ងាកមកមើលទីតាំងរូងក្រោមដីផ្សេងៗ ដែលសាងឡើងសម្រាប់ការពារជីវិតមនុស្ស ពីគ្រោះមហន្តរាយធម្មជាតិ ឬបញ្ហាសង្គ្រាមនុយក្លេអ៊ែរផ្សេងៗ!

ប្រសិនបើបញ្ហាស្រទាប់អូសូន នៅក្នុងបរិយាកាសកាន់តែស្តើងទៅៗ នោះកម្តៅផែនដី នៅតែបន្តកើនឡើង ដែលវាអាចបង្កគ្រោះមហន្តរាយផ្សេងៗដល់ជីវិតមនុស្ស រស់នៅតំបន់មួយចំនួននៅលើផែនដី។ វាអាចបង្កជាគ្រោះទឹកជំនន់ជន់លិច បញ្ហាភ្នំភ្លើងផ្ទុះ ឬផ្សេងៗជាច្រើន។ ទៅតាមតំបន់ខ្លះទៀតក៏ជាកន្លែងដែលកំពុងជួបនឹងបញ្ហាសង្គ្រាមផ្សេងៗទៀតផង ដែលអាចនឹងបង្កគ្រោះថ្នាក់ខ្លាំងដល់ជីវិតមនុស្សថែមទៀត។

ដោយសារតែបញ្ហាទាំងនោះហើយ ទើបក្រុមមនុស្សជាច្រើនបាននឹងកំពុងរកដំណោះស្រាយ ការពារពីផលប៉ះពាល់ដ៏ធ្ងន់ធ្ងរនៃបញ្ហាទាំងនោះ ដើម្បីគេចផុតពីគ្រោះថ្នាក់ និងអាចស្រោចស្រង់ជីវិតរបស់ពួកគេផងដែរ។ គំនិតសាងសង់ផ្ទះសុវត្ថិភាព ឬទីជម្រកក្រោមដីត្រូវបានបង្កើតឡើង និងទទួលបានគាំទ្រយ៉ាងច្រើនពីប្រជាជន នៅជុំវិញពិភពលោក ហើយវាក៏បន្តសាងសង់បានច្រើនទៀតផង។ ជាក់ស្តែងការច្នៃកន្លែងដែលមានស្រាប់មួយចំនួនជាជម្រកសុវត្ថិភាពក្រោមដីមានដូចជា ស្ថានីយកាំជ្រួចមីស៊ីលក្រោមដីដែលត្រូវបានគេបោះបង់ចោល កំពុងតែទទួលបានការចាប់អារម្មណ៍ខ្លាំង នៅតាមទីតាំងប្រទេសចម្រុះមួយចំនួនដូចជា សហរដ្ឋអាមេរិច សាធារណរដ្ឋឆេក ប្រទេសន័រវ៉េស និងអាឡឺម៉ងជាដើម។

ជម្រកក្រោមដីដ៏មានសុវត្ថិភាព និងសោភ័ណភាព 

ទីតាំងក្រោមដីមួយចំនួនត្រូវបានសាងសង់ឡើង ដើម្បីទប់ទល់ទៅនឹងការរីករាលដាល នៃមេរោគឆ្លងនៅលើដីផ្សេងៗ ការការពារពីគ្រោះធម្មជាតិធំៗ និងពីគ្រោះមហន្តរាយផ្សេងៗ នៃការប្រើប្រាស់នុយក្លេអ៊ែរ។ មិនត្រឹមតែវាត្រូវបានបង្កើតឡើងសម្រាប់ការពារសុវត្ថិភាពប៉ុណ្ណោះទេ ប៉ុន្តែវាក៏ត្រូវបានសាងសង់ឡើងសម្រាប់ជាកន្លែងកម្សាន្តផងដែរ ដូចជា កន្លែងស្ប៉ាក្រោមដី កន្លែងហាត់ប្រាណ សួនកម្សាន្ត កន្លែងចិញ្ចឹមសត្វ បារ និងអាហារដ្ឋានបែប Pubs មួយចំនួនទៀតផង។ ជាក់ស្តែងមហាសេដ្ឋី និងតារាល្បីៗជាច្រើនរូបក៏បានសាងសង់កន្លែងក្រោមដីនេះបែបឯកជន និងអាចចំណាយលុយដល់ខ្ទង់លានដុល្លារឯណោះដូចជាលោក Tom Cruise ក៏បានសាងសង់វាមួយផ្ទាល់ខ្លួនគាត់ផងដែរ និងមហាសេដ្ឋី Bill Gates បានវិនិយោគ 30 លានដុល្លារ លើកសិដ្ឋានបណ្តុះកូនរុក្ខជាតិកសិកម្ម ក្រោមដីជាមួយនឹងអង្គការធំៗទៀតផង។

ទីតាំងក្រោមដីសម្រាប់ថ្នាក់ដឹកនាំលំដាប់ពិភពលោក

ប្រធានាធិបតីអាមេរិច លោក Donald Trump ក៏ធ្លាប់ចុះទៅកាន់កន្លែងក្រោមដីនៃសេតវិមាន White House ដែលបានកសាងនៅក្នុងទសវត្សឆ្នាំ 50 (1950s) បន្ថែមពីនេះក៏បានទីតាំងក្រោមដីបែបប្រណិតកំពូលនៅតាមភ្នំ Blue Ridge នៃរដ្ឋ Virginia ផងដែរ។ លោក Trump ក៏មានរូងក្រោមដីផ្ទាល់ខ្លួននៅសេតវិមាន Mar-a-Lago របស់លោកនៅឯ រដ្ឋ Florida និងមួយទៀតកន្លែងវាយកូនហ្គោលរបស់គាត់នៅ West Palm Beach។ រូងសុវត្ថិភាពក្រោមដី (Bunkers) ចាប់ផ្តើមទទួលបានការចាប់អារម្មណ៍ច្រើនហើយ នៅលើបណ្តាញអ៊ីនធើណេត ពិសេសសម្រាប់អភិជន ដែលពួកគេត្រៀមនឹងការវិនិយោគទុក សម្រាប់ជាកន្លែងកម្សាន្តបែបឯកជន និងជាកន្លែងដ៏មានសុវត្ថិភាពបំផុតផងដែរ។

ទាំងនេះ គឺជាទីតាំង ជម្រក/រូងក្រោមដី ដែលកំពុងតែមានប្រជាប្រិយភាព: