តើខួរក្បាលសិប្បនិម្មិត (AI) អាចជួយដោះស្រាយបញ្ហាព័ត៌មានក្លែងក្លាយ បានកម្រិតណាហើយ?

ព័ត៌មាន ដែលបានចុះផ្សាយតាមប្រព័ន្ធអិុនធឺណិតបច្ចុប្បន្ន មិនមែន ១០០% ត្រឹមត្រូវ និងច្បាស់ការទាំងស្រុងនោះទេ។ វាអាចជា ព័ត៌មានពិតប្រាកដ ដែលអ្នកទស្សនា អ្នកអាន ឬអ្នកស្ដាប់ យល់ឃើញថា វាគឺជាដំណឹងត្រឹមត្រូវ ពិសេសព័ត៌មានទាក់ទងទៅនឹងនយោបាយ សុវត្ថិភាព សន្តិភាពរបស់ប្រទេសជាតិណាមួយ។ បញ្ហានេះ ត្រូវបានប្រកាសឲ្យមហាជនបានដឹងហើយ ដោយសារតែសារព័ត៌មានបច្ចុប្បន្ន មានលាយបញ្ចូលនូវព័ត៌មានក្លែងក្លាយ ដែលបំភ្លៃលើសការពិត ធ្វើឲ្យអ្នកទទួលសារជាដំណឹងយល់ខុស ហើយចាប់ផ្ដើមវាយតម្លៃ ឬគិតខុស ស្របពេលការពិតទៅ ព័ត៌មាននោះ គឺជាព័ត៌មានក្លែងក្លាយ ត្រូវបានផលិតឡើងដោយខួរក្បាលសិប្បនិម្មិត (AI) គ្រប់គ្រងដោយជនខិលខូចប៉ុណ្ណោះ។

Deepfakes ដែលជាប្រភពព័ត៌មានក្លែងក្លាយ និងមានហានិភ័យខ្ពស់បំផុតដល់ពិភពលោក ដែលប្រើប្រាស់ខួរក្បាលសិប្បនិម្មិត (AI) ក្នុងការប្រឌិតព័ត៌មានជាវីដេអូ ដែលបច្ចុប្បន្នមានប្រទេសធំៗជាច្រើន កំពុងមានការព្រួយបារម្មណ៍យ៉ាងខ្លាំង បានកំពុងស្វែងរកវិធីដោះស្រាយបញ្ហាហើយ តែនៅមិនទាន់មានលទ្ធភាពពេញលេញ ១០០% ក្នុងការក្ដាប់យកព័ត៌មាន និងគ្រប់គ្រងនៅឡើយទេ។ Deepfakes មានភាពច្នៃប្រឌិតខ្ពស់ អាចធ្វើឲ្យអ្នកមើល ឬអ្នកស្ដាប់ស្លុងអារម្មណ៍ ហើយគិតថា វាគឺជាដំណឹងពិតប្រាកដ ជាបញ្ហាធំ បានកំពុងត្រូវដោះស្រាយ និងទប់ស្កាត់តាមរយៈក្រុមហ៊ុនបច្ចេកវិទ្យាធំៗ ក៏ដូចជានៅតាមមហាវិទ្យាល័យនានា របស់អាមេរិក រួមមាន New York Univeristy’s Tandon School of Engineering, Carnegie Mellon University ក៏ដូចជាអ្នកវិទ្យាសាស្ត្របច្ចេកវិទ្យា ក្រុមអ្នកស្រាវជ្រាវ ជាដើម ដោយមានតំណោះស្រាយបង្ការ តែមិនអាចកាត់ផ្ដាច់បានទាំងស្រុងនោះទេ។

