ប្រាសាទលាក់នាង ត្រូវបានកសាងឡើង អំពីឥដ្ឋបែរមុខទៅទិស ខាងកើតនៅភាគទី២ នៃសតវត្សរ៍ទី១០ ក្នុងឆ្នាំ៩៦០ ដោយព្រះបាទរាជេន្រ្ទវរ្ម័ន ដើម្បីឧទ្ទិសថ្វាយដល់ ព្រហ្មញ្ញសាសនា។ ប្រាសាទលាក់នាង មានទីតាំងស្ថិតនៅ ស្ទើរតែជាប់ប្រាសាទប្រែរូប ផ្នែកខាងឥសាន មានចំងាយប្រហែល ១០០ម៉ែត្រ នៅខាងកើត ផ្លូវចូលទៅភូមិតាព្រៃ។

មិនទាន់មានសិលាចារឹកណាមួយ បញ្ជាក់ពីប្រវត្តិប្រាសាទនេះ នៅឡើយទេ តែបើយោងតាម ស្ថាបត្យកម្មប្រាសាទនេះ និងប្រាសាទបី នៅខាងជើងភ្នំបាខែង គឺសាងសង់ក្នុង សម័យកាលតែមួយ (ចុងសតវត្សរ៍ទី៩ ឬដើមសតវត្សរ៍ទី១០) និងទស្សនៈវិស័យដូចគ្នា។ ទ្រង់ទ្រាយប្រាសាទលាក់នាងមាន ប្រាង្គបីសង់លើខឿនតែមួយ ប្រាង្គសងខាង បានបាក់រលំទាំងស្រុង នៅសល់តែប្រាង្គកណ្តាលប៉ុណ្ណោះ មានភាពល្អស្អាត។ ផ្តែរប្រាសាទ មិនទាន់ឆ្លាក់រួចរាល់នោះទេ បានត្រឹមជារាងដងធ្នូតែប៉ុណ្ណោះ។ សសរពេជ្រគ្រប់ទិសទាំងបួន មានសភាពទ្រុឌទ្រោមប្រេះស្រាំ ទោះជាយ៉ាងណា ក៏នៅតែរក្សាតួនាទីទ្រផ្តែរប្រាសាទ ដើម្បីបង្ហាញពី ភាពរឹងមាំរបស់ខ្លួន។ បើយើងចូលមើលខាងក្នុង នៃប្រាង្គកណ្តាល យើងនឹង ឃើញភាពសោកសៅ នៃការគាស់កកាយលួចយក វត្ថុមានតម្លៃ ទម្រលិង្គត្រូវបាន យកចេញពីប្រាសាទ និងបំផ្លាញខ្ចាត់ខ្ចាយ ជាដុំធំៗនៅក្បែរប្រាសាទ។

ចំពោះឈ្មោះស្ទួននៃប្រាសាទ ដែលមានវត្តមាន នៅលើទឹកដីប្រទេសកម្ពុជា មានរាយដូចខាងក្រោម៖

១. ប្រាសាទលាក់នាង (ខាងជើងភ្នំបូក ខេត្តសៀមរាប រចនាបថបាខែង)

២. ប្រាសាទលាក់នាង (ក្រុមប្រាសាទតំបន់កោះកែរ រចនាបថកោះកែរ ខេត្តព្រះវិហារ)

៣. ប្រាសាទលាក់នាង (ចម្ងាយប្រហែល៥០ម៉ែត្រភាគឦសាន្តនៃប្រាសាទប្រែរូប រចនាបថបន្ទាយស្រី ឥទ្ធិពលកោះកែរ ក្រុមប្រែរូប ខេត្តសៀមរាប)

៤. ប្រាសាទលាក់នាង (ឈ្មោះក្នុងការស្រាវជ្រាវ  ប្រាសាទលក្ខណ៍នាង តែតាមសិលាគោលមុខប្រាសាទ ចារឹកថាលាក់នាង នៅក្បែរប្រាសាទតាកែវ ជា "អរោគ្យសាលា ១ក្នុងចំណោម១០២" រចនាបថបាយ័ន ខេត្តសៀមរាប)៕