យោងតាមសន្និសីទសារព័ត៌មាន ស្ដីពី "សមិទ្ធផលសម្រេចបាន រយៈពេល ៥ឆ្នាំកន្លងមក របស់ក្រសួងទេសចរណ៍" ដែលរៀបចំឡើងដោយ ឯកឧត្ដម តុប សុភ័ក រដ្ឋលេខាធិការ និងជាអ្នកនាំពាក្យរដ្ឋាភិបាល រួមទាំងមាន ការចូលរួមឡើងដោយ មន្ដ្រីជំនាញជាន់ខ្ពស់ របស់ក្រសួងទេសចរណ៍ កាលពីថ្ងៃទី ៣០ ខែកញ្ញា ឆ្នាំ ២០២២ ថ្មីៗនេះ បានបង្ហាញឲ្យឃើញថា ការខិតខំប្រឹងប្រែង របស់ក្រសួងទេសចរណ៍ ក្នុងការរៀបចំស្ដារ និងលើកស្ទួយវិស័យទេសចរណ៍ឡើងវិញ ក្រោយវិបត្ដិជំងឺកូវីដ-១៩ កន្លងមកនេះ សម្រេចបាន សមិទ្ធផលជាវិជ្ជមាន និងផលប្រយោជន៍សំខាន់ៗ ជាច្រើនគួរឲ្យកត់សម្គាល់។

ជាក់ស្ដែងយោងតាម ស្ថានភាពភ្ញៀវទេសចរ ក្នុងរយៈពេល ៨ ខែនៃឆ្នាំ ២០២២ នេះ កម្ពុជាទទួលបាន ភ្ញៀវទេសចរអន្ដរជាតិជិត ១ លាននាក់ កើនឡើង ៧២០,២% ធៀបនឹងរយៈពេលពេលដូចគ្នា កាលពីឆ្នាំ ២០២១ កន្លងទៅ។ បន្ថែមពីនេះ ក្រសួងទេសចរណ៍ក៏បាន បានដាក់ចេញនូវ ទិសដៅការងារសំខាន់ៗ ថ្មីទៀតផងដែរ ក្នុងការគ្រប់គ្រង និងអភិវឌ្ឍវិស័យទេសចរណ៍បន្ថែម ប្រកបដោយប្រសិទ្ធភាព គុណភាព និងនិរន្ដភាព ដើម្បីទាក់ទាញភ្ញៀវទេសចរអន្ដរជាតិ ឲ្យបានប្រមាណ ៧,៥ លាននាក់ និងភ្ញៀវទេសចរផ្ទៃក្នុងឲ្យបានប្រមាណ ១៦ លាននាក់ នៅត្រឹមឆ្នាំ ២០២៨ ខាងមុខនេះតែម្ដង។

ការរំពឹងទុកខ្ពស់បែបនេះ ក៏ដោយសារតែក្រសួងទេសចណ៍ បានដាក់ចេញនូវ ផែនទីចង្អុលផ្លូវស្ដីពី ផែនការស្ដារ និងលើកស្ទួយ វិស័យទេសចរណ៍កម្ពុជាក្នុង និងក្រោយវិបត្ដិជំងឺកូវីដ-១៩ ដែលមាន ៣ ដំណាក់កាលគឺ៖ ដំណាក់កាលទី ១ (ភាពធន់)៖ ការគ្រប់គ្រងវិបត្ដិក្នុង ដំណាក់កាលទម្លាប់ថ្មី និងរៀបចំផែនការ សម្រាប់ការស្ដារឡើងវិញ ឆ្នាំ ២០២០-២០២១។ ដំណាក់កាលទី២ (ការងើបឡើងវិញ)៖  ការស្ដារឡើងវិញ នៃវិស័យទេសចរណ៍កម្ពុជា ក្រោយវិបត្ដិជំងឺកូវីដ១៩ (ឆ្នាំ ២០២២-២០២៣)។ និងដំណាក់កាលទី ៣ (ការដំណើរការឡើងវិញ)៖ ការរៀបចំឆ្ពោះទៅកាន់ អនាគតថ្មីនៃ វិស័យទេសចរណ៍កម្ពុជា (ឆ្នាំ ២០២៤-២០២៥)។