ជប៉ុននឹងផ្ដល់ជំនួយដាក់អំពូលភ្លើង LED ជាង ៧ពាន់បង្គោលនៅភ្នំពេញ និងបណ្ដាខេត្តធំៗជូនកម្ពុជា

ជប៉ុនតែងតែជាប្រទេស ដែលជាមិត្តជិតស្និតរបស់កម្ពុជា ក្នុងការរួមចំនែកទៅលើការអភិវឌ្ឍន៍កម្ពុជា ឲ្យមានការប្រែប្រួល និងរីកចំរើនជារៀងរាល់ឆ្នាំ មិនថាក្នុងនាមជាប្រមុខរដ្ឋ ឬក្រុមហ៊ុនឯកជនឡើយ។ ជាក់ស្ដែង ឆាប់ៗខាងមុខនេះ ក្រុមហ៊ុនជប៉ុន Minebea Mitsumi នឹងធ្វើការជួយដល់កម្ពុជាបន្ថែមទៀត តាមរយៈការតម្លើងនូវបង្គោលអំពូលភ្លើងតាមផ្លូវ នៅតាមបណ្ដាខេត្តធំៗរបស់កម្ពុជា ដើម្បីសម្រួលទៅដល់ការរស់នៅរបស់ប្រជាពលរដ្ឋកម្ពុជា និងបម្រើទៅដល់ផែនការធំ ក្នុងការបង្កើតជាទីក្រុងវៃឆ្លាតនៅស្រុកខ្មែរទៀតផង។

កាលពីថ្ងៃទី២០ ខែសីហា ឆ្នាំ២០១៩ កន្លងទៅ ស្ថិតក្នុងជំនួប ស្ដីអំពីផែនការជំនួយដ៏ពិសេសមួយនេះរវាងឯកឧត្ដម សាយ សំអាល់ រដ្ឋមន្ត្រីក្រសួងបរិស្ថាន និងលោក Yoshihisa Kainuma ជាប្រធាននៃក្រុមហ៊ុន Minebea Mitsumi របស់ជប៉ុន បានជជែកពិភាក្សាគ្នាការអភិវឌ្ឍន៍កម្ពុជា និងរបាយការណ៍របស់ក្រុមហ៊ុនទៅលើការងារនៃគម្រោងទីក្រុងវៃឆ្លាត។ ក្នុងជំនួបនោះលោក Yoshihisa Kainuma បានបញ្ជាក់ដូច្នេះថា “ក្រុមហ៊ុន បាននឹងកំពុងផលិត នូវផលិតផលដែលមានបច្ចេកវិទ្យាខ្ពស់ ផ្តល់គុណប្រយោជន៍ដល់បរិស្ថាន ដែលក្នុងនោះ ក្រុមហ៊ុនក៏បានកំពុងត្រៀមដំឡើងអំពូល LED ក្នុងរាជធានីភ្នំពេញ ខេត្តសៀមរាប និងខេត្តព្រះសីហនុ ដែលជាខេត្ត ត្រូវបានជ្រើសរើសជាបណ្តាញទីក្រុងឆ្លាតវៃក្នុងតំបន់អាស៊ាន ដែលគាំទ្រដោយរដ្ឋាភិបាលជប៉ុន”។ 

គម្រោងបង្កើជាទីក្រុងឆ្លាតវៃ លើកដំបូងគេបំផុតនៅកម្ពុជា ត្រូវបានរាជរដ្ឋាភិបាលកម្ពុជា គាំទ្រ និងយល់ព្រមជាគោលការណ៍ជូនក្រសួងរៀបចំដែនដី និងនគរូបនីយកម្ម និងសំណង់ ក្នុងការបង្កើតជាបណ្ដាលទីក្រុងវ័យឆ្លាត អាស៊ាន-ជប៉ុន កាលពីពេលថ្មីៗកន្លងទៅនេះ។ ក្នុងនោះតាមការបញ្ជាក់ឲ្យបានច្បាស់របស់លោក Yoshihisa បានឲ្យដឹងដូច្នេះថា អំពូល LED ដែលនឹងយកមកតម្លើងជូនកម្ពុជាមានចំនួនរហូតដល់ទៅ ៧,៣៥៩ បង្គោល ត្រៀមរួមចំនែកទៅលើការបម្រើដល់ទម្រង់នៃទីក្រុងវៃឆ្លាត ដែលត្រៀមនឹងដាក់ឲ្យដំណើរការនាឆ្នាំ ២០១៩ នេះ។ ក្នុងនោះអំពូល LED ចំនួន ១,១៨៧ បង្គោល នឹងត្រូវយកទៅបំពាក់នៅតាមដងមហាវិថីសំខាន់ចំនួន ៣ នៅភ្នំពេញ ខណៈដែលខេត្តសៀមរាប នឹងទទួលបាន ៥០០ បង្គោល និងបន្តទៅតម្លើងនៅក្រុងព្រះសីហនុផងដែរ។

ឯកឧត្តមរដ្ឋមន្ត្រី សាយ សំអាល់ ក្នុងជំនួបនោះ បានស្វាគមន៍នូវវឌ្ឍនភាពការងាររបស់ក្រុមហ៊ុនមីនេបៀលើគម្រោងទីក្រុងវៃឆ្លាតតាមរយៈការប្រើប្រាស់អំពូលភ្លើង ដែលប្រើប្រាស់ចរន្តអគ្គិសនីតិចនេះ ដោយឯកឧត្តមបានគូសបញ្ជាក់ថា “ការប្រើប្រាស់ចរន្តអគ្គិសនីជាមួយនឹងអំពូល ដែលស៊ីភ្លើងតិចមិនមែនត្រឹមតែជួយសន្សំសំចៃចរន្តអគ្គិសនី ប៉ុណ្ណោះទេ ប៉ុន្តែក៏បានចូលរួមកាត់បន្ថយការបំពុលដោយពន្លឺ ជួយសន្សំសំចៃថវិកា និងចូលរួមការពារបរិស្ថាន ហើយធ្វើឱ្យទីក្រុងមានផាសុកភាពក្នុងការរស់នៅ”។ ឯកឧត្តមរដ្ឋមន្ត្រី ក៏បានផ្តួចផ្តើមគំនិតរៀបចំសិក្ខាសាលា ដើម្បីអនុញ្ញាតឱ្យក្រុមហ៊ុន Minebea Mitsumi បង្ហាញនូវបច្ចេកវិទ្យាចុងក្រោយរបស់ខ្លួន ដែលជួយដល់បរិស្ថាននេះដល់ម្ចាស់បុរី និងម្ចាស់សំណង់នានា ក្នុងន័យរួមចំនែកកាត់បន្ថយការចំនាយ និងទទួលបានមកវិញនូវអត្ថប្រយោជន៍ច្រើនទៅលើការប្រើប្រាស់អំពូលបច្ចេកវិទ្យាចុងក្រោយរបស់ជប៉ុន។

 

ប្រភព៖ ក្រសួងបរិស្ថាន