ក្រសួងសម្របសម្រួល កិច្ចការសមុទ្រនៃ ប្រទេសឥណ្ឌូនេស៊ី បាននិយាយថា ខ្លួនកំពុងពិចារណា កាត់បន្ថយពន្ធលើតម្លៃបន្ថែម លើការលក់រថយន្តអគ្គិសនីពី 11% ទៅ 1% ដើម្បីជំរុញឱ្យមានតម្រូវការ និងទាក់ទាញការវិនិយោគ។ លោក Septian Hario Seto មន្ត្រីជាន់ខ្ពស់ នៃក្រសួងបាននិយាយថា ប្រទេសឥណ្ឌូនេស៊ី មានគោលដៅនៃ ការមានម៉ូតូអគ្គិសនី យ៉ាងហោចណាស់ 1.2 លានគ្រឿង និងរថយន្តអគ្គិសនីចំនួន 35,000 គ្រឿងដែល នឹងប្រើប្រាស់នៅឆ្នាំ 2024។

លោកបានបង្ហើបថា រដ្ឋាភិបាលនឹងផ្តល់ ការលើកទឹកចិត្តជាសាច់ប្រាក់ចំនួន 7 លានរូពី (467.6 ដុល្លារ អាមេរិក) សម្រាប់រាល់ម៉ូតូអគ្គិសនី ដែលបានលក់រហូតដល់ ការលក់ឈានដល់បរិមាណជាក់លាក់ ដែលនៅតែស្ថិតក្នុងការពិភាក្សា។ ទោះជាយ៉ាងណាក៏ដោយ ការលើកទឹកចិត្ត ដែលបានគ្រោងទុកអាចមាន សម្រាប់តែរថយន្តអគ្គិសនី (EVs) ដែលផលិតក្នុងស្រុក យ៉ាងហោចណាស់ 40%។

មន្ត្រីរូបនេះបាន និយាយថាភាគរយមាតិកាក្នុងស្រុក នឹងត្រូវបានកើនឡើង បន្ថែមទៀតដល់ 60% និងច្រើនជាងនេះនៅពេលខាងមុខ។ បទប្បញ្ញត្តិដែលដាក់ចេញ នូវការលើកទឹកចិត្ត សម្រាប់អ្នកមានគោលបំណងប្រើប្រាស់រថយន្តអគ្គិសនី ត្រូវបានគេរំពឹងថា នឹងចេញនៅសប្តាហ៍ក្រោយ។