តើបច្ចេកវិទ្យា (Kinetic Facades) មានសារៈប្រយោជន៍អ្វីខ្លះ នៅក្នុងវិស័យស្ថាបត្យកម្មទំនើប?

សម្រាប់ភាគច្រើន ដូចដែលយើងបានដឹងរួចមកហើយ គម្រោងស្ថាបត្យកម្មដែលគួរឲ្យចាប់អារម្មណ៍ត្រូវបានធ្វើឡើងតាមរយៈសម្ភារៈ និងគ្រឿងតុបតែង ដែលមានដូចជាគ្រឿងចម្លាក់នៃសំណង់ រចនាបថម៉ូដប្លែកៗ ឬការប្រើកញ្ចក់សម្រាប់បិទនៅផ្នែកខាងក្រៅ ភាគច្រើនមាននៅតាមបណ្តាអាគារខ្ពស់ៗដូចជា Skyscrapers ជាដើម។ ប៉ុន្តែគ្រឿងសំភារៈអស់នោះ មិនអាចថិតថេរ និងរក្សាគុណភាពបានយូរឆ្នាំពេកនោះទេ វានឹងរងឥទ្ធិពល តាមរយៈអាកាសធាតុ ដែលវានឹងអាចទៅជាច្រែះ ឬពុកផុយក៏ថាបាន។

ដោយសារបច្ចេកវិទ្យាមានការជឿនលឿន ដែលភាគច្រើន មានការវិវត្តន៍ខ្ពស់ទៅលើផ្នែកខាងមុខនៃអាគារ ដែលវានឹងមិនរងផលប៉ះពាល់ពីសំណឹកនៃបរិយាកាសឡើយ។ ក្រុមស្ថាបត្យករបានប្រើប្រាស់បច្ចេកវិទ្យាទំនើបៗ ដែលអាចឆ្លើយតបទៅនឹងរំញោចបរិស្ថាន បានកាន់តែទាក់ទាញ និងកាន់តែគួរឲ្យចាប់អារម្មណ៍ជាងមុន។ ផ្នែកស្ថាបត្យកម្ម ដែលមានទម្រង់អនុវត្តតាមការផ្លាស់ប្តូរនៃទម្រង់ Monoliths មានការវិវត្តន៍ទៅមុខជាដរាប។

Kinetic facades អាចនឹងធ្វើឲ្យសំណង់ស្ថាបត្យកម្មសម្របជាមួយនឹងការផ្លាស់ប្តូរបរិយាកាសជាច្រើនប្រភេទ រៀងរាល់ឆ្នាំ។ ជាទូទៅក្រុមស្ថាបត្យករ បានរចនាសំណង់អាគារផ្នែកខាងមុខ ជាមួយនឹងរចនាបថបែប Kinetic នេះដើម្បីបង្កើនសោភ័ណភាពនៃអាគារ ព្រមទាំងអាចដំណើរការឧបករណ៍សំណង់ទំនើបៗ ក្នុងការទប់ស្កាត់ឥទ្ធិពលនៃបរិយាកាស និងអាចរក្សាបរិស្ថានដែលនៅជុំវិញផងដែរ។ ជាឧទាហរណ៍ជាក់ស្តែង គម្រោងស្ថាបត្យកម្ម Aedas Architects ដែលមាននៅលើអាគារខ្ពស់ AI Bahar នៅក្នុងទៅក្រុង Abu Dhabi ដែលរចនាបថ Kinetic នៃអាគារនេះ គឺជាបន្ទះក្តារដែលមានរាងដូចឆ័ត្របើកនិងបិទ ដើម្បីឆ្លើយតបទៅនឹងចលនារបស់ព្រះអាទិត្យ ការពារអាគារពីការជ្រៀតចូលខ្លាំងនៃកំដៅព្រះអាទិត្យ និងការចាំងផ្លាតបានខ្ពស់បំផុត។ វាអាចកាត់បន្ថយការចំណាយទៅលើ ការប្រើប្រាស់ម៉ាស៊ីនត្រជាក់បានច្រើន ក៏ដូចជារក្សានិរន្តភាពរបស់អាគារទាំងមូលឲ្យបានយូរអង្វែងផងដែរ។ បន្ទះនេះ មិនត្រឹមតែបង្កើនសោភ័ណភាព និងការពារអាគារ ប៉ុណ្ណោះទេ ប៉ុន្តែវាក៏ត្រូវបានសាងសង់ឡើងក្នុងទម្រង់ជាបែបប្រពៃណីឥស្លាម ដែលប្រជាជននៅទីនោះប្រកាន់ខ្ជាប់ និងគោរពបានយ៉ាងល្អផងដែរ។

ខាងសំណង់ស្ថាបត្យកម្មផ្សេងៗទៀតក៏បានប្រើប្រាស់ទម្រង់រចនាបថ Kinetic Facades ដើម្បីសម្របសម្រួលសីតុណ្ហភាពទៀតផង។ ទៅលើ Showroom បច្ចេកវិទ្យានៃ Ernst Giselbrecht + Partner’s Kiefer វាគឺជាឧទាហរណ៍បញ្ជាក់មួយផ្សេងទៀត។វាប្រើប្រាស់ក្បឿងធំៗចំនួន 112 សន្លឹក ដើម្បីបង្កើតជាស្រមោលបាំង បានយ៉ាងស្អាត និងល្អជាទីបំផុត។ អ្នកនៅក្នុងអាគារ ក៏អាចធ្វើការបញ្ជាទៅលើក្បឿងនេះ ជារនាំងក្នុងការសម្រួលផ្នែកខាងមុខអាគារ ទៅតាមអ្វីដែលពួកគេត្រូវការបាន។

រចនាបថនៃ Enric Ruiz Geli’s Media-ICT មានលក្ខណៈស្រដៀងទៅនឹងស្រោម ឬបន្ទះនៃថង់ការពារ ដែលប្រើបាននៅរដូវរងារដើម្បីបំលែងថាមពល ព្រះអាទិត្យទៅជាកម្តៅ និងបិទនៅពេលរដូវក្តៅដើម្បីជាម្លប់។ វាអាចជាសម្របទៅតាមបរិស្ថាន និងអាកាសធាតុដែលអាចផ្តល់ផាសុកភាព នៃមនុស្សដែលស្នាក់នៅខាងក្នុង។

ថ្វីត្បិតតែផ្នែកខាងមុខមានរចនាបថខុសៗគ្នាជាច្រើនទម្រង់ប៉ុន្តែវាត្រូវបានប្រើដើម្បីបង្កើនសោភ័ណភាពសំណង់ស្ថាបត្យកម្មនិងអាចបញ្ជាបានដើម្បីសម្របទៅតាមបរិយាកាសនិងបរិស្ថាននិងតម្រូវទៅតាមតម្រូវការនៃមនុស្សដែលរស់នៅខាងក្នុងអាគារនីមួយៗដែលនេះហើយគឺជាមុខងារ Kinetic façade 

 

ភាគច្រើនបច្ចេកវិទ្យាមួយនេះមានប្រើតែនៅសំណង់អាគារទំនើបខ្ពស់ៗ និងទាន់សម័យប៉ុន្តែ ដែលយើងក៏អាចនឹងឃើញមានវត្តមានវា ចាប់ពីពេលនេះតទៅ ទៅលើគម្រោងស្ថាបត្យកម្មក្រោយៗទៀត។