រដ្ឋាភិបាលនឹងចំនាយ ១០០ លានដុល្លារ ស្ដារហេដ្ឋារចនាសម្ព័ន្ធក្រុងព្រះសីហនុឡើងវិញ ចាប់ផ្ដើមចុងខែសីហានេះ

កាលពីសប្ដាហ៍កន្លងទៅនេះ ប្រិយមិត្ត ប្រាកដជាបានឃើញនូវរូបភាព ក៏ដូចជាវីដេអូ បង្ហាញអំពីទឹកជំនន់ ដែលបានជន់លិចនៅតាមផ្លូវជាតិលេខ ៤ពិសេសនៅក្រុងព្រះសីហនុតែម្ដង ដែលមហាជនទូទៅបានសម្ដែងការមិនពេញចិត្តជាច្រើន ទៅលើហេតុការណ៍ ដែលបានកើតមានឡើង ក្នុងសភាពធ្ងន់ធ្ងរបែបនោះ ព្រោះថា ក្រុងព្រះសីហនុ គឺមានភាពរីកដុះដាលខ្លាំងទៅលើសំណង់ តែផ្ទុយទៅវិញ ហេដ្ឋារចនាសម្ព័ន្ធនៅទីរួមខេត្តនៅមានកម្រិតនៅឡើយ។ បញ្ហា នោះ គឺចោតឡើងដោយកត្តាជាច្រើន តែនឹងមានដំណើរស្រាយឆាប់ៗខាងមុខ នេះបើយើងតាមអ្នកនាំពាក្យរបស់ក្រសួងសាធារណការ និងដឹកជញ្ជូន បានឲ្យដឹងកាលពីពេលថ្មីៗកន្លងទៅនេះ។

រដ្ឋាភិបាលកម្ពុជា នឹងចំនាយទឹកប្រាក់ប្រមាណជា ១០០ លានដុល្លារ ដើម្បីស្ដាមុខមាត់ក្រុងព្រះសីហនុឡើងវិញ ខណៈពេលដែលហេដ្ឋារចនាសម្ព័ន្ធខេត្តមួយនេះ នៅមានកម្រិត។ ការស្ដារឡើងវិញនូវ ហេដ្ឋារចនាសម្ព័ន្ធនេះគឺផ្ដោតសំខាន់បំផុតទៅលើផ្លូវថ្នល់តូចធំ ប្រព័ន្ធទឹកភ្លើង ប្រព័ន្ធប្រឡាយ និងលូទឹកជាដើម រួមមានផងដែរនូវប្រព័ន្ធចម្រោះទឹកកខ្វក់ ដើម្បីធានាទៅដល់ភាពស្រស់ស្អាតនៃសមុទ្ររបស់កម្ពុជាផងដែរ។ ឯកឧត្ដម វ៉ាស៊ីម សុរិយា អ្នកនាំពាក្យរបស់ក្រសួងសាធារណការ និងដឹកជញ្ជូនបានឲ្យដឹងកាលពីម្សិលមិញនេះថា ការងារ ស្ដារហេដ្ឋារចនាសម្ព័ន្ធជារូបវន្ត នៅក្រុងព្រះសីហនុ រដ្ឋាភិបាលថ្នាក់ជាតិ និងថ្នាក់ក្រោមជាតិ គ្រោងនឹងចាប់ផ្ដើមនៅថ្ងៃទី២១ ឬថ្ងៃទី២២ ខែសីហា ឆ្នាំ២០១៩ ខាងមុខនេះឯង ក្នុងនោះ យោងតាមប្រសាសន៍របស់ឯកឧត្ដមទេសរដ្ឋមន្ត្រីបានឲ្យដឹងថា ទឹកប្រាក់ចំនួន ១០០ លានដុល្លារនោះ គឺត្រូវយកមកស្ដាមុខមាត់ក្រុងព្រះសីហនុ ឲ្យបានស្អាតល្អឡើងវិញ លើផ្លូវថ្នល់ ប្រព័ន្ធលូទឹក ។ល។

 

គម្រោងស្ដារហេដ្ឋារចនាសម្ព័ន្ធក្រុងព្រះសីហនុនេះ នៅមិនទាន់បញ្ជាក់លម្អិតថា តើនឹងត្រូវប្រើប្រាស់ថវិការជាតិ ឬថវិការរបស់រដ្ឋបាលថ្នាក់ក្រោមជាតិនោះទេ តែការចំនាយសាច់ប្រាក់យ៉ាងច្រើនសន្ធឹកសន្ធាប់នេះ នឹងដោះស្រាយបញ្ហាជាច្រើន ដែលកំពុងកើតមានឡើងនាពេលបច្ចុប្បន្ន ដែលធានាបាននូវសុវត្ថិភាព អនាម័យ និងពង្រីកមុខមាត់ជូនក្រុងព្រះសីហនុឡើងវិញដូចជាការលុបបំបាត់ការបង្ហូរទឹកកខ្វក់ចូលសមុទ្រជាអាទិ៍ ស្របពេលភ្ញៀវទេចរណ៍អន្តរជាតិ ពិសេសចិន បានកំពុងមកលេងនៅក្រុងព្រះសីហនុជាច្រើន។ ព៍ត៌មានលម្អិតបន្ថែម ពាក់ព័ន្ធនឹងការស្ដារមុខមាត់ខេត្ត នឹងចេញផ្សាយនាពេលក្រោយ បន្ទាប់ពីក្រសួងបានដាក់ចេញគម្រោងជាក់ស្ដែង។

 

 

ប្រភព៖ ក្រសួងសាធារណការ