ខណៈពេល កំពុងមានការយកចិត្តទុកដាក់ ទៅលើការទប់ស្កាត់រូបភាព ក៏ដូចជាខ្សែវីដេអូក្លែងបន្លំ ដែលកំពុងចែកចាយជាបន្តបន្ទាប់តាមបណ្ដាញអិុនធឺណិត មានការស្ទង់មតិនៅមជ្ឍមណ្ឌលស្រាវជ្រាវថ្មីមួយនៅអាមេរិក ដែលបានបកស្រាយថា ព័ត៌មានក្លែងក្លាយ គឺជាបញ្ហាធំជាងឧក្រិដ្ឋកម្ម អំពើហិង្សា ការប្រកាន់ជាតិសាសន៍ និងអំពើភេរវកម្មទៅទៀត ព្រោះវាអាចនឹងបង្កើតឲ្យមានមតិយល់ខុស អាចបង្កើតឲ្យមានភាពចលាចល វឹកវរ ទ្រង់ទ្រាយធំ។ តែ ដោយមានការខិតខំប្រឹងប្រែងទប់ស្កាត់ តាមវិធីសាស្ត្រមួយចំនួន និងបានយកទៅអនុវត្តផ្ទាល់ ដើម្បីកំណត់ថា តើពេលណាមនុស្ស កំពុងត្រូវបានគេបោកបញ្ឆោត ដោយចេតនាអាក្រក់ ដែលត្រូវបានដាក់ចូលទៅក្នុងក្បួនខ្នាត ដើម្បីដោះស្រាយមើលព័ត៌មានក្លែងក្លាយ។ ការដោះស្រាយនោះ គឺជាវិធីសាស្ត្រ កើតឡើងចេញពីការច្នៃប្រឌិតថ្មីរបស់សកលវិទ្យាល័យ Michigan (U-M) បានបង្កើនក្បួនខ្នាត ដោះស្រាយបញ្ហា តាមរយៈការកំណត់ទៅលើការនិយាយភាសា វេយ្យាករណ៍ ជ្រើសពាក្យពេជ្រ ឃ្លាឃ្លោង ជាអាទិ៍។

 

AI VS AI

ក្រៅពីការប្រើប្រាស់ក្បួនខ្នាតដូចបានបញ្ជាក់ខាងលើ ក្រុមអ្នកសិក្សាស្រាវជ្រាវផ្សេងទៀតនៃវិទ្យាស្ថានសិប្បនិម្មិត Allen សហការណ៍ជាមួយមហាវិទ្យាល័យ វ៉ាស៊ីនតោន នៅទីក្រុង Seattle បាននាំមកនូវខួរក្បាល AI ថ្មីមួយ ដែលមានសមត្ថភាពរហ័ស អាចសម្គាល់ ឬចាប់ព័ត៌មានក្លែងក្លាយបានលឿន និងស្វ័យប្រវត្តិតែម្ដង ដោយសារតែអ្នកស្រាវជ្រាវទាំងនោះមានជំនាញស្រាប់ទាក់ទងនឹង AI។ ការយក AI ទប់ស្កាត់ AI គឺជារឿងល្អមួយ ចំនាយពេលតិច តែមានប្រសិទ្ធភាពអាចទទួលយកបាន។ លោកបណ្ឌិត Rowan Zellers និងជាសមាជិកក្រុមនៃគម្រោងនេះ បានឲ្យដឹងថានេះគឺជាការរកឃើញមួយ ដែលប្រហែល ជាមានលក្ខណៈឆ្គាំឆ្គង តែវាមានភាពរឹងមាំ សម្រាប់រកឲ្យឃើញនូវភាពរឹងមាំរបស់ព័ត៌មានក្លែងក្លាយ។ ព័ត៌មានក្លែងក្លាយ នឹងត្រូវបានគេស្គាល់ច្បាស់ជាមួយនឹងចំនុចខ្សោយរបស់វា ដូចជាការប្រើប្រាស់ពាក្យពេជ្រធម្មតា ឬពាក្យអាចព្យាករណ៍ទុកមុនបាន 

