ឆ្នាំ 2019 ខិតជិតចូលមកដល់ទីបញ្ចប់ទៀតហើយ នៅសល់តែប៉ុន្មានខែទៀតប៉ុណ្ណោះ។ ប្រិយមិត្តអ្នកអានរបស់យើង ក៏ពិតជាទទួលបានអត្ថបទចែករំលែកល្អៗ ពីទីកន្លែងកម្សាន្ត តំបន់រមណីយដ្ឋាន និងទីតាំងបែបទេសចរណ៍វប្បធម៌ជាច្រើននៅជុំវិញពិភពលោក ពីគេហទំព័ររបស់យើងផងដែរ។ ដោយឡែករាងលឿនជាងរាល់ដង នៅក្នុងអត្ថបទនេះ យើងនឹងបង្ហាញអ្នកទាំងអស់គ្នាពីប្រទេសទាំង 10 ជាគោលដៅទេសចរណ៍ ដ៏ល្អបំផុតសម្រាប់ឆ្នាំ 2020 ដែលនឹងខិតជិតមកដល់នៅក្នុងពេលឆាប់ៗខាងមុខនេះ។

បញ្ជីនៃប្រទេសទេសចរណ៍ទាំង 10 នេះ ត្រូវបានបង្ហាញដោយប្រភព គេហទំព័រអន្តរជាតិដ៏ល្បីល្បាញ “The Lonely Planet” ផងដែរ មានដូចជា៖

1. ប៊ូតាន់ (Bhutan)

វាគឺជាអណាចក្រនៃដែនដីរន្ទះនាគរាជ (Thunder Dragon) ហើយក៏ជាប្រទេសមួយនៅក្នុងចំណោមប្រទេសមួយចំនួនទៀត ដែលមានភ្ញៀវទេសចរ ទៅកម្សាន្តតិចបំផុតនៅលើផែនដីនេះ។ ប្រទេសនេះត្រូវបានបង្ហាញនៅក្នុងទេសភាពដ៏ស្រស់បំព្រងបំផុត នៃកេរតំណែលវប្បធម៌ដើមក្នុងតំបន់ Dzongs (ទីវត្តអារាមសក្ការៈ) ដែលប្រជាជននៅទីនេះ ក៏មិនសូវជាពេញចិត្តជាមួយនឹងជីវិតទាន់សម័យអ្វីឡើយ ពួកគេរស់នៅភាគច្រើនជាមួយធម្មជាតិ និងសូម្បីនៅតាមផ្លូវចរាចរណ៍របស់ពួកគេ មិនមានភ្លើងស្តុបផង។

ស្ថិតនៅក្នុងដែនដីជ្រៅនៃព្រៃហិមាល័យ (ព្រៃហេមពាន្ត) ប្រទេសប៊ូតាន់រក្សាការត្រួតពិនិត្យយ៉ាងតឹងរឹង លើកម្រិតទេសចរណ៍របស់ខ្លួន ដោយកំណត់ថ្លៃសេវាប្រចាំថ្ងៃសម្រាប់ភ្ញៀវទេសចរ ព្រមទាំងមានចំនួនកំណត់ទៀតផង។ វាអាចជាវិធីសាស្ត្រមួយដែលប្រទេសនេះរៀបចំឡើង ពីការលុកលុយទន្ទ្រានច្រើន នៅក្នុងអណាចក្រដែនដីនគរភ្នំ និងការពារមិនឲ្យមានការ បំពុលបរិយាកាសកើតឡើង។ យ៉ាងណាក៏ដោយក្រៅពី ទីតាំងវត្តអារាមជាទីសក្ការៈ ទីនេះក៏សំបូរទៅដោយសម្បត្តិធម្មជាតិស្រស់បំព្រង ដ៏ល្អបំផុតមួយផងដែរ នៅក្នុងពិភពលោក ព្រមទាំងបានក្លាយជាប្រទេសសរីរាង្គពេញលេញ ដំបូងគេនៅលើពិភពលោកចាប់ពីឆ្នាំ 2020 នេះទៅ ដែលមានបរិមាណជាតិពុលតិចបំផុត ព្រមទាំងជាប្រទេសដែលមានសន្តិភាព និងពលរដ្ឋរស់នៅយ៉ាងមានសុភមង្គល។

