រតនគិរី៖ ភ្ញៀវទេសចរ ដែលបានធ្វើដំណើរទៅកំសាន្តនៅខេត្តរតនគិរី ក្នុងឱកាសថ្ងៃឈប់សំរាកចំនួន ៥ ថ្ងៃ ក្នុងឆ្នាំ ២០២០ កន្លងទៅនេះ នៅតែបន្តមានការកើនឡើង ទោះបីស្ថិតក្រោមការវាយប្រហារនៃជំងឺកូវីដ ១៩ ក៏ដោយ ដោយក្នុងនោះផ្ទះសំណាក់ សណ្ឋាគារ មានភ្ញៀវកក់ និងស្នាក់នៅពេញៗតែម្ដង។
តាមរយៈការបញ្ជាក់ របស់លោក ង៉ែត ពិទូ ប្រធានមន្ទីរទេសចរណ៍ខេត្ដរតនគិរីបានឱ្យដឹងថា នៅក្នុងរយៈពេល ៥ថ្ងៃ នៃការឈប់សម្រាកសងថ្ងៃបុណ្យចូលឆ្នាំខ្មែរ គិតចាប់ពីថ្ងៃទី១៧ រហូតដល់ថ្ងៃទី ២១ ខែសីហា ម្សិលមិញនេះ មានភ្ញៀវទេសចរចំនួន ៥០,៦២៨ នាក់ ដោយក្នុងនោះភ្ញៀវអន្តរជាតិចំនួន ១៧៩ នាក់ បានមកលេងកម្សាន្តនៅតាមតំបន់រមណីយដ្ឋានធម្មជាតិជាច្រើន ក្នុងខេត្តខេត្តរតនគិរី។ ជាលទ្ធផលផ្ទះសំណាក់ និងសណ្ឋាគារជាច្រើន មានភ្ញៀវស្នាក់នៅពេញទាំងអស់។
លោក ង៉ែត ពិទូ បានបញ្ជាក់បន្ថែមទៀតថា គិតត្រឹមល្ងាចថ្ងៃទី ២១ ភ្ញៀវទេសចរបានមកទស្សនា កម្សាន្តតាមរមណីយដ្ឋាននៅក្នុងខេត្តរតនគិរីមានចំនួន ១៤ កន្លែង សុទ្ធសឹងជារមណីយដ្ឋានធម្មជាតិ ដែលកំពុងពេញនិយម។ ក្នុងនោះតំបន់រមណីយដ្ឋាន ដែលមានភ្ញៀវទេសចរ ទៅលេងកម្សាន្តយ៉ាងច្រើនជាងគេមាន ៣ កន្លែងរួមមាន៖
ក. បឹងយក្សឡោម
ខ. ទឹកធ្លាក់អូរស៊ឺនលែ
គ. បឹងលំកុដ
ក្រៅពីរមណីយដ្ឋានធម្មជាតិទាំងបីកន្លែងនេះ ក៏មានរមណីយដ្ឋានដទៃទៀតដែរ ដែលមានភ្ញៀវទេសចរជាតិ និងអន្តរជាតិ ទៅលេងកម្សាន្តយ៉ាងច្រើនកុះករ។ លោកបានកត់សម្កាល់ឃើញថា ក្នុងរយៈពេល៥ថ្ងៃនេះ គ្រប់រមណីយដ្ឋានដែលភ្ញៀវបានទៅលេងកម្សាន្ត គឺភ្ញៀវទេសចរទាំងអស់បានចូលរួមថែរក្សាអនាម័យ បរិស្ថានបានល្អពោលគឺ ក្រោយហូបចុករួចពួកគាត់បានវេចខ្ចប់សំរាមទុកដាក់បានត្រឹមត្រូវ។
ជាមួយគ្នានេះ ភ្ញៀវទេសចរណ៍មានស្មារតីម្ចាស់ការចូលរួមការពារទប់ស្កាត់ជំងឺកូវីដ១៩ តាមរយៈការចូលខ្លួនឱ្យបាញ់កម្ដៅការលាងសម្អាតដៃនៅតាមឡាបូសាធារណៈ ដែលបានរៀបចំជូននៅតាម រមណីយដ្ឋាននានា ការពាក់ម៉ាស់ និងការរក្សាគម្លាតសង្គមជាដើម។ លោកប្រធានមន្ទីរទេសចរណ៍ខេត្ដក៏បានថ្លែងអំណរគុណយ៉ាងជ្រាលជ្រៅចំពោះភ្ញៀវទេសចរជាតិ-អន្តរជាតិ ដែលបានមកលេងកម្សាន្តក្នុងទឹកដីខេត្តរតនគិរី ជាពិសេសម្ចាស់ផ្ទះសំណាក់ សណ្ឋាគារ និងម្ចាស់សេវាកម្មម្ហូបអាហារទាំងអស់ដែលបានចូលរួម ជាមួយអាជ្ញាធរខេត្ត ក្នុងការរឹតបន្តឹងវិធានការអនាម័យតាមការណែនាំរបស់ក្រសួងសុខាភិបាល ដើម្បីបង្ការ ទប់ស្កាត់កុំឱ្យមានរលកទី២នៃការរាតត្បាតជំងឺកូវីដ-១៩។
ប្រភព៖ មន្ទីរព័ត៌មានខេត្តរតនគិរី
អត្ថបទថ្មីៗ ចុងក្រោយ
អត្ថបទពេញនិយម
