ស្ពានឆ្លងទៅកោះយ៉ ដែលតភ្ជាប់រវាង ភូមិប៉ាក់ខ្លង ឃុំប៉ាក់ខ្លង ស្រុកមណ្ឌលសីមា ជាមួយនឹងក្រុងខេមរភូមិន្ទ ខេត្តកោះកុង ស្ពានដែកបាឡេនេះ ដើរតួនាទីយ៉ាងសំខាន់ សម្រាប់វិស័យទេសចរណ៍ ការធ្វើដំណើររបស់ ប្រជាពលរដ្ឋនៅក្នុងតំបន់។ យ៉ាងណាមិញ ដោយឃើញពី សភាពចាស់ទ្រុឌទ្រោម ការព្រួយបារម្ភពី សុវត្ថិភាពធ្វើដំណើរ និងសមត្ថភាពធ្វើដំណើរនោះ រាជរដ្ឋាភិបាលកម្ពុជា សហការជាមួយវិស័យឯកជន នឹងសាងសង់ស្ពានកោះយ៉ថ្មី ជាស្ពានបេតុងសសៃដែក ដោយគ្រោងចំណាយទឹកប្រាក់ជិត ១,៤ លានដុល្លារ។

សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសអំពី គម្រោងស្ថាបនា ស្ពានបេតុងកោះយ៉ថ្មី អាចចាប់ផ្ដើមដំណើរការ ក្រោមកិច្ចសហការជាមួយក្រុមហ៊ុន LYP Group ដោយអ្នកឧកញ៉ា លី យ៉ុងផាត់ ជាអ្នកទទួលបន្ទុក ចំណាយថវិកាអនុវត្តសាងសង់ ក្នុងតម្លៃជិត ១,៤ លានដុល្លារ និងប្រើប្រាស់ពេល សាងសង់ប្រមាណជិត ១ ឆ្នាំកន្លះ ពោលគ្រោងនឹង បញ្ចប់នៅចុងឆ្នាំ២០២៣។

យោងតាម លោក អន ដាវុធ ប្រធានមន្ទីរសាធារណការ និងដឹកជញ្ជូន ខេត្តកោះកុង បានបង្ហាញថា ស្ពានបេតុងថ្មីកោះយ៉ មានប្រវែង ១២៦ ម៉ែត្រ និងពង្រីកទទឹងដល់ ១១ ម៉ែត្រ អាចបើកបរ ២ គន្លងរថយន្ដ។ លោកបញ្ជាក់ថា ស្ពានដែកបាឡេកោះយ៉ មានសភាពចាស់ ទ្រុឌទ្រោមទៅហើយ និងតែងបង្កគ្រោះថ្នាក់ ដល់អ្នកដំណើរជាញឹកញាប់ ជាពិសេសក្នុងរដូវភ្លៀងធ្លាក់។ ដូចនេះ សម្តេចតេជោ ហ៊ុន សែន នាយករដ្ឋមន្ត្រី បានប្រកាសអំពីគម្រោង ស្ថាបនាស្ពានបេតុងថ្មី ដើម្បីដោះស្រាយបញ្ហា និងមានអ្នកឧកញ៉ា លី យ៉ុងផាត់ ជាអ្នកទទួលបន្ទុក ចំណាយថវិកាសាងសង់។

យោងតាមផែនការគ្រោងទុក ស្ពានបេតុងថ្មីកោះយ៉ អាចនឹងបញ្ចប់នៅចុងឆ្នាំ២០២៣ ដោយមន្ទីរសាធារណការ និងដឹកជញ្ជូនខេត្តកោះកុង បានចាប់ផ្ដើមសកម្មភាព យ៉ាងមមាញឹកទៅតាម បែបផែនជំនាញរៀងៗខ្លួន នៅការដ្ឋានសាងសង់ ស្ពានបេតុងនេះ ទោះបីជាអាកាសធាតុ មានភ្លៀងធ្លាក់ ជាបន្តបន្ទាប់ក៏ដោយ ដើម្បីអាចអោយ គម្រោងបញ្ចប់ទៅ តាមផែនការគ្រោងទុក។