កំណាត់ផ្លូវជាតិលេខ៧៦ ត្រង់ចំណុចឃុំអូរងើយ ស្រុកអូររាំង ខេត្តមណ្ឌលគិរី កាលពីថ្ងៃទី០១ ខែសីហា ឆ្នាំ២០២៣ ត្រូវផ្អាកចរាចរណ៍ជាបណ្ដោះអាសន្ន ដោយសារការរអិលបាក់ដី និងមានការខូចខាតផ្លូវ ប្រវែង ១៦៦ ម៉ែត្រ (ដីបាក់ទាំងស្រុងប្រវែង ៧០ ម៉ែត្រ និងស្នាមប្រេះ ៩៦ ម៉ែត្រ) ដែលមិនអាចធ្វើចរាចរណ៍បាន។

ដើម្បីដោះស្រាយបញ្ហាខាងលើ ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានសហការជាមួយ រដ្ឋបាលខេត្តមណ្ឌលគិរី ដើម្បីរៀបចំសាងសង់ផ្លូវវាងថ្មី ដែលមានប្រវែង ១ ០០០ ម៉ែត្រជាបន្ទាន់ សម្រាប់ការធ្វើដំណើរឆ្លងកាត់ មកទល់ពេលនេះ ផ្លូវវាងមួយខ្សែនេះនេះ បានដាក់អោយប្រើប្រាស់ ជាបណ្ដោះអាសន្នហើយ និងត្រូវបន្ថែមការងារមួយចំនួនទៀត ដូចជាការឈូសឆាយផ្លូវ ក្រាលថ្មមិច និងការកិនបង្ហាប់ដីជាដើម ដើម្បីអោយការធ្វើដំណើរ កាន់តែងាយស្រួល។

ក្រសួងសាធារណការ និងដឹកជញ្ជូនបានបញ្ជាក់ថា ខ្សែផ្លូវជាតិលេខ៧៦ ឆ្លងកាត់ពីស្រុកស្នួល ខេត្តក្រចេះ មកកាន់ក្រុងសែនមនោរម្យ ខេត្តមណ្ឌលគិរី បានសាងសង់រួចរាល់តាំងពីឆ្នាំ ២០១១ ហើយរយៈពេល ១២ ឆ្នាំកន្លងមកនេះ មិនធ្លាប់មានរងការខូចខាត ឬជួសជុល ដោយកត្តាណាម្ដងទេ។ ប៉ុន្តែកាលពីដើមខែសីហា ឆ្នាំ២០២៣ កំណាត់ផ្លូវជាតិលេខ៧៦ ត្រង់ចំណុចឃុំអូរងើយ មានហេតុការណ៍បាក់ដី ដោយសារតែកត្តាអាកាសធាតុ មានភ្លៀងធ្លាក់ជាប់ៗគ្នាជាច្រើនថ្ងៃ នាំអោយទឹកហូរច្រោះ ដាច់ដីក្រោមផ្លូវ។

ក្រោយពីពិនិត្យស្ថានភាព និងការឈូសផ្លូវប្រើប្រាស់ថ្មីបណ្ដោះអាសន្ន ឯកឧត្តម ស៊ុន ចាន់ថុល បានមានប្រសាសន៍ថា គម្រោងជួសជុល កន្លែងខូចខាតផ្លូវជាតិលេខ៧៦ នេះឡើងវិញ គឺមាន ២ ជម្រើស គឺអាចនឹងជួសជុល គន្លងផ្លូវចាស់ឡើងវិញ ឬសិក្សាសម្រេចសាងសង់ ផ្លូវវាងថ្មីតែម្ដង អាស្រ័យទៅលើ ការសិក្សាស៊ីជម្រៅ ផ្នែកបច្ចេកទេស និងផ្នែកហិរញ្ញវត្ថុជាមុន។

សូមបញ្ជាក់ថា ផ្លូវជាតិលេខ៧៦ (ស្រុកស្នួល-ក្រុងសែនមនោរម្យ) មានប្រវែងសរុប ១២៧ គីឡូម៉ែត្រ ត្រូវបានបើកការដ្ឋានសាងសង់ កាលពីខែកុម្ភៈ ឆ្នាំ២០០៧ និងបញ្ជប់នៅខែមីនា ឆ្នាំ២០១១ ជាប្រភេទផ្លូវកៅស៊ូ DBST ម៉ៅការសាងសង់ដោយ ក្រុមហ៊ុនសាជីវកម្មស្ពានថ្នល់ចិន និងចំណាយថវិកា សាងសង់ប្រមាណ ៥១,៩ លានដុល្លារ និងសម្ពោធបើកអោយប្រើប្រាស់ ជាផ្លូវការកាលពីខែមករា ឆ្នាំ២០១២។