ត្បូងឃ្មុំ ធ្លាប់តែជាតំបន់ស្ងប់ស្ងាត់ ជាតំបន់ព្រៃ និងជាចំការកសិកម្ម បានប្រែក្លាយទៅជាខេត្តថ្មីមួយ ហើយក៏ក្លាយជា គោលដៅទេសចរណ៍ថ្មីមួយ នៅប្រទេសកម្ពុជាផងដែរ ជាពិសេសនៅអំឡុង ថ្ងៃឈប់សម្រាក និងឱកាសបុណ្យទាននានា។ ជាក់ស្ដែង នៅអំឡុងថ្ងៃឈប់សម្រាក ព្រះរាជពិធីបុណ្យអុំទូក លយប្រទីប អកអំបុក សំពះព្រះខែ ឆ្នាំ២០២២ ខេត្តត្បូងឃ្មុំ បានស្វាគមន៍ភ្ញៀវទេសចរ មកកម្សាន្ដរហូតដល់ ២៣ ម៉ឺននាក់។

លោក អឿន រឹទ្ធ ប្រធានមន្ទីរទេសចរណ៍ ខេត្តត្បូងឃ្មុំ បានលើកឡើងថា ក្នុងឱកាសថ្ងៃឈប់សម្រាក រយៈពេល ៣ ថ្ងៃចាប់ពីថ្ងៃទី ៧-៨-៩ ខែវិច្ឆិកា ឆ្នាំ២០២២ រដ្ឋបាលខេត្តត្បូងឃ្មុំ បានរៀងចំពិធីបុណ្យអុំទូក អកអំបុក លយប្រទីប នៅរមណីយដ្ឋាន ហ្លួងព្រះស្តេចកន ដែលបានទាក់ទាញនូវ ភ្ញៀវទេសចរជាតិសរុប ប្រមាណ ២៣៣.៩៨៦ នាក់ ស្មើនឹងអត្រាកើនឡើងជាង ៦ ពាន់ភាគរយ និងមានភ្ញៀវទេសចរបរទេស ៩ នាក់ផងដែរ។

ក្រៅពីការរៀបចំពិធីបុណ្យអុំទូក នៅរមណីយដ្ឋានហ្លួងព្រះស្តេចកន នៅឯរដ្ឋបាលខេត្តត្បូងឃ្មុំ ក៏មានការរៀបចំ តាំងពិព័រណ៌ភូមិ ១ ផលិតផល ១ ការប្រគុំតន្ត្រីខ្នាតធំ ពីក្រុមហ៊ុនឯកជន និងការបាញ់កាំជ្រួច ដែលបានទាក់ទាញ ភ្ញៀវទេសចរក្នុងខេត្ត និងតាមតំបន់ផ្សេងៗ មកកម្សាន្ដក្នុងឱកាសនោះផងដែរ។

លោកប្រធានមន្ទីរទេសចរណ៍ ខេត្តត្បូងឃ្មុំបានបញ្ជាក់ថា ទោះជាជំងឺឆ្លងកូវីដ-១៩ ក្នុងប្រទេសកម្ពុជា មានកម្រិតទាបក៏ដោយ ប៉ុន្តែក៏ភ្លេចនូវវិធានការណ៍ របស់រាជរដ្ឋាភិបាល ៣ កុំ ៣ ការពារ និងពង្រឹងវិធាន សុវត្ថិភាពទេសចរណ៍ និងនីតិវិធីស្ដង់ដារ ប្រតិបត្តិអប្បរមា (SOP) ជាពិសេសគឺការថែរក្សាបរិស្ថាន សេវាកម្ម និងតម្លៃ ស្របទៅតាមពាក្យស្លោក «ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ» នៅតាមកន្លែងកម្សាន្ដ និងរមណីយដ្ឋានទាំងអស់។