ភ្នំពេញ៖ បើយោងតាមរបាយការណ៍ ដែលចេញផ្សាយដោយ សហព័ន្ធស្រូវអង្ករកម្ពុជា នាពេលថ្មីៗនេះ បានឱ្យដឹងថា កម្ពុជាបាននាំចេញអង្ករចំនួន ៥២៩ ៩២៤ តោន ក្នុងរយៈពេល ១០ខែដំបូង នៃឆ្នាំ២០២៣ ដោយទទួលបាន ប្រាក់ចំណូលសរុបចំនួន ៣៧៧,៥ លានដុល្លារ។

ក្នុងរបាយការណ៍ព័ត៌មានដដែលនេះ បានបន្តឲ្យដឹងថា “រយៈពេល១០ខែដំបូង ការនាំចេញអង្កររបស់កម្ពុជា សម្រេចបាន ៧៦% នៃចំនួន ៧០ម៉ឺនតោន ដែលគ្រោងទុកសម្រាប់ឆ្នាំ ២០២៣។”

គូសសម្គាល់ដែរថា ក្នុងអំឡុងពីខែមករាដល់ខែតុលាឆ្នាំនេះ កម្ពុជាបាននាំចេញ អង្ករទៅកាន់ប្រទេស និងតំបន់ចំនួន៥៩ ដោយប្រទេសចិន នៅតែជាអ្នកទិញអង្ករនាំមុខគេ របស់កម្ពុជា។

បន្ថែមពីនេះ ក្នុងរបាយការណ៍ព័ត៌មានដដែល ក៏បានបញ្ជាក់ដែរថា កម្ពុជាបាននាំចេញអង្ករចំនួន ១៧៧ ២៨៥តោន ទៅកាន់ប្រទេសចិន ក្នុងអំឡុងពេលដែលបាន រៀបរាប់ខាងលើ ដោយទទួលបាន ប្រាក់ចំណូលសរុបចំនួន ១១៥,៣ លានដុល្លារ។ សម្រាប់ប្រភេទអង្ករ ដែលប្រទេសនាំចេញមានដូចជា អង្ករសែនក្រអូប អង្ករសរីរាង្គ អង្ករស អង្ករសំរូប និងអង្ករជប៉ុន ជាដើម។