ផ្លូវល្បឿនលឿន ភ្នំពេញ-បាវិត នឹងប្រើពេល ៤ ឆ្នាំដើម្បីសាងសង់ ហើយនឹងតភ្ជាប់ទៅកាន់ ទីក្រុងហូជីមិញ របស់វៀតណាម!


រាជធានីភ្នំពេញ៖ កាលពីពេលថ្មីៗនេះ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានចុះហត្ថលេខាលើ កិច្ចព្រមព្រៀងភាពជាដៃគូសម្រាប់ "គម្រោងហេដ្ឋារចនាសម្ព័ន្ធ ផ្លូវល្បឿនលឿនឯកជន តភ្ជាប់ពីភ្នំពេញទៅក្រុងបាវិត" ជាមួយ លោក Zhou Yong តំណាងក្រុមហ៊ុន China Road and Bridge Corporation (CRBC) នៅចំពោះមុខមន្ត្រីរដ្ឋាភិបាល និងអ្នកសារព័ត៌មានជាច្រើន។

ភាពជាដៃគូឯកជនសាធារណៈ (PPP – Public Private Partnership) ចែកចេញជាពីរផ្នែកធំៗ រួមមាន៖

១/ កិច្ចសន្យា PPP ដែលកំណត់គោលការណ៍សំខាន់ៗ សម្រាប់ការអនុវត្តការសាងសង់ និងដំណើរការផ្លូវល្បឿនលឿន។

២/ ឧបសម្ព័ន្ធពាក់ព័ន្ធ ដែលរៀបរាប់លម្អិតអំពី ការអនុវត្តគោលការណ៍ ដែលបានព្រមព្រៀងជាគោលការណ៍ក្នុងកិច្ចសន្យា។

ទន្ទឹមនឹងនេះ កិច្ចសន្យា PPP នេះក៏ត្រូវបានរៀបចំ និងអនុវត្តក្រោមក្របខណ្ឌនៃច្បាប់ PPP និងឯកសារច្បាប់ជាធរមាន និងផ្អែកលើគោលការណ៍ មិនធានា (non-guarantee) សម្រាប់គម្រោង និងរក្សា (maintain) “ខ” និងលក្ខខណ្ឌនៃកិច្ចសន្យាដូចជា គម្រោងផ្លូវល្បឿនលឿនភ្នំពេញ-ខេត្តព្រះសីហនុ នេះបើតាមការសម្រេចចិត្ត របស់សម្តេចតេជោ នាយករដ្ឋមន្ត្រី។

គម្រោងផ្លូវល្បឿនលឿនភ្នំពេញ-បាវិត ត្រូវបានឯកភាពជាគោលការណ៍ ក្រោមកិច្ចសន្យា PPP ដែលបានចុះហត្ថលេខាក្នុងឱកាសនេះ មានប្រវែង ១៣៥,១០ គីឡូម៉ែត្រ សាងសង់ជា ៤ គន្លង ដោយឆ្លងកាត់ខេត្តកណ្ដាល ព្រៃវែង និងស្វាយរៀង។

គួរបញ្ជាក់ផងដែរថា គម្រោងនេះនឹងសាងសង់ដោយ ទុនវិនិយោគប្រមាណ ១,៣៥ ពាន់លានដុល្លារអាមេរិក និងរយៈពេល ៤ ឆ្នាំ នៃការសាងសង់ក្រោម ទម្រង់វិនិយោគ Build-Operate-Transfer (BOT) ដូចគ្នាទៅនឹងគម្រោង ផ្លូវល្បឿនលឿនភ្នំពេញ-ព្រះសីហនុ ហើយក្រុមហ៊ុននឹង ដំណើរការជាង ៥០ ឆ្នាំមុនការផ្ទេរទៅរាជរដ្ឋាភិបាល។

ដោយឡែក ថវិកាសម្រាប់ការសាងសង់ ស្ពានឆ្លងកាត់ទន្លេមេគង្គ នឹងបានមកពីថវិកាជាតិ ដោយកិច្ចសន្យាសាងសង់ ត្រូវបានប្រគល់ជូនក្រុមហ៊ុន CRBC ដូចគ្នា ដែលនាំឱ្យការធ្វើដំណើរឆ្លងកាត់ ស្ពាននេះដោយឥតគិតថ្លៃ។ ការសាងសង់ស្ពាននេះ ត្រូវបញ្ចប់មុន ឬដំណាលគ្នា នឹងការបើកឱ្យដំណើរការ ផ្លូវល្បឿនលឿនភ្នំពេញ-បាវិត ស្របតាមលក្ខខណ្ឌ “ខ” និងលក្ខខណ្ឌ ដូចមានចែងក្នុងកិច្ចសន្យារបស់ PPP។

ហេដ្ឋារចនាសម្ព័ន្ធ ផ្លូវល្បឿនលឿនភ្នំពេញ-បាវិត នឹងត្រូវតភ្ជាប់ ជាមួយគម្រោងផ្លូវល្បឿនលឿន ហូជីមិញ-ម៉ុកបៃ របស់ប្រទេសវៀតណាម ដែលរំពឹងថានឹងបញ្ចប់ ក្នុងពេលជាមួយគ្នា។

គម្រោងផ្លូវល្បឿនលឿនភ្នំពេញ-បាវិតទី២ នឹងបើកការដ្ឋានសាងសង់ ជាផ្លូវការនៅថ្ងៃទី ៧ ខែមិថុនា ឆ្នាំ២០២៣ ខាងមុខនេះ ក្រោមអធិបតីភាពដ៏ខ្ពង់ខ្ពស់របស់ សម្តេច តេជោ នាយករដ្ឋមន្ត្រីនៃព្រះរាជាណាចក្រកម្ពុជា។

ដោយឡែក គម្រោងផ្លូវល្បឿនលឿនទី ៣ (Fast Line 3) ភ្នំពេញ-សៀមរាប គ្រោងនឹងបញ្ចប់ការសិក្សាលទ្ធភាព នៅចុងខែឧសភា ហើយរំពឹងថានឹងចុះហត្ថលេខា លើអនុស្សរណៈនៃការយោគយល់គ្នា (MoU) ក្នុងពេលឆាប់ៗនេះ។