មិនមែនសុទ្ធតែមនុស្សគ្រប់គ្នា អាចត្រូវបានជ្រើសរើស ក្លាយជាថ្នាក់ដឹកនាំនោះទេ អ្នកខ្លះមានបុគ្គលិកលក្ខណៈ និងអត្តចរិកជាអ្នកដឹកនាំផុសពីក្នុងខ្លួនតែម្តង អ្នកខ្លះទៀតក៏ត្រូវបន្តវេនក្នុងឋានៈនេះ​ តពីគ្រួសាររបស់ពួកគាត់ និងអ្នកខ្លះទៀតក៏ត្រូវបានជ្រើសរើសក្លាយជាអ្នកដឹកនាំ ដោយយោងទៅតាមបទពិសោធន៍ដែលគាត់មាន។

មេដឹកនាំ ក៏ដូច្នោះដែរ អ្នកខ្លះបំពេញកាតព្វកិច្ច និងតួនាទីរបស់គាត់បានល្អ ខ្លះទៀតភាគច្រើនតែងតែប្រកាន់ខ្ជាប់នូវពាក្យថា “រវល់, គ្មានពេលគ្រប់គ្រាន់”​ ឲ្យតម្លៃទៅលើពេលវេលារបស់ខ្លួនជ្រុល រហូតដល់មើលមិនឃើញតម្លៃ នៃពេលវេលា របស់អ្នកដទៃ ឬអ្នកដែលនៅធ្វើការជុំវិញខ្លួន។ ភាគច្រើនពួកគាត់​​ ចំណាយពេលគិតតែពីការអភិវឌ្ឍន៍ខ្លួនឯង រហូតដល់មិនរវល់ជាមួយនឹង តម្រូវការបន្ថែមរបស់ក្រុមហ៊ុន ឬអាជីវកម្ម និងសុខទុក្ខ បុគ្គលិករបស់គាត់ឡើយ។

ទាំងនេះ ជាឧទាហរណ៍ជាក់ស្តែង 7 យ៉ាង ដែលមេដឹកនាំភាគច្រើន ពុំបានធ្វើ និងសឹងតែគ្មាននៅក្នុងផ្នត់គំនិតរបស់គាត់ៈ

1.ពួកគាត់គ្មានពេលគ្រប់គ្រាន់ សម្រាប់ការផ្តល់ និងទទួល Feedback.

ចំណុចនេះ វាគឺជាចំណុចសំខាន់បំផុតមួយ ក្នុងផ្នែកដឹកនាំ។ Feedback ទាំងនោះអាចបង្ហាញពីចំណុចខ្សោយ និងបញ្ហាក្នុងក្រុមហ៊ុន ឬអាជីវកម្ម, ការតម្រង់ទិសសម្រាប់ដំណើរនៃការអភិវឌ្ឍជារួម ឬជាការរិះគន់ក្នុងន័យស្ថាបនាជាដើម។ ចំណុចទាំងអស់នេះ អាចនឹងដឹកនាំទិសដៅឆ្ពោះទៅរកភាពរីកចម្រើនជាបន្តទៀត ការរិះរកដំណោះស្រាយជុំគ្នា ការសម្អាតការគិតអវិជ្ជមានរបស់បុគ្គលនីមួយៗជាដើម។  បើសិនជាមេដឹកនាំម្នាក់ រវល់ហួស រហូតដល់ពុំបានគិត និងអនុវត្តពីចំណុចនេះជាប្រចាំ តម្លៃនៃការដឹកនាំរបស់គាត់នឹងធ្លាក់ចុះ ឆ្ពោះទៅរកភាពបរាជ័យក្នុងរយៈពេលមួយយ៉ាងខ្លី។ Feedback មួយអាចរាប់ជា Feedback ល្អច្បាស់លាស់ លុះត្រាតែអ្នក ត្រូវធ្វើវានៅក្នុងទម្រង់ៈ

