កំពង់ស្ពឺ៖ ស្របតាមភាពចាំបាច់ជាអាទិភាព និងតម្រូវការជាក់ស្តែង ស្ពានឈើ និងស្ពានដែក តូចចង្អៀត ចាស់ទ្រុឌទ្រោម ត្រូវបានជំនួសដោយ ស្ពានបេតុងធំទូលាយ រឹងមាំ លើកំណាត់ផ្លូវជាតិលេខ៤៦ ដែលជាផ្លូវឡើងទៅ ឧទ្យានជាតិព្រះសុរាម្រិតកុសុមៈគីរីរម្យ (ឧទ្យានជាតិគីរីរម្យ) ស្ថិតនៅភូមិថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ។

គួរឲ្យដឹងដែរថា គម្រោងស្ថាបនាស្ពានបេតុង ២កន្លែងនេះ កំពុងត្រូវបានអនុវត្តដោយ មន្ទីរសាធារណការ និងដឹកជញ្ជូនខេត្តកំពង់ស្ពឺនេះ រួមមាន៖ ស្ពានទី១ មានប្រវែង១៨ម៉ែត្រ ទទឹង៩ម៉ែត្រ ត្រង់គ.ម១៤+១០០(ស្ពានអូរកសេះ) និងស្ពានទី២ មានប្រវែង៣៦ម៉ែត្រ ទទឹង ៩ម៉ែត្រ ត្រង់គ.ម២២+៥០០(ស្ពានអូរតាសេក)។

គិតមកដល់បច្ចុប្បន្ន ស្ពានដ៏គត់មត់នេះ សម្រេចការសាងសង់ជាង ៨០%ហើយ ក្រោយដំណើរការបើកការដ្ឋានស្ថាបនា កាលពីថ្ងៃទី២៧ ខែសីហា ឆ្នាំ២០២៤ កន្លងទៅ។

បន្ថែមពីនេះដែរ ការដ្ឋានគ្រោងនឹងបញ្ចប់ ការសាងសង់នៅចុងខែមីនា ឆ្នាំ២០២៥ ហើយនឹងដាក់ឱ្យដំណើរការប្រើប្រាស់ នៅមុនពិធីបុណ្យចូលឆ្នាំថ្មី ប្រពៃណីជាតិខ្មែរខាងមុខនេះហើយ ដើម្បីសម្រួលដល់ការធ្វើដំណើរ របស់ភ្ញៀវទេសចរជាតិ និងអន្តរជាតិ មកទស្សនារមណីយដ្ឋានដ៏ពេញនិយមមួយនេះ។

ប្រភព៖ ឯ. ផន រឹម អ្នកនាំពាក្យក្រសួងសាធារណការ និងដឹកជញ្ជូន