តាមរបាយការណ៍ថ្មីមួយបានលើកឡើងថា “ខែកក្កដា ឆ្នាំ 2019” បានជាប់ជាខែដែលក្តៅជាងគេបំផុតនៅក្នុងកំណត់ត្រាពិភពលោក!

ខែកក្កដា ឆ្នាំ 2019 ត្រូវបានគេរកឃើញថាវាគឺជាខែមួយដ៏ក្តៅបំផុត ដែលមិនធ្លាប់មាននៅក្នុងកំណត់ត្រាពិភពលោក។ ព័ត៌មាននេះ ដូចជាពុំសូវធ្វើឲ្យមានការភ្ញាក់ផ្អើលដល់ប្រជាជនជុំវិញពិភពលោកនេះ ច្រើនឡើយ ដោយពួកគេបានដឹងខ្លះមកហើយថាវាពិតជាក្តៅមែន សឹងតែមិនអាចនៅក្រោមថ្ងៃបានយូរឡើយជាពិសេសពេលនៅចន្លោះម៉ោង កណ្តាលថ្ងៃត្រង់។ 

បើយោងតាមរបាយការណ៍ប្រចាំខែចុងក្រោយបង្អស់ពី រដ្ឋបាលជាតិមហាសមុទ្រ និងបរិយាកាសជាតិ (NOAA) បានបង្ហាញពីស្ថានភាពនៃភពផែនដីដែលមានកម្តៅឡើងខ្ពស់បំផុត។ ខែកក្កដាកន្លងទៅថ្មីៗនេះ សីតុណ្ហភាពជាមធ្យមនៅទូទាំងផ្ទៃដី និងផ្ទៃសមុទ្រនៅលើសកលលោកមាន 1.71oF (0.95oC) ក្តៅជាង និងបូកបន្ថែមពីលើ មធ្យមភាគនៅក្នុងសតវត្សទី 20 ដែលមាន 60.4oF (15.8oC)។

 

 

កំណត់ត្រាថ្មីនេះ បានបំបែកកំណត់ត្រាចាស់កាលពីឆ្នាំ 2016 បើយោងតាមសំណុំទិន្នន័យរបស់ NOAA។ ការធ្វើកំណាយ និងការប៉ាន់ស្មានពីអ្នកវិទ្យាសាស្ត្រកាលពីឆ្នាំ 1880 ថាខែកក្កដា ឆ្នាំ 2019 នេះនឹងមានកម្តៅឡើងខ្ពស់បំផុតនៅក្នុងផែនដី នេះពិតជាត្រឹមត្រូវមែន។ 

 

ការព្យាករណ៍មួយនេះ មានភាពត្រឹមត្រូវច្រើន។ បើយោងតាមទិន្នន័យបន្ថែមមួយចំនួនទៀត គេកំណត់បានថា ខែកក្កដា គឺជាខែដែលមានកម្តៅខ្ពស់ជាងគេ ជាងខែណាៗទាំងអស់ប្រចាំឆ្នាំ។ គេបានធ្វើការព្យាករណ៍ថា ពិភពលោកនឹងប្រទះការកើនឡើងកម្តៅខ្លាំង នៅក្នុងកំឡុងខែកក្កដា រៀងរាល់ 5 ឆ្នាំម្តង និងអាចមានគម្លាតដល់ទៅ 10 ឆ្នាំម្តងផងដែរ ដែលពួកគេបានសម្គាល់មើលចុងក្រោយ នៅក្នុងឆ្នាំ 1998។

 