• ធ្វើវាឲ្យធម្មតា សាមញ្ញ និងចៀសវាងពីការច្របល់នៃព័ត៌មានច្រើនបញ្ចូលគ្នា
• ធ្វើឲ្យចំៗ ច្បាស់លាស់ តាមប្រភេទ និងមានបង្ហាញពីឧទាហរណ៍បញ្ជាក់
• ពិពណ៌នាពីមូលហេតុ ដែលបង្កើតជាបញ្ហា ផ្តោតលើសកម្មភាពជាក់ស្តែង មិនត្រូវនិយាយចំៗទៅលើសមាជិកក្រុមឡើយ
• ត្រូវច្បាស់ថា ភាគីទាំងអស់ យល់ពី Feedback ដែលបានលើកឡើង ហើយក៏យល់ស្របពីវាដែរ
• បើកចំហរ សម្រាប់ការពិភាក្សាគ្រប់បែបយ៉ាងពីគ្រប់គ្នា

2.ពួកគាត់រវល់ រហូតគ្មានពេល ចង់ឲ្យបុគ្គលិករបស់គាត់ បណ្តុះជំនាញនិងកាន់តែពូកែនូវអ្វីដែលពួកគេមាន

ពាក្យថា មេដឹកនាំ គឺពួកគាត់មិនមែនជាអ្នកដែលបំពេញការងារ ទៅលើផ្នែកណាមួយឡើយ គឺគាត់ពឹងផ្អែកទៅលើបុគ្គលិកដែលមានជំនាញច្បាស់លាស់ ធ្វើការងារទៅតាមតម្រូវការផ្សេងៗដែលក្រុមហ៊ុនរបស់គាត់ត្រូវការ។ ប៉ុន្តែបើសិនជាពួកគាត់ពុំមានពេលគ្រប់គ្រាន់ ក្នុងការត្រួតពិនិត្យការងារបុគ្គលិករបស់គាត់ទៅតាមផ្នែក លើកទឹកចិត្តពួកគេ ក្នុងការបំពេញតួនាទីឲ្យបានល្អ នោះយូរៗទៅ បុគ្គលិកនឹងបាក់ទឹកចិត្ត ធ្វើការខ្ជីខ្ជា ពុំបានត្រឹមត្រូវ នឹងនាំការខាតបង់ធ្ងន់ធ្ងរដល់គាត់។ ផ្ទុយទៅវិញ បើសិនជាគាត់ មានពេលនឹងចូលរួមក្នុងចំណុចនេះបានល្អ បុគ្គលិកទៅតាមផ្នែករបស់គាត់ នឹងកាន់តែរីកចម្រើន ជំនាញដែលពួកគេ មាននឹងកាន់ខ្លាំង ទំនុកចិត្តដែលទទួលបាននឹងកាន់តែខ្ពស់ ពេលវេលាក្នុងការធ្វើការក៏បានកាន់តែលឿនផងដែរ។

3.ពួកគាត់ រវល់រហូតគ្មានពេលនឹង ផ្តល់ឲ្យបុគ្គលិករបស់គាត់ ក្នុងការបង្ហាញផ្លូវពួកគេយល់ពីតម្លៃ និងគោលដៅរៀងៗខ្លួននៃការងាររបស់ពួកគេ

ចំណុចនេះក៏ជាចំណុចសំខាន់ដែរ ព្រោះមានតែថ្នាក់ដឹកនាំប៉ុណ្ណោះដែលអាចតម្រង់ទិស និងពន្យល់ពីតម្លៃនៃការងារជូនទៅដល់បុគ្គលិកទៅតាមផ្នែក។ ធ្វើអ្វីក៏ដោយ គឺត្រូវមានគោលដៅច្បាស់លាស់ ប៉ុន្តែបើសិនមេដឹកនាំ​ រវល់និងគ្មានពេលគ្រប់គ្រាន់សម្រាប់ផ្តល់គោលដៅនេះទេ បុគ្គលិកទាំងអស់ នឹងមិនយល់ពីតម្លៃ និងគោលដៅនៃការងាររបស់ពួកគេឡើយ។ ពួកគេធ្វើការទាំងមិនមានអារម្មណ៍នៅក្នុងខ្លួន និងមិនអាចប្រើប្រាស់ជំនាញដែលពួកគេមានអស់ពីសមត្ថភាព ព្រោះពួកគេធ្វើការ ចង់ឲ្យត្រឹមមួយចប់ៗ និងសម្រាប់តែចង់បានប្រាក់ខែប៉ុណ្ណោះ ដែលលទ្ធផលការងារដែលទទួលបាន នឹងគ្មានគុណភាព។