2. ចក្រភពអង់គ្លេស

ខណៈពេលដែលចក្រភពអង់គ្លេស ព្យាយាមអភិវឌ្ឍប្រទេសរបស់ខ្លួន ដើម្បីត្រៀមខ្លួនទីតាំងទេសចរណ៍ ដែលអាចមានស្ថេរភាព នៅគ្រប់រដូវប្រចាំឆ្នាំ និងអាចបើកទ្វារទទួលភ្ញៀវទេសចរ មកពីគ្រប់ទិសទៅពេញមួយឆ្នាំនោះ ប្រភព The Lonely Planet ក៏បានគូសបញ្ជាក់ពីឆ្នេរសមុទ្ររបស់អង់គ្លេស អមជាមួយនឹងធនធានធម្មជាតិសមុទ្រ និងទេសភាពមិនចេះអស់ មិនតែប៉ុណ្ណោះ ប្រទេសនេះក៏មានប្រាសាទបុរាណជាច្រើន ទាក់ទងនឹងប្រវត្តិសាស្ត្រ និងរឿងពេ្រងដំណាលផងដែរ។ ប្រទេសនេះក៏បានកត់សម្គាល់ផងដែរថា ផ្នែកថ្មីនៃឆ្នេរសមុទ្ររបស់ខ្លួន (New sections of the coast paths) នៅពេលដែលបញ្ចប់មានប្រវែងជិត 3,000 ម៉ាយល៍ នឹងជា ផ្លូវបន្តវែងបំផុតនៃប្រភេទរបស់វា នៅលើពិភពលោកដែលផ្តល់សិទ្ធិ ចូលទៅដល់ឆ្នេរសមុទ្រទាំងមូល របស់ប្រទេសនេះជាលើកដំបូង។ 

3. North Macedonia

វាគឺជាប្រទេសថ្មីដែលទើបតែផ្តាច់ខ្លួន និងទទួលបានឯករាជ្យពេញលេញថ្មីៗនេះដែរទេ។ ប្រទេសនេះល្បីល្បាញខាងផ្នែកអាហារបែបប្រពៃណី និងធម្មជាតិ។ ក្រៅពីនេះវាក៏មានបឹងធម្មជាតិ (Lake Ohrid) ដែលទើបតែបានចុះជាសម្បត្តិបេតិកភណ្ឌពិភពលោក និងមានតំបន់ភ្នំ និងទេសភាពធម្មជាតិដ៏ស្រស់បំព្រងព័ទ្ធជុំវិញផងដែរ។

4. អារូបា (Aruba)

អារូបា គឺជាប្រទេសដែលកំពុងតែមានការអភិវឌ្ឍទៅលើប្រព័ន្ធប្រើប្រាស់ប្រភពថាមពល កើតឡើងវិញ (Sustainable System) ព្រមទាំងរៀបចំផែនការ ទៅលើការហាមមិនឲ្យប្រើប្រាស់ផ្លាស្ទិកតែមួយ (Single-use Plastic) ក៏ដូចជាការប្រើឡេការពារកម្តៅថ្ងៃដែលអាចបង្កអន្តរាយផងដែរ ដែលច្បាប់ទាំងនេះ នឹងចាប់អនុវត្តចាប់ពីឆ្នាំ 2020 នេះតទៅ។ វាក៏ជាប្រទេសមួយក្នុងចំណោមប្រទេសដទៃទៀត ដែលមានឆ្នេរខ្សាច់ និងតំបន់សមុទ្រស្អាតបំផុតនៅក្នុងពិភពលោក។

5. eSwatini

វាក៏ជាប្រទេសថ្មីដែលទើបតែទទួលបានឯករាជ្យពេញលេញ នៅក្នុងឆ្នាំ 2018 ដែរ ដែលត្រូវបានគេស្គាល់ថាជាព្រះរាជាណាចក្រ eSwatini ហើយក៏ជាទីតាំងដែលមានភ្ញៀវទេសចរ មកកម្សាន្តតិចបំផុតនៅអាហ្វ្រិកខាងត្បូង។ ទីនេះមានការអភិវឌ្ឍផ្លូវថ្នល់ថ្មី និងតំបន់អភិរក្សធំៗមួយចំនួន ព្រមទាំងបានត្រៀមខ្លួនរួចរាល់ក្នុងការទាក់ទាញភ្ញៀវទេសចរមកពីគ្រប់ទិសទី មកកម្សាន្តនៅក្នុងប្រទេសនេះ សម្រាប់ឆ្នាំ 2020 ខាងមុខ។

6. ប្រទេសកូស្តារីកា (Costa Rica)

វាគឺជាប្រទេសដែលផ្តល់ទីតាំង និងការកម្សាន្តដល់ភ្ញៀវទេសចរ ប្រកបដោយសុខសុវត្ថិភាពជាទីបំផុត អមដោយប្រព័ន្ធជីវចម្រុះ និងសម្បត្តិធម្មជាតិយ៉ាងស្រស់ត្រកាល។ ប្រទេសនេះត្រូវបានគេប្រដូចជា ឋានសួគ៌ត្រូពិច ផ្តល់ដំណើរកម្សាន្តផ្សងព្រេងជាមួយធម្មជាតិដ៏អស្ចារ្យ និងត្រូវបានគេជឿថា វានឹងមានរឿងប្លែកៗបន្ថែមទៀតនៅក្នុងឆ្នាំ 2020 ខាងមុខនេះ។

