រមណីយដ្ឋានស្ទឹងពពក ស្ថិតនៅស្រុកស្វាយលើ ខេត្តសៀមរាប ជាគោលដៅទេសចរណ៍ បែបធម្មជាតិ កំពុងមានប្រជាប្រិយភាពមួយ ប្រចាំខេត្តសៀមរាប និងទទួលបានការវិនិយោគ រៀបចំជារីសត ពីក្រុមហ៊ុនឯកជន នៅក្នុងតំបន់ ដើម្បីបង្កើតកន្លែងកម្សាន្ដ អោយបានច្រើន សម្រាប់សក្ដានុពល ប៉ូលទេសចរណ៍ខេត្តសៀមរាប ផងដែរ។

រដ្ឋបាលខេត្តសៀមរាប បានបង្ហាញរមណីយដ្ឋាន ទេសចរណ៍ធម្មជាតិមួយ ស្ថិតនៅប៉ែកខាងកើត ភ្នំគូលែន (ភូមិតាពេញ ឃុំខ្នងភ្នំ ស្រុកស្វាយលើ ខេត្តសៀមរាប) មានឈ្មោះថាស្ទឹងពពក ដែលភ្ញៀវទេសចរគួរតែ ទៅកម្សាន្ដនៅរដូវភ្លៀងនេះ និងរដូវរងារ ពីព្រោះតំបន់ភ្នំ នឹងបញ្ចេញសម្រស់ យ៉ាងស្រស់បំព្រង អមជាមួយស្ទឹងពពក ដែលសម្ពាធចុះទាប ផ្ដល់នូវទស្សនីយភាពប្លែកភ្នែក ក្រៅពីការទស្សនាកម្សាន្ដ នៅប្រាសាទ។

ភ្ញៀវទេសចរអាចទៅកម្សាន្ដ នៅតំបន់ស្ទឹងពពកនោះ ស្ថិតនៅតំបន់ពើងទប់ព្រះ និងពើងវត្តចាស់ ដែលផ្លូវទៅដល់ពើងទប់ព្រះ អាចចូលដល់ត្រឹមតែ ម៉ូតូប៉ុណ្ណោះ ដោយសារផ្លូវតូច ចំណែកពើងវត្តចាស់ អាចជិះឡានចូលបាន។

ក្រៅពីមានទេសភាពស្រស់ស្អាតហើយ ភ្ញៀវទេសចរក៏អាច ចូលកម្សាន្ដនៅ រមណីយដ្ឋានកែច្នៃ ២ កន្លែង ជាប់នឹងជើងភ្នំផងដែរ សម្រាប់ការបោះតង់ ស្នាក់នៅ រីសតលំហែកាយ រួមជាមួយអាហាឆ្ងាញ់ ប្រចាំនៅស្រុកស្វាយលើ ដូចជា ជ្រូកកណ្ដុរអាំងទឹកឃ្មុំ មាន់ដុតចុងសោម និងបុកក្រហមជាដើម។