តំបន់កោះបាលី នឹងបើកដំណើរការឡើងវិញ សម្រាប់ភ្ញៀវទេសចរក្នុងស្រុក ចាប់ពីថ្ងៃសុក្រនេះទៅ!

អភិបាលរងប្រចាំតំបន់កោះបាលី លោក Tjokorda Oka Artha បាននិយាយថា ខេត្តនេះ នឹងបើកដំណើរការឡើងវិញ សម្រាប់ភ្ញៀវទេសចរក្នុងស្រុក ចាប់ពីថ្ងៃសុក្រនេះទៅ។




លោកបានមានប្រសាសន៍ថា ទិសដៅទេសចរណ៍ធម្មជាតិ និងវប្បធម៌នឹងត្រូវបានបើកសម្រាប់អ្នកទេសចរ ប៉ុន្តែកោះរមណីយដ្ឋានដ៏ពេញនិយមនេះ មិនទាន់បើកដំណើរការ កន្លែងកម្សាន្តរបស់ខ្លួនឡើងវិញ ដូចជាកន្លែងកម្សាន្ត រាត្រី និងកន្លែងខារ៉ាអូខេនៅឡើយទេ។

លោក Tjokorda បាននិយាយកាលពីថ្ងៃអង្គារសប្តាហ៍នេះថា "ក្លឹបរាត្រីមិនត្រូវបានអនុញ្ញាតឱ្យបើកឡើងវិញទេ។ កោះបាលីផ្តល់ជូននូវ ទិសដៅទេសចរណ៍ ជាច្រើនទៀត ដូចជាកន្លែងទេសចរណ៍ធម្មជាតិ ឬ វប្បធម៌។



លោកបាននិយាយថា សណ្ឋាគារនិងរមណីយដ្ឋានកោះបាលី បានត្រៀមរៀបចំ ការប្រជុំអាជីវកម្ម និងព្រឹត្តិការណ៍នានាផងដែរ។ រដ្ឋបាលកោះបាលីបច្ចុប្បន្ន កំពុងសហការជាមួយនឹង វិទ្យាស្ថានសិល្បៈវិចិត្រសិល្បៈឥណ្ឌូនេស៊ី Denpasar ដើម្បីប្រារព្ធពិធីល្ខោន និងរបាំប្រពៃណីផ្សេងទៀត។

ពួកគេកំពុងព្យាយាម រកវិធីដើម្បីអនុញ្ញាតឱ្យអ្នករបាំ ដើរនិងអនុវត្តតាម ពិធីការសុខភាព ខណៈពេលសម្តែងរបាំ kecak ដែលជារបាំប្រពៃណី ពាក់ព័ន្ធនឹងអ្នកសម្តែងរាប់សិបនាក់។




យោងតាមលោក Tjokorda រដ្ឋបាលកោះបាលី បានរៀបចំសម្រាប់ការបើកដំណើរការទេសចរណ៍ឡើងវិញ អស់រយៈពេលជាយូរមកហើយ។ រដ្ឋបាលមានផែនការបីដំណាក់កាល សម្រាប់បន្ធូរបន្ថយទៅលើការរឹតបន្តឹងច្បាប់នានា ដើម្បីស្វាគមន៍ភ្ញៀវទេសចរទៅកាន់កោះឡើងវិញ។ ដំណាក់កាលទី 1 បានចាប់ផ្តើមនៅថ្ងៃទី 9 កក្កដា នៅពេលរដ្ឋបាល ចាប់ផ្តើមបើកអាជីវកម្មក្នុងស្រុក និងកន្លែងទេសចរណ៍ សម្រាប់ប្រជាជននៅកោះបាលី។



ដោយឡែក សម្រាប់ដំណាក់កាលទី 2 នឹងត្រូវអនុវត្តនៅថ្ងៃទី 31 កក្កដានេះ ដោយបើកដំណើរការឡើងវិញ សម្រាប់ភ្ញៀវទេសចរក្នុងស្រុក។ ដំណាក់កាលទី 3 ដែលកំពុងស្ថិតនៅលើគ្រោងការ បើកព្រំដែនសម្រាប់ភ្ញៀវទេសចរអន្តរជាតិឡើងវិញនោះ គ្រោងនឹងចាប់ផ្តើមនៅថ្ងៃទី 11 ខែកញ្ញាខាងមុខ។



មុនពេលទៅដល់កោះបាលី អ្នកទស្សនាទាំងអស់ ក៏គួរតម្លើងកម្មវិធី LOVEBALI ដែលអាចទាញយកបានតាមរយៈ គេហទំព័រផ្លូវការរបស់រដ្ឋាភិបាល https://lovebali.baliprov.go.id ។ កម្មវិធីនេះត្រូវបានប្រើជាវេទិកាសម្រាប់អ្នកទស្សនា ដើម្បីរាយការណ៍អំពីបញ្ហា ឬការរិះគន់ទៅលើអ្វីមួយ ពេលដែលពួកគេ នៅលើតំបន់កោះបាលី។ អ្នកទស្សនាក៏ត្រូវបានលើកទឹកចិត្ត ឱ្យបើកដំណើរការមុខងារ GPS នៅលើស្មាតហ្វូនរបស់ពួកគេជានិច្ច នៅលើកោះផងដែរ ជៀសវាងក្នុងប្រការចាំបាច់ណាមួយ ដែលអាចកើតមានឡើង។



លោក Tjokorda បានសម្តែងក្តីសង្ឃឹមថា ការបើកដំណើរការឡើងវិញនេះ អាចត្រូវបានអនុវត្តតាមផែនការដែលបានគ្រោងទុក ក៏ព្រោះតែស្ថានភាព Covid-19 នៅតំបន់កោះ អាចគ្រប់គ្រងបាននៅឡើយ។ លោកបាននិយាយថា “ចំនួនអ្នកជម្ងឺដែលបានជាសះស្បើយពី Covid-19 គឺកំពុងកើនឡើង នៅប៉ុន្មានថ្ងៃចុងក្រោយនេះផងដែរ។



ទោះយ៉ាងណា លោកថា លោកមិនប្រាកដថា ផែនការបើកព្រំដែនសម្រាប់ភ្ញៀវទេសចរអន្តរជាតិ អាចនឹងត្រូវអនុវត្តនៅថ្ងៃទី 11 កញ្ញា យ៉ាងណានោះទេ។

យើងកំពុងសម្របសម្រួល ជាមួយរដ្ឋាភិបាលកណ្តាល ទាក់ទងនឹងការហាមឃាត់ ជាបណ្តោះអាសន្ន ចំពោះការមកដល់ និងការធ្វើដំណើរឆ្លងកាត់របស់អ្នកដំណើរបរទេស ដែលមានចែងក្នុងច្បាប់ និងបទប្បញ្ញត្តិ របស់រដ្ឋមន្រ្តីសិទ្ធិមនុស្សលេខ 11/2020 ។ លោកបានបន្តថា លោកក៏នៅតែតាមដានពីស្ថានភាពឆ្លង Covid-19 នៅតាមបណ្តាប្រទេសខាងក្រៅ ក្នុងពេលបច្ចុប្បន្ននេះផងដែរ។




គិតមកត្រឹមថ្ងៃពុធនេះ កោះបាលីបានកត់ត្រាករណីឆ្លង Covid-19 សរុបចំនួន 3,310 ករណី ដោយមានការជាសះស្បើយឡើងវិញចំនួន 2,711 នាក់ និងអ្នកស្លាប់មានចំនួន 48 នាក់។