ភ្នំពេញ៖ បើយោងតាមរបាយការណ៍ព័ត៌មាន ដែលចេញផ្សាយដោយ ក្រុមប្រឹក្សាអភិវឌ្ឍន៍កម្ពុជា CDC បានឲ្យដឹងថា កម្ពុជាទទួលបានគម្រោងវិនិយោគទ្រព្យសកម្មថេរចំនួន ៣១៥ ដែលមានតម្លៃ ៥,២៨ ពាន់លានដុល្លារក្នុងរយៈពេល ៩ ខែដំបូងនៃឆ្នាំនេះ។

របាយការណ៍បានបន្តថា គម្រោងទាំងនេះបានបង្កើតការងារថ្មីជាង ២៥០.០០០កន្លែង ដែលផ្តល់ឱកាសការងារ សម្រាប់មួយផ្នែកធំ នៃកម្លាំងពលកម្មក្នុងស្រុកផងដែរ។

ជាក់ស្តែង ក្នុងនោះដែរ គម្រោងវិនិយោគចម្រុះទាំងនេះ រួមមានវិស័យផលិតកម្ម អចលនទ្រព្យ ទេសចរណ៍ និងការអភិវឌ្ឍហេដ្ឋារចនាសម្ព័ន្ធ ជាដើម។

គួរឲ្យដឹងដែរថា នៅក្នុងខែកញ្ញា ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មីចំនួន២៨ ដែលមានតម្លៃ ៤៤៣ លានដុល្លារ ដែលបង្កើតការងារបានប្រហែល ២៥.០០០ កន្លែង សម្រាប់កម្លាំងពលកម្មក្នុងស្រុក។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានចាត់ទុកថាកំណើនវិនិយោគទាំងនេះ គឺបណ្តាលមកពី សន្តិភាព ស្ថេរភាពនយោបាយ និងម៉ាក្រូសេដ្ឋកិច្ច ក្របខ័ណ្ឌច្បាប់ និងបទប្បញ្ញត្តិកាន់តែប្រសើរ និងកំណើនសេដ្ឋកិច្ចកម្ពុជា។

ឯកឧត្តម បានបន្តថា រាជរដ្ឋាភិបាលបានដោះស្រាយ ការលំបាកយ៉ាងសកម្ម និងបញ្ហាប្រឈមរបស់វិស័យឯកជន សម្រាប់អ្នកវិនិយោគទាំងក្នុង និងក្រៅប្រទេស។

ឯកឧត្តម បានបន្ថែមថា ច្បាប់វិនិយោគ កម្លាំងពលកម្មជំនាញ ប្រព័ន្ធអនុគ្រោះពាណិជ្ជកម្ម និងប្រព័ន្ធអនុម័តការវិនិយោគ ដែលទើបដាក់ឱ្យដំណើរការ ដែលអនុញ្ញាតឱ្យមាន ការអនុម័តគម្រោងវិនិយោគ និងធ្វើឱ្យដំណើរការកាន់តែលឿន និងងាយស្រួល សម្រាប់អ្នកវិនិយោគ គឺជាកត្តាជម្រុញ ក្នុងការទាក់ទាញការវិនិយោគថ្មី។

គួររម្លឹកឲ្យដឹងដែរថា គិតត្រឹមខែកញ្ញា ឆ្នាំ២០២៤ កម្ពុជាមានកិច្ចព្រមព្រៀង ពាណិជ្ជកម្មសេរីទ្វេភាគី និងកិច្ចព្រមព្រៀងផ្សេងទៀត ចំនួនបួនរួមមាន កិច្ចព្រមព្រៀងពាណិជ្ជកម្មសេរីកម្ពុជា-ចិន កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ កិច្ចព្រមព្រៀងភាពជាដៃគូ សេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម និងកិច្ចព្រមព្រៀងភាពជាដៃគូ សេដ្ឋកិច្ចគ្រប់ជ្រុងជ្រោយក្នុងតំបន់។

ប្រភព៖ ក្រុមប្រឹក្សាអភិវឌ្ឍន៍កម្ពុជា