ស្ថិតក្នុងតំណាក់ការអភិវឌ្ឍ និងប្រើប្រាស់ AI ទប់ទល់ជាមួយ AI នេះ លោក Hugo William អ្នកគ្រប់គ្រងផ្នែកផ្សព្វផ្សាយព័ត៌មាន នៅចក្រភពអង់គ្លេស បានឲ្យដឹងថា ការប្រើប្រាស់ AI ក្នុងការរកចំនុចខុសត្រូវ ឬចំនុចខ្សោយ គឺមានវិធីសាស្ត្រច្រើនណាស់ ហើយបច្ចុប្បន្នរូបលោក បានកំពុងអភិវឌ្ឍឧបករណ៍ផ្សេងទៀត ដោយប្រើប្រាស់ធាតុផ្សំ នៃការសិក្សា រៀនសូត្រ នៃភាសាធម្មជាតិ ក្នុងចំណោមភាសាដ៏ទៃផ្សេងទៀត។ លោកបានពន្យល់ថា គំរូ តក្កវិជ្ជា ក្នុងការវិភាគព័ត៌មាន ផ្អែកទៅលើៈីធីសាស្ត្របីយ៉ាងរួមមានដូចជា៖

  • ទិន្នន័យពីអត្ថបទ៖ អាចជឿទុកចិត្តបាន ដែលមានប្រវត្តិវិជ្ជាជីវៈសារព័ត៌មានត្រឹមត្រូវច្បាស់លាស់
  • បណ្ដាញ៖ តើអត្ថបទព័ត៌មាននោះ រីករាលដាលតាមរយៈវេទិកាសង្គម និងបណ្ដាញនៅក្នុងវិធី ដែលត្រូវបានផ្សាភ្ជាប់ជាមួយនឹងការផ្ដល់ព័ត៌មានពិត ឬទេ?
  • មាតិកា៖ AI ស្កេនអត្ថបទជាច្រើន ដែលមានសញ្ញាណរាប់រយ ដែលមាននៅក្នុងព័ត៌មានក្លែងក្លាយ ឬទិន្នន័យមិនច្បាស់លាស់។

លោក William បានបន្ថែមដូច្នេះថាយើងមើលឃើញថា បច្ចេកវិទ្យារបស់យើង មិនមែនសម្រាប់ជំនួសការត្រួតពិនិត្យបែបប្រពៃណីនោះទេ ប៉ុន្តែវាគឺជាវិធីសាស្ត្រមួយដ៏សំខាន់ ក្នុងការសម្រួលទោដល់ដំណើរការដោយដៃ។ ការធ្វើបែបនេះ អាចឲ្យយើងត្រួតពិនិត្យការពិតបានកាន់តែច្រើនក្នុងរយៈពេលមួយដ៏ខ្លី និងមានភាពឆាប់រហ័ស អាចបត់បែនបាន ជាងស្ថាប័នដទៃផ្សេងទៀត

អញ្ចឹង វិធីសាស្ត្រក្នុងការ ស្វែងរកតម្រុយ នូវប្រភេទព័ត៌មានក្លែងក្លាយ គឺនៅមានកម្រិត បើទោះបីជាមិនអាចធ្វើការទប់ស្កាត់ព័ត៌មានក្លែងក្លាយបាន ១០០% ក៏ពិតមែន តែយើងមានដំណោះស្រាយខ្លះៗ ដើម្បីធ្វើការប្រយុទ្ធប្រឆាំង ទប់ស្កាត់ ឲ្យមានអត្រាទាបតាមដែលអាចធ្វើទៅបាន ក្រោមការរួមសហការណ៍ពីក្រុមហ៊ុនបច្ចេកវិទ្យាធំៗដូចជា Google និង Facebook ជាដើម។ ម្យ៉ាងវិញទៀត ការប្រើប្រាស់ខួរក្បាលសិប្បនិម្មិត (AI) យកទៅបង្ក្រាប ឬដោះស្រាយបញ្ហាជាមួយនឹង AI មួយផ្សេងទៀត នៅមិនទាន់មានលទ្ធផលល្អពេញលេញនោះទេ គឺវានៅមានកម្រិត ដែលត្រូវដាក់បញ្ចូលបន្ថែម ទៅតាមប្រភេទភាសា សម្លេង ពាក្យពេជ្រជាដើម ហេតុនេះព័ត៌មានក្លែងក្លាយ នៅតែអាចធ្វើការវាយលុកទីផ្សារបានដដែល ដែលអ្នកអានទាំងអស់គប្បីយល់ឲ្យបានច្បាស់ មុននឹងទទួលយកព័ត៌មាន ពិសេសនៅតាមគេហទំព័រគ្មានប្រវត្តិច្បាស់លាស់ជាដើម។