ក្រុមហ៊ុនផលិតដែករបស់ចិន បោះទុន ២ពាន់លានដុល្លារនៅវៀតណាមដើម្បីបើករោងចក្រ!

ដូចយើងទាំងអស់គ្នាបានដឹងស្រាប់មកហើយ បច្ចុប្បន្ននេះប្រទេសចិនកំពុងព្យាយាមយករោងចក្រ និងឧស្សាហកម្មលោកហៈធាតុរបស់ខ្លួនចេញពីប្រទេស ក្នុងគោលបំណងកាត់បន្ថយសង្វាក់ផលិតកម្មក្នុងស្រុកដែលប៉ះពាល់ដល់បរិស្ថាន និងកាត់បន្ថយនូវការចំណាយកម្លាំងពលកម្មបានតិចជាងមុនផងដែរ។ យ៉ាងណាក៏ដោយ សម្រាប់ប្រទេសក្រីក្រកំពុងអភិវឌ្ឍន៍ គេត្រូវការឧស្សាហកម្មទាំងនោះ ដើម្បីបង្កើតការងារច្រើនជូនប្រជាជន និងអភិវឌ្ឍន៍សេដ្ឋកិច្ច។ ដូចនេះហើយទើបថ្មីៗនេះ ឧស្សាហកម្មផលិតលោហៈធាតុមួយរបស់ប្រទេសចិនមានឈ្មោះថា Mintal Group ទើបតែបង្ហាញនូវគម្រោងក្នុងការបោះទុនលើទឹកដីវៀតណាមដើម្បីសាងសង់រោងចក្រផលិតលោហៈអ៊ីណុក (Stainless Steel) និងលោហៈមិនមានជាតិដែក ហើយត្រៀមបោះទុនជាង ២ ពាន់លានដុល្លារឯណោះ។ 

គម្រោងនេះត្រូវបានពិភាក្សារវាងក្រុមហ៊ុន Mintal Group និងគណកម្មាធិកាខេត្ត Thanh Hoa ប្រទេសវៀតណាម។ ហើយប្រសិនបើមានការព្រមព្រៀងអាចដំណើរការទៅបាន នោះក្រុមហ៊ុន Mintal Group នឹងវិនិយោគទឹកប្រាក់ ២ ពាន់លានដុល្លារ ដើម្បីសាងសង់រោងចក្រ Ferocrom ក្នុងទំហំដី ៣០០ ហិតតា នៅក្នុងតំបន់សេដ្ឋកិច្ច Nghi Son Economic Zone និងផលិតលោហៈធាតុទាំង ២ ប្រភេទខាងលើ ដោយដំណាក់កាលទីមួយ គេនឹងផលិតលោហៈអ៊ីណុក (Stainless Steel) ឲ្យបាន ១.៥ លានតោនក្នុងមួយឆ្នាំ ហើយដំណាក់កាលទីពីរ នឹងផលិតលោហៈគ្មានជាតិដែកឲ្យបាន ១ លានតោនក្នុងមួយឆ្នាំ។ ចំណែកឯផ្នែកវត្ថុធាតុដើមដែលត្រូវផលិតនោះ ក្រុមហ៊ុនចិន Mintal Group បានត្រៀនខ្លួនរួចជាស្រេចក្នុងការទិញទ្វីបអាហ្វ្រិចខាងត្បូងចំនួន ៨០% ហើយចំណែក ២០% ទៀតគឺរំពឹងទិញពីប្រទេសវៀតណាមផ្ទាល់តែម្ដង។ 

និយាយអំពីការចុះកិច្ចព្រមព្រៀងនេះ ភាគីខាងវៀតណាមកំពុងស្ថិតក្នុងការសិក្សាអំពីទីតាំង ដែលត្រូវដំណើរការនោះ ហើយប្រសិនបើគ្មានបញ្ហានោះទេ ការចាប់ផ្ដើមសាងសង់អាចនឹងនៅក្នុងខែកញ្ញា ឬតុលានេះតែម្ដង។ យ៉ាងណាមិញ គណកម្មាធិការខេត្ត Thanh Hoa បានបង្ហាញថា ក្រុមហ៊ុន Mintal Group ត្រូវតែពាំនាំយកនូវបច្ចេកវិទ្យាចុងក្រោយ និងទំនើបក្នុងការផលិតក្នុងការកាត់បន្ថយសារធាតុបំពុលក្នុងបរិយាកាស ដើម្បីគោរពតាមច្បាប់វិនិយោគរបស់ប្រទេសវៀតណាទៅលើច្បាប់ការពារបរិស្ថាននេះ។ 

នៅក្នុងកិច្ចប្រជុំខាងលើនេះ ក្រុមហ៊ុន Mintal Group និង ក្រុមប្រឹក្សាភិបាលរបស់តំបន់សេដ្ឋកិច្ច និងឧស្សាហកម្ម Nghi Son បានចុះនូវអនុស្សារណៈយោគយល់ (MoU) ក្នុងការវិនិយោគរោងចក្រ Ferocrom ដើម្បីផលិតលោហៈអ៊ីណុក និងលោហៈគ្មានជាតិដែករួចមកហើយ ដូចនេះការសាងសង់អាចនឹងដំណើរការឆាប់ៗនេះ។ 

គូសបញ្ចាក់ផងដែរថា ក្រុមហ៊ុន Mintal Group មាននូវរោងចក្រ Ferocrom មួយក្នុងប្រទេសចិនរួចមកហើយ ដែលជារោងចក្រឈានមុខក្នុងការផលិតលោហៈទាំង ២ ខាងលើ ហើយក្រុមហ៊ុននេះកំពុងដំណើរការមួយជ្រុងទៀតក្នុងប្រទេសវៀតណាម ដែលរំពឹងថាវានឹងជួយដល់សង្វាក់ផលិតកម្មនាំចេញឲ្យបានកាន់តែច្រើនឡើង។