អារ៉ាប់ ត្រៀមបញ្ជូនអាវកាសយានិក ទៅកាន់ស្ថានអាវកាសជាលើកដំបូង ជាការបំបែកកំណត់ត្រាថ្មី

អារ៉ាប់ ដែលជាប្រទេសមហាសេដ្ឋី ហើយក៏ជាស្ដេចប្រេងខ្នាតយក្ស ដែលផ្គត់ផ្គង់ទៅដល់គ្រប់ផ្នែកក្នុងពិភពលោក ត្រៀមបំបែកកំណត់ត្រាប្រវត្តិសាស្ត្ររបស់ខ្លួនថ្មី ជុំវិញការនាំយកបុរសដំបូងរបស់ខ្លួន ទៅកាន់ស្ថានអាវកាស ដែលនឹងធ្វើឡើងក្នុងពេលឆាប់ៗខាងមុខនេះ ដោយមានការចូលរួមពីអាវកាសយានិក ២ នាកផ្សេងទៀតជាជនជាតិរុហ្ស៊ីលោក Oleg Skripochka និងអាវកាសយានិករបស់ NASA លោកស្រី Jessica Meir។

អាវកាសយានិកលោក Mansoori នឹងក្លាយជាបុរសដំបូងរបស់អារ៉ាប់ ក្នុងការបំបែកកំណត់ត្រាជាលើកដំបូង ក្នុងប្រវត្តិសាស្ត្ររបស់ប្រទេសអារ៉ាប់ ជុំវិញវត្តមាននៅក្នុងស្ថានអាវកាស ដែលមានការគាំទ្រយ៉ាងច្រើនពីសំណាក់ប្រជាជនអារ៉ាប់ និងមហាជនផ្សេងទៀត​ទូទាំងពិភពលោក។ ឈ្មោះពេញ Hazza Al-Mansoori អាយុ ៣៥ ឆ្នាំ​នឹង នឹងសម្រេចនូវបេសកកម្មក្នុងក្ដីស្រម៉ៃរបស់ខ្លួន នៅក្នុងពេលឆាប់ៗនេះ តាមរយៈគ្រាប់រ៉ាកែត (Rocket) Soyuz ចេញពីតំបន់ Baikonur នៅថ្ងៃពុធ ដែលនឹងចំនាយពេល ៨ ថ្ងៃនៅឯស្ថានីយ៍អាវកាសអន្តរជាតិហៅកាត់ថា ISS ក្នុងការសិក្សា និងបំពេញបេសកកម្មរបស់ខ្លួន។ លោក Mansoori បានប្រាប់អំពីចំណាប់អារម្មណ៍ផ្ទាល់ខ្លួនដូច្នេះថា “វាពិតជាមានកិត្តិយសខ្លាំងណាស់ ហើយខ្ញុំទន្ទឹងរង់ចាំ ការបំពេញបេសកកម្មមួយនេះ ឲ្យទទួលបានជោគជ័យ និងត្រឡប់មកវិញជាមួយនឹងចំនេះដឹងកាន់តែច្រើន”។

ក្រៅពីបេសកកម្មដ៏សំខាន់ និងជាក្ដីស្រម៉ៃមួយនេះ លោកនឹងនាំយកនូវអាហារ ក៏ដូចជាធ្វើតេស្ដដកបទពិសោធន៍ជាច្រើននៅស្ថានអាវកាស ជាមួយនឹងការរំពឹងទុកថា នឹងមានផលវិជ្ជមាន និងផ្ដល់នូវផលប្រយោជន៍ជាច្រើន នៅពេលលោកត្រឡង់មកផែនដីវិញ។ បេសកកម្ម អាវកាសលើកដំបូងរបស់ អារ៉ាប់មួយនេះ ត្រូវបានឲ្យដឹងថា នឹងមានការចូលរួមពីសំណាក់អ្នកវិទ្យាសាស្ត្រ ដែលជាអាវកាសយានិកចំនួន ៦ នាក់ផ្សេងទៀត ដែលរង់ចាំពួកគេទាំង ៣ នៅឯស្ថានីយ៍អាវកាស​ ISS មុននឹងការវិលត្រឡប់មកផែនដីវិញនៅថ្ងៃទី០៣ ខែតុលាខាងមុខ ខណៈអាវកាសយានិក ២ នាក់ផ្សងទៀត នឹងបន្តនៅលើនេះ​រហូតដល់ឆ្នាំ ២០២០ ទើបត្រឡប់មកភពផែនដីវិញ។

ការនាំយកបុរសដំបូងរបស់អារ៉ាប់ ទៅកាន់ស្ថានអាវកាស គឺជាជោគជ័យធំមួយ ក្នុងការបំបែកកំណត់ត្រា​ ហើយវាក៏ជាចក្ខុវិស័យដ៏សំខាន់មួយក្នុងការសិក្សា ក៏ដូចជាទទួលបាននូវព័ត៌មានសំខាន់ៗ ដើម្បីជម្រុញឲ្យវិស័យអប់រំ បែបវិទ្យាសាស្ត្រ មានការរីកចំរើន និងត្រៀមឲ្យអ្នកការហោះហើរទៅស្ថានអាវកាសជាច្រើនផ្សេងទៀត នាថ្ងៃអនាគត។

 

 

ប្រភពមកពីArab News