ធ្វើយ៉ាងណាដើម្បីបន្តភាពជោគជ័យរបស់អ្នក ឲ្យបានកាន់តែខ្លាំង និងបានយូរអង្វែង?

មនុស្សគ្រប់រូបតែងតែប្រាថ្នាចង់បាន ភាពជោគជ័យទៅលើអ្វីដែលពួកគេធ្វើ មិនថាការសិក្សា ការងារ និងការចាត់ចែងផ្លូវជីវិតរបស់ពួកគេឡើយ។ គ្មានអ្នកណាម្នាក់ចង់បរាជ័យឡើយ អ្នកខ្លះទៀតគាត់បានជោគជ័យទៅលើរឿងមួយហើយ ប៉ុន្តែគាត់មិនអាចឈរជើង និងស្ថិតនៅលើកន្លែងដែលគាត់ចង់បាននោះយូរឡើយ។ 

នៅក្នុងអត្ថបទនេះ នឹងបង្ហាញអ្នកទាំងអស់គ្នា ពីភាពជោគជ័យរបស់មនុស្ស, អ្វីទៅជាភាពជោគជ័យ? ធ្វើយ៉ាងណាអាចឲ្យមនុស្សវិវត្តខ្លួន ពីភាពជោគជ័យ ទៅកាន់ជោគជ័យឲ្យបានកាន់តែខ្លាំង? និងហេតុអ្វីបានជាមនុស្សមួយចំនួនធំ មិនអាចសម្រេចវាបាន?

  • ជោគជ័យគឺជាចំណង់

ហេតុអ្វីបានជោគជ័យគឺជាចំណង់? យើងអាចធ្វើការបកស្រាយបានថា ដូចដែលបានដឹងស្រាប់ហើយ មនុស្សទាំងអស់ តែងតែចង់បានភាពជោគជ័យទៅនឹងអ្វីដែលពួកគេធ្វើ ជោគជ័យនៅក្នុងអាជីពជាដើម ដូចនេះវាគឺជាចំណង់ដ៏ធំមួយ ដែលមនុស្សប្រាថ្នាចង់បាន។ ពួកគេនឹងធ្វើគ្រប់បែបយ៉ាងដើម្បីទទួលបានភាពជោគជ័យ ឲ្យត្រូវតាមអ្វីដែលពួកគេចង់បាន។ ប៉ុន្តែវានៅតែជាបញ្ហា ព្រោះមនុស្សមួយចំនួនធំ ចង់បានអ្វីលើសពីសមត្ថភាពដែលពួកគេអាចធ្វើទៅបាន។ លោក Greg McKeown អ្នកនិពន្ធ Essentialism បានបង្ហាញថាភាពជោគជ័យ គឺជាកត្តាជម្រុញអ្នកទៅកាន់ការបរាជ័យ។ ឧទាហរណ៍ថា បើសិនជាអ្នកទទួលបានជោគជ័យទៅលើអ្វីមួយហើយ ជាធម្មតាទេ ភាពជោគជ័យរបស់អ្នកនឹងជះឥទ្ធិពលទៅកាន់មនុស្សជុំវិញខ្លួន អ្នកខ្លះគេពេញចិត្ត និងភាពជោគជ័យនេះ ប៉ុន្តែមនុស្សមួយចំនួនធំទៀត មិនពេញចិត្តឲ្យអ្នកជោគជ័យឡើយ គេនឹងព្យាយាមទាញអ្នកទម្លាក់ពីកំពូលនៃភាពជោគជ័យរបស់អ្នកនោះ ដូចដែលគេបាននិយាយថាកាន់តែខ្ពស់ កាន់តែមានគ្រោះថ្នាក់។រហូតដល់ធ្វើឲ្យអ្នកមានសំពាធ និងមានភាគរយតិចតួចបំផុត ដែលអ្នកអាចឈរជើងនៅលើកំពូល បានយូរ។ នៅក្នុងជីវិតពិតវាបែបនេះហើយ កាន់តែជោគជ័យ កាន់តែមានអ្នកស្អប់ និងមិនពេញចិត្តច្រើន។ នេះជាមូលហេតុ ដែលមនុស្សជោគជ័យបានតែដំបូងប៉ុណ្ណោះដែលវាក៏ជាចំណង់ដំបូងបំផុតរបស់ពួកគេដែរ។