4.ពួកគាត់ រវល់ជ្រុលរហូត គ្មានពេលភ្ជាប់ទំនាក់ទំនងល្អ ជាមួយនឹងបុគ្គលិករបស់គាត់

អ្នកដឹកនាំល្អ តែងតែផ្តល់ទំនាក់ទំនងល្អជាមួយនឹងមនុស្សជុំវិញខ្លួន ជាពិសេសអ្នកដែលធ្វើការជាមួយគាត់ផ្ទាល់។ គាត់តែងតែផ្តល់តម្លៃ ចែករំលែកការដឹកនាំ និងចូលរួមរាល់ការសម្រចចិត្តទាំងអស់ ធ្វើឡើងដោយបុគ្គលិកគាត់ផ្ទាល់។ បន្ថែមពីនេះ អ្នកដឹកនាំល្អ តែងតែបង្កើតនូវបរិស្ថានល្អសម្រាប់អ្នកធ្វើការជាមួយគាត់ មិនរត់ចោលគ្នា ឆ្លងកាត់រឿងលំបាកៗជាមួយគ្នា ធ្វើយ៉ាងណា ឲ្យអ្នកនៅក្រោមបង្គាប់មានអារម្មណ៍ថាមានសុវត្ថិភាព ក្នុងការលើកឡើងនូវគំនិតថ្មីៗ ភ្ជាប់ទំនាក់ទំនងយ៉ាងបើកចំហរទៅកាន់គំនិតរបស់ពួកគេ និងបង្កើតបានជាមតិមួយជារួម។ ព្រោះតែគ្រប់យ៉ាង នឹងក្លាយជា “ទំនុកចិត្ត” រវាងគ្នានឹងគ្នា មិនមែនជា “ការភ័យខ្លាច” នៃសម្ពន្ធភាពរវាង មេ និង កូនចៅឡើយ។

5.ពួកគាត់ គ្មានពេល ក្នុងការ ធ្វើចំណាត់ថ្នាក់ និងសម្គាល់ពីការងាររបស់បុគ្គលិកគាត់

គ្មានអ្នកណាម្នាក់ មានជំនាញដូចគ្នា ឬអាចពូកែគ្រប់គ្នាឡើយ។ អ្នកពូកែត្រូវការ ការសរសើរ និងលើកទឹកចិត្ត អ្នកខ្សោយត្រូវការ ការណែនាំ និងការលើកទឹកចិត្តដូចគ្នា។ នេះជាអ្វីដែលមេដឹកនាំត្រូវធ្វើ។ ម៉្យាងទៀត មេដឹកនាំដែលល្អ ពួកគាត់អាចស្គាល់ពីបុគ្គលិករបស់ពួកគាត់ច្បាស់។ បុគ្គលិក ដែលត្រូវបានទទួលស្គាល់ថាជាបុគ្គលិកគម្រូ គឺត្រូវយោងទៅតាមអ្វីដែលពួកគេបានធ្វើដូចជាៈ

• បង្កើនចំនួនការងារ និងផ្តល់លទ្ធផលបានច្រើន
• បង្កើនទំនាក់ទំនងល្អ នៅក្នុងក្រុម
• ស្រឡាញ់ការងារ និងធ្វើការអស់ពីសមត្ថភាព
• ទទួលបានទំនុកចិត្តពីអតិថិជន ដៃគូទំនាក់ទំនង និងអ្នករួមការងារជាមួយ
• មានកំណត់ត្រាល្អពីក្រុមហ៊ុន ក្នុងការបំពេញការងារបានល្អ និងមានកំហុសតិចតួចបំផុត

6.អ្នកដឹកនាំ ដែលគ្មានពេលគ្រប់គ្រាន់ ក្នុងការហាត់ពត់ពីការគ្រប់គ្រងអារម្មណ៍ខ្លួន និងការអត់ធ្មត់

