ភ្នំពេញ៖ ក្នុងរយៈពេលបីខែដំបូងនៃឆ្នាំ ២០២៤នេះ កម្ពុជាបាននាំចេញអង្ករចំនួន ១៦៦ ៤៥១ តោន ទៅកាន់ទីផ្សារអន្តរជាតិ ថយចុះបន្តិចពីចំនួន ១៧៦ ៥៨១ តោន ក្នុងរយៈពេលដូចគ្នា កាលពីឆ្នាំមុន នេះបើយោងតាមរបាយការណ៍របស់ សហព័ន្ធស្រូវអង្ករកម្ពុជា ដែលបានបង្ហាញឲ្យដឹងនាពេលថ្មីៗនេះ។

ជាក់ស្តែង ក្នុងរយៈពេលនៃត្រីមាសទី១ នេះដែរ កម្ពុជារកចំណូលបានជិត ១២៣,៦ លានដុល្លារ ពីការនាំចេញអង្ករក្នុងអំឡុង ខែមករាដល់ខែមីនា ធ្លាក់ចុះ ១,៩% ពី ១២៦លានដុល្លារ បើធៀបនឹងឆ្នាំមុន។

ក្នុងនោះដែរ ប្រភេទអង្ករដែលបាន នាំចេញរួមមាន អង្ករក្រអូប អង្ករសគ្រាប់វែង អង្ករចំហុយ និងអង្ករសរីរាង្គ ដោយអង្ករក្រអូបមានចំនួន ៨១% នៃការនាំចេញអង្ករសរុប។

ប្រភពដដែលនេះ បានឱ្យដឹងទៀតដែរថា អង្ករកម្ពុជាត្រូវបាន នាំចេញទៅកាន់ប្រទេស និងតំបន់ចំនួន ៥៦ ជុំវិញពិភពលោកពី ក្រុមហ៊ុននាំចេញចំនួន ៤៦ ដោយបន្ថែមថា ប្រទេសទិញអង្ករសំខាន់ៗ របស់កម្ពុជារួមមាន សហភាពអឺរ៉ុប ប្រទេសចិន និងប្រទេសសមាជិកអាស៊ាន ជាដើម។

យ៉ាងណា ប្រទេសចិននៅតែជា អ្នកទិញអង្ករនាំមុខគេរបស់កម្ពុជា ដោយបានទិញអង្ករចំនួន ៤៣ ០៣៩ តោន ឬ ២៥,៨% នៃការនាំចេញអង្ករសរុប របស់កម្ពុជា នៅក្នុងត្រីមាសទីមួយនេះ។

ស្របគ្នានេះដែរ កម្ពុជារកចំណូលបានប្រមាណ ៦០០ លានដុល្លារ ពីការនាំចេញស្រូវជាង ២,២២ លានតោន ក្នុងរយៈពេលបីខែ ដូចគ្នា។

គួររម្លឹកថា ក្នុងឆ្នាំ២០២៣ កម្ពុជាបាននាំចេញអង្ករជាង ៦៥៦ ០០០តោន ដោយរកចំណូលបាន ៤៦៦លានដុល្លារ កើនឡើង ៣% ក្នុងបរិមាណ និង ១៣% ជាតម្លៃ បើធៀបនឹងឆ្នាំ២០២២។

បើតាមគម្រោងដែលបានកំណត់ គឺសហព័ន្ធស្រូវអង្ករកម្ពុជា បានរៀបចំផែនការ ក្នុងការនាំចេញអង្ករឱ្យបាន យ៉ាងហោចណាស់ មួយលានតោននៅឆ្នាំ ២០២៥ ខាងមុខនេះ។