រហូតមកដល់ឆ្នាំ 2019 នេះ NOAA ក៏បានធ្វើការពិនិត្យពីសីតុណ្ហភាពរបស់ពិភពលោកនៅក្នុងចន្លោះ ខែមករាដល់កក្កដា ដែលវាពិតជាក្តៅជាងកម្តៅជាមធ្យមនៃសតវត្សទី 20 ពិតមែន និងបានឈានទៅក្នុង កំណត់ត្រាថ្មីរបស់ NOAA ទៀតផង។ នៅក្នុងចន្លោះលេខរៀងកម្តៅខ្ពស់បំផុត “ខែកក្កដា ឆ្នាំ 2019” នេះក៏ស្ថិតនៅប្រកិតនឹងទិន្នន័យរបស់ឆ្នាំ 2017 និង 2016 ផងដែរ។

 

ឈរនៅលើកម្រិតមូលដ្ឋានបន្ថែមទៀត គឺថាសីតុណ្ហភាពក៏បានឡើងក្តៅបំផុត នៅផ្នែកខ្លះនៃអាមេរិចខាងជើង និងខាងត្បូង, អាស៊ី, អាហ្វ្រិក, អូស្ត្រាលី និងញូវហ្សែលឡេន ក៏ដូចជានៅតំបន់អាត្លង់ទិច ប៉ាស៊ីហ្វិកខាងលិច និងមហាសមុទ្រឥណ្ឌាខាងលិចជាដើម។

 

កម្រិតខ្ពស់បំផុតនៃសីតុណ្ហភាពកាលពីខែមុននេះ ក៏បានអមមកជាមួយនឹងព័ត៌មានការធ្លាក់ចុះទាបទាក់ទងនឹងទំហំទឹកកកសមុទ្រ ជាពិសេសនៅតាមតំបន់អាក់ទិច បានឈានទៅដល់កម្រិតទាបបំផុតក្នុងប្រវត្តិសាស្ត្រ ដែលអាចឈានដល់ការធ្លាក់ចុះប្រមាណ 20% ឯណោះ។ របាយការណ៍ថ្មីក៏បានបង្ហាញថា តំបន់អាក់ទិចនៅសល់ទឹកកកតូចជាងគេ ដែលមានអត្រាត្រឹមតែ 4.3 ភាគរយទាបជាងកម្រិតមធ្យមរវាងឆ្នាំ 1981 និង 2010។

 

 

ការបង្ហាញថា “ខែកក្កដា ឆ្នាំ 2019” នេះជាខែដែលក្តៅបំផុត ចូលនៅក្នុងកំណត់ត្រាប្រវត្តិសាស្ត្រនោះ វាមិនមែនជារឿងថ្មីទេ ព្រោះបើយោងតាមប្រភពផ្សេងទៀតដូចជា UN, NASA, NOAA, WMO (World Meteorological Organization) និងសូម្បី White House ក៏បានបង្ហាញពីទិន្នន័យ និងលទ្ធផលដូចគ្នាផងដែរ។ ព័ត៌មាននេះ បានធ្វើឲ្យស្ថាប័នធំៗនានានៅក្នុងពិភពលោកមានការព្រួយបារម្ភជាខ្លាំង ពីអនាគតនៃភពផែនដីរបស់យើង។ គណៈកម្មការអន្តរជាតិស្តីពីអាកាសធាតុ បាននិយាយថា ការផ្លាស់ប្តូរនៃអាកាសធាតុ និងការកើនឡើងនៃកម្តៅដ៏សំបើមនេះ វាកើតមានឡើងដោយសារទង្វើ នៃសកម្មភាពប្រចាំថ្ងៃរបស់មនុស្ស ដែលនឹងឈានទៅរកផលអាក្រក់បំផុតមួយ មិនអាចត្រឡប់ក្រោយបាន។ 

 

 

ដូចនេះ សូមអំពាវនាវដល់មនុស្សទាំងអស់ នៅជុំវិញពិភពលោក ពិចារណាឡើងវិញ កាត់បន្ថយការប៉ះពាល់ដល់បរិស្ថាន និងងាកមកថែរក្សាបរិស្ថានវិញ ដើម្បីរក្សានិរន្តភាពរបស់ភពផែនដី។

 

ប្រភពមកពីhttps://newatlas.com/july-2019-hottest-month-record/61090/