គ្មានអ្នកណាម្នាក់ ចង់ទទួលការស្តីបន្ទោសពីអ្វីមួយឡើយ ជាពិសេសទៅលើទំនួលខុសត្រូវរបស់ខ្លួន។ បើសិនជាថ្នាក់ដឹកនាំពុំមានពេលគ្រប់គ្រាន់ក្នុងការហ្វឹកហាត់ខ សម្រាប់គ្រប់គ្រងអារម្មណ៍ខ្លួនឯងបានល្អនោះទេ ពួកគាត់នឹងឆេវឆាវខ្លាំង ព្រោះពួកគាត់ជួបរឿង និងបញ្ហាច្រើនដែលត្រូវដោះស្រាយជាប្រចាំ។ គាត់អាចនឹងប្រើពាក្យសម្តី មិនសមរម្យទៅកាន់អ្នកធ្វើការជាមួយគាត់ ដែលអាច​ប៉ះពាល់សតិអារម្មណ៍ធ្ងន់ធ្ងរ ដែលក្រុមហ៊ុននឹងឈានទៅដល់ការបាត់បង់ បុគ្គលិកល្អៗជាច្រើន។ មេដឹកនាំល្អ ចេះគ្រប់គ្រងខ្លួនឯងបានល្អ ប្រើភាសាក្នុងការនិយាយស្តីថ្លៃថ្នូរ និងភាគច្រើន ភ្ជាប់ជាមួយនឹងការលើកទឹកចិត្ត ដល់បុគ្គលិកនៅក្រោមបង្គាប់។

7.ពួកគាត់គ្មានពេល នឹងខ្វល់ពីសម្តី ឬការបកស្រាយរបស់អ្នកដទៃ

ដូចដែលបានលើកឡើងពីខាងដើមដែរ ភាគច្រើនអ្នកដឹកនាំ​មិនចូលចិត្តស្តាប់សម្តីអ្នកដទៃ រឹតតែមិនខ្វល់ពីគំនិតរបស់អ្នកដែលនៅជុំវិញខ្លួនលើកឡើង។ ពួកគាត់តែងតែយល់ថា គាត់ជាអ្នកធំជាងគេ ខ្លាំងជាងគេ​ ឆ្លាតជាងគេ ហើយអ្វីដែលគាត់ធ្វើគឺត្រឹមត្រូវគ្រប់គ្រាន់។ ពួកគាត់មិនចេះខុសឡើយ ហើយបើសិនជាមានគំនិតលើកឡើងផ្ទុយពីអ្វីដែលគាត់បានគិត មានន័យថាប្រឆាំងនឹងគាត់។

ដូចនេះបើសិន ជាអ្នកយល់ថា អ្នកពុំដែលបានធ្វើរឿងទាំង 7 យ៉ាងនេះ ជាមួយអ្នកនៅក្រោមបង្គាប់របស់អ្នកទេ អ្នកគួរតែប្តូរទម្លាប់នៃការដឹកនាំរបស់អ្នកហើយ។ អ្នកដឹកនាំល្អ ត្រូវអនុវត្ត និងមានពេលគ្រប់គ្រាន់សម្រាប់ចំណុចទាំង 7 នេះ។​ អ្នកដឹកនាំល្អ ជាអ្នកដែលចូលចិត្តផ្តល់ និងទទួល Feedback, ជាអ្នកជម្រុញនិងលើកទឹកចិត្ត, ជាអ្នកបង្ហាញគោលដៅ, ជាអ្នកដែលមានទំនាក់ទំនងល្អជាមួយមនុស្សជុំវិញខ្លួន, ជាអ្នកស្គាល់ខុស និងត្រូវ, ជាមនុស្សអត់ធ្មត់ និងជាមនុស្សមានហេតុផល ចូលចិត្តស្តាប់គំនិតល្អៗរបស់អ្នកដទៃ។ ចុះសម្រាប់ខ្លួនអ្នកវិញ អ្នកអាចរាប់បញ្ចូលខ្លួនអ្នក ជាមេដឹកនាំល្អទេ? ចុះអ្នកចូលចិត្ត ចៅហ្វាយរបស់អ្នក និងការដឹកនាំរបស់គាត់ដែរទេ?