាអាគារដែលបង់ពន្ធច្រើនបំផុតជាង អាគារនានាទាំងអស់នៃសហរដ្ឋអាមេរិច ទៅក្នុងក្រុមហ៊ុនពន្ធ Santa Clara ដែលចាប់ពីពាក់កណ្តាលឆ្នាំ 2017-2018 ចំណាយដល់ទៅ 56 លានដុល្លារឯណោះទៅលើពន្ធ និងបន្តកើនឡើងទៀតសម្រាប់ឆ្នាំ 2019 នេះ។
សម្រាប់ការរង្វាយតម្លៃនៅក្នុងប្រភពសំណង់ស្ថាបត្យកម្មនៅក្នុងពិភពលោក បានចាត់ទុកថា “អាគារទីស្នាក់ការកណ្តាលរបស់ Apple ត្រូវបានគេចាត់ទុកជាអាគារដែលមានតម្លៃបំផុតនៅក្នុងដែនផែនដីនេះ” ទោះបីជាវាមានកម្ពស់ត្រឹមតែជាង 4 ជាន់តិចតួចក៏ដោយ។
មិនមែនមានតែ Apple Park មួយទេដែលត្រូវបានសាងសង់មក មានតម្លៃថ្លៃនោះ ប៉ុន្តែបើយោងតាមប្រភពនៃសារព័ត៌មានរបស់ញូវយ៉ក និងញូវជើស៊ី បានឲ្យដឹងថាអាគារដែលខ្ពស់ជាងគេនៅសហរដ្ឋអាមេរិច (1,776 ហ្វីត) មានទីតាំងស្ថិតនៅមជ្ឈមណ្ឌលពាណិជ្ជកម្មពិភពលោក នៅក្នុងទីក្រុងញូវយ៉ក មានតម្លៃដល់ទៅ 3.9 ពាន់លានដុល្លារ និងនៅរមណីយដ្ឋាន Marina Bay Sands របស់សាំងហ្គារពួរ មានតម្លៃដល់ទៅ 5 ពាន់លានដុល្លារឯណោះ ខណៈដែលរោងចក្រនុយក្លេអ៊ែ Olkiluito 3 របស់ប្រទេសហ្វាំងឡង់មានតម្លៃលើសពី 6 ពាន់លានដុល្លារ គ្រាន់តែតម្លៃពន្ធរបស់អាគារទាំងនោះ មិនខ្ពស់ដូច Apple Park ឡើយ។
ដូចនេះ ជារួមយើងអាចសរុបបានថា Apple នៅតែជាក្រុមហ៊ុនយក្សធំបំផុតមួយ ដែលមិនមែនត្រឹមតែធំនៅក្នុងសហរដ្ឋអាមេរិចទេ ប៉ុន្តែក៏មានអាគារទីស្នាក់ការថ្លៃ និងមានតម្លៃបំផុតនៅក្នុងពិភពលោកផងដែរ ដែលយើងពិតជាមិនអាចបដិសេធបាន។ ដូចនេះកុំឆ្ងល់ច្រើនអី ក្រៅពីបច្ចេកវិទ្យាទំនើប និងធាតុផ្សំមួយចំនួន ហេតុអ្វីបានជាផលិតផលរបស់ Apple មានតម្លៃថ្លៃម៉្លេះ?