  • ភាពជោគជ័យគឺជារឿងមួយដែលពិបាកប្រឈមមុខជាមួយ ជាងភាពបរាជ័យទៅទៀត

ចំណុចនេះសំដៅខ្លាំងទៅលើមនុស្សប្រុស។ ស្ទើរតែគ្រប់បុរសទាំងអស់ តែងតែមានភាពអត់ធ្មត់នៅជាប់នៅក្នុងខ្លួនជានិច្ច ទៅលើការដោះស្រាយបញ្ហានានា ប៉ុន្តែគ្រប់យ៉ាងប្រែប្រួលនៅពេលដែលគាត់ធ្វើវាបាន និងទទួលបានជោគជ័យទៅលើរឿងណាមួយ ហើយចរិកពួកគាត់នឹងផ្លាស់ប្តូរមួយរំពេច បើសិនជាគាត់មានអំណាច ទៅលើផ្នែកណាមួយ។ នេះបើតាមការលើកឡើងរបស់លោក Abraham Lincoln។ បញ្ហាដែលមនុស្សជោគជ័យតែងតែប្រឈមមុខ ជាមួយនោះ គឺជាការបែងចែកពេលវេលា ការគ្រប់គ្រងប្រាក់កាស និងការរក្សាកិត្តិយស។ មនុស្សប្រុសសឹងតែទាំងអស់ទៅហើយ ស្រឡាញ់មុខមាត់ និងកិត្តិយសខ្លាំងណាស់ ជាពិសេសនៅពេលដែលគាត់ល្បី ឬជោគជ័យទៅលើចំណុចណាមួយ នៅក្នុងហ្វូងសមាជិករបស់គាត់។ គាត់ខ្លាចបំផុតហើយ គឺការបាក់មុខ។ គាត់ខ្លាចគាត់នឹងបរាជ័យ ហើយមនុស្សជោគជ័យក៏ជាមនុស្សដែលគិតច្រើនបំផុតដែរ។ ប៉ុន្តែបើសិនជាមនុស្សបរាជ័យស្រាប់ គាត់ស៊ាំនឹងប្រឈមមុខជាមួយបញ្ហាទៅហើយ អ្វីដែលគាត់ត្រូវធ្វើ គឺជាការទាញខ្លួនគាត់ឲ្យក្រោកឡើង និងអភិវឌ្ឍខ្លួនគាត់ឲ្យបានកាន់តែរីកចម្រើនតែប៉ុណ្ណោះ។

  • ភាពជោគជ័យ និង សមិទ្ធផល

ពាក្យពីរនេះ វាស្រដៀងគ្នាដែរ អត្ថន័យក៏ប្រហាក់ប្រហែលគ្នាដែរ សូម្បីតែទៅលើពាក្យជាភាសាអង់គ្លេសក៏ដោយ (Success Vs Achievement)។ ប៉ុន្តែបើធ្វើការវិភាគឲ្យច្បាស់ទៅ វាមិនដូចគ្នាទេ!!​ “ភាពជោគជ័យវាស្តែងចេញពីអារម្មណ៍នៃការសម្រេចទៅលើអ្វីមួយ ពាក់ព័ន្ធនឹងរបៀបនៃការធ្វើ ទាក់ទងទៅនឹងមូលហេតុដែលអ្នកត្រូវតែធ្វើអ្វីមួយ។ ឬឯសមិទ្ធផលវីញគឺជារង្វាស់នៃគោលដៅអំពីអ្វីដែលអ្នកបានធ្វើទៅវិញ។ ជាទូទៅភាពជោគជ័យមានសារៈសំខាន់ ជាងសមិទ្ធផល។ ជាការពិតណាស់ ក្រុមហ៊ុនមួយ អាចបង្កើតបានសមិទ្ធផលជាច្រើននៅក្នុងពិភពលោក ប៉ុន្តែពុំទទួលបានភាពជោគជ័យនៅលើទីផ្សារ ឬឆាកអន្តរជាតិឡើយ ដូចក្រុមហ៊ុន “Nokia និង LG”  នៅក្នុងពេលបច្ចុប្បន្នអញ្ចឹងដែរ ដែលអាចបង្កើតសមិទ្ធផលជាស្មាតហ្វូន និងគ្រឿងអេឡិចត្រូនិចបានច្រើនលានគ្រឿង ប៉ុន្តែពុំអាចប្រជែងទីផ្សារបានឈ្នះ Samsung Apple ឡើយ។ ដើម្បីទទួលបានភាពជោគជ័យនៅក្នុងអ្វីមួយ ជំហ៊ានទីមួយអ្នកត្រូវសម្រេចបានជាសមិទ្ធផលល្អ ជាមួយនឹងគោលបំណង និងការគិតពិចារណាច្បាស់លាស់ឲ្យបានត្រូវនឹងទីផ្សារ ឬកាលៈទេសៈ ទើបអាចទៅរួច។

  • ពីភាពជោគជ័យ ទៅកាន់ជោគជ័យកាន់តែខ្លាំង

ភាពជោគជ័យ អាចសម្រេច និងស្របទៅបានតាមអត្តចរិក និងបុគ្គលិកលក្ខណៈរបស់បុគ្គលម្នាក់។ ដោយលោក “Jim Rohn”!

ត្រូវហើយភាពជោគជ័យគឺជាចំណង់ ដែលអ្នកអាចសម្រេចបាននៅពីខាងដើមដំបូងគេបំផុត ប៉ុន្តែដើម្បីបន្តការជោគជ័យ ឲ្យបានយូរអង្វែង និងកាន់តែជោគជ័យខ្លាំងនោះ វាមិនមែនជារឿងងាយស្រួលឡើយ ហើយក៏ពុំមានមនុស្សច្រើន ដែលអាចធ្វើវាបានដែរ។ ស្វែងរកភាពជោគជ័យ ដូចស្រដៀងទៅនឹងការស្វែងរកសុភមង្គលអញ្ចឹងដែរ។ អ្នកមិនអាចឈប់បានឡើយ អ្នកត្រូវបន្តដំណើរ នៃការស្វែងរក ការថែរក្សាវា ទៅតាមអ្វីដែលអ្នកអាចធ្វើទៅបាន ទៅតាមសមត្ថភាពដែលអ្នកមាន និងមិនត្រូវឈប់ឬនៅមួយកន្លែងឡើយ។ មនុស្សជាច្រើន ពេលដែលគាត់ទទួលបានភាពជោគជ័យម្តងហើយ គាត់មិនសូវខ្វល់នឹងរកអ្វីថ្មី ឬបន្តអភិវឌ្ឍភាពជោគជ័យនេះឡើយ គាត់នៅតែបន្តធ្វើវាដដែលជាប្រចាំ ទោះបីជាពេលវេលាកន្លងផុត ឬមានដៃគូប្រជែងថ្មីៗមានការកើនឡើងជាបន្តបន្ទាប់ក៏ដោយ។ នេះហើយ ដែលជាមូលហេតុទាញគាត់ ទៅជាបរាជ័យវិញ។ 

ដើម្បីធ្វើឲ្យការជោគជ័យរបស់អ្នកបានកាន់តែ ជោគជ័យខ្លាំង និងបន្តបានយូរនោះ អ្នកត្រូវតែដុសខាត់ខ្លួនឲ្យបានកាន់តែខ្លាំង និងល្អពីមួយថ្ងៃទៅមួយថ្ងៃ ចេះវិភាគ និងស្តាប់យោបល់មនុស្សនៅជុំវិញខ្លួន ព្រោះពេលមួយដែលអ្នកជោគជ័យ អ្នកត្រូវប្រឈមជាមួយនឹងបញ្ហាជាច្រើនឡើងទៅតាមកម្រិតនៃភាពជោគជ័យរបស់អ្នក។ លើសពីនេះអ្នកក៏ត្រូវតែចេះអត់ធ្មត់កាន់តែច្រើន ចេះគ្រប់គ្រងខ្លួនឯងគ្រប់ស្ថានការណ៍ ចេះរវាសក្នុងការដោះស្រាយបញ្ហាដែលកើតមានឡើងភ្លាមៗ និងសម្របខ្លួនទៅតាមបំរែបំរួល នៅក្នុងសង្គមនៃពេលបច្ចុប្បន្ន។ ជាពិសេសអ្នកត្រូវចាំថាជោគជ័យកើតចេញពីខ្លួនអ្នក ហើយអ្នកត្រូវតែធ្វើអ្វីដែលអ្នកពេញចិត្ត ដើម្បីសម្រេចបានភាពជោគជ័យ