7. ប្រទេសហូឡង់ (The Netherland) 

នៅឆ្នាំ 2020 ហូឡង់នឹងប្រារព្ធខួបទី 75 នៃសេរីភាពតាំងពីការបញ្ចប់សង្គ្រាមលោកលើកទី 2 នៅលើទឹកដីរបស់ខ្លួន។ ក្រុមអ្នកស្រាវជ្រាវ The Lonely Planet បានិយាយថា “ភ្ញៀវទេសចរ នឹងបានឃើញ ក៏ដូចជាអាចចូលរួមការប្រារព្ធពិធីជាច្រើនប្រភេទនៅតាមទីក្រុង និងទទួលបានភាពភ្ញាក់ផ្អើលបន្ថែមទៀត រាល់ការចំណាយប្រាក់របស់អ្នក ទៅក្នុងពិធីនីមួយៗ។ ប្រសិនបើអ្នកអាចកែសម្រួលពេលវេលានៃដំណើរកម្សាន្តរបស់អ្នកបាន ខែមេសា និងឧសភា គឺជាពេលវេលាដែលត្រូវទៅ ដែលអ្នកអាចចូលរួមក្នុងព្រឹត្តិការណ៍ King’s Day, ទិវារំដោះការរំលោភពលកម្ម និងកម្មវិធី Eurovision Song Contest ដែលនឹងត្រូវរៀបចំឡើងនៅក្នុងប្រទេសក្នុងឆ្នាំ 2020”។

8. Liberia

វាគឺជាប្រទេសមួយនៃតំបន់អាហ្វ្រិកខាងលិច ដែលសំបូរទៅដោយសម្បត្តិធម្មជាតិដ៏អស្ចារ្យជាច្រើនដូចជា ឆ្នេរខ្សាច់ដ៏ស្រស់ស្អាត តំបន់ព្រៃឈើបៃតង សួនសត្វ មានសត្វពស់ថ្លាន់ សត្វស្វាឪ សត្វដំរី ដំរីទឹក ដំរី និងសត្វជាច្រើនប្រភេទទៀត។ ប្រទេសនេះក៏ទើបតែធ្វើកិច្ចព្រមព្រៀងជាមួយនឹងប្រទេសន័រវ៉េស ក្នុងការបញ្ឈប់ការកាប់បំផ្លាញព្រៃឈើនៅឆ្នាំ 2020 នេះផងដែរ។

9. Morocco

យោងតាមប្រភព The Lonely Planet បានឲ្យដឹងថាប្រទេស Morocco ផ្តល់សណ្ឋាគារ និងផ្ទះសំណាក់សម្រាប់ការស្នាក់ នៅតាមតំបន់ឆ្នេរសមុទ្រដ៏ស្រស់ស្អាត ផ្តល់នូវបរិយាកាស និងការសម្រាកលំហែបានយ៉ាងល្អបំផុត។ មិនតែប៉ុណ្ណោះប្រទេសនេះ ក៏បានធ្វើឲ្យកាន់តែប្រសើរនូវហេដ្ឋារចនាសម្ព័ន្ធ និងបង្កើតបានផ្លូវរថភ្លើងដ៏លឿនបំផុតដំបូងគេនៅទ្វីបអាហ្វ្រិក មានន័យថា អ្នកអាចចំណាយពេលត្រឹមតែ 2 ម៉ោងប៉ុណ្ណោះ ក្នុងការធ្វើដំណើរពី Casablanca ទៅ Tangier។ លើសពីនេះ Marrakesh ក៏នឹងក្លាយជារដ្ឋធានីវប្បធម៌ដំបូងគេ របស់ទ្វីបអាហ្វ្រិកនៅឆ្នាំ 2020 នេះផងដែរ។ 

10. Uruguay

នេះគឺជាប្រទេសចុងក្រោយនៃបញ្ជីទាំង 10 នៃគោលដៅទេសចរណ៍ដ៏ល្អបំផុត សម្រាប់ឆ្នាំ 2020 ខាងមុខនេះ។ វាក៏ជាប្រទេស ដែលត្រូវបានគេចាត់ទុកថា មានការស្វាគមន៍ដ៏កក់ក្តៅ និងរួសរាយជាទីបំផុត នៅក្នុងពិភពលោក លាយឡំជាមួយនឹងសម្រស់នៃទេសភាពធម្មជាតិរបស់វា។

ដូចនេះសម្រាប់ប្រិយមិត្តដែលមានគម្រោងសម្រាប់ដំណើរកម្សាន្ត នៅឆ្នាំ 2020 ខាងមុខនេះ អាចជ្រើសរើសប្រទេសមួយ ក្នុងចំណោម 10 នេះជាគោលដៅនៃដំណើរកម្សាន្តរបស់អ្